Raul Castro tha se i vëllai i tij Fidel ishte një lider i pazëvendësueshëm

Diplomati më i lartë amerikan në Amerikën Latine, Tom Shannon tha se për herë të parë në historinë e Kubës moderne, vendi kishte udhëheqës të rinj politikë.

Por ai shtoi se embargoja mbi Kubën që u vendos më shumë 40 vjet më parë, do të vazhdonte derisa të ndodhte një kalim në demokraci.

Asambleja Kombëtare në Kubë zgjodhi të djelën siç pritej udhëheqësin Raul Castro për të pasuar vëllain e tij të madh, Fidel.

Duke pranuar detyrën, Raul Castro tha përpara parlamentit se asnjë nuk mund ta zëvendësonte me të vërtetë ish udhëheqësin:

"Unë e pranoj përgjegjësinë që më është besuar me bindjen siç e kam shprehur shumë herë, se ka vetëm një kryekomandant të revolucionit kubanez".

"Fideli është i pazëvendësueshëm dhe njerëzit do të vazhdojnë punën e tij kur ai të mos jetë këtu fizikisht," tha Raul Castro.

Ai kërkoi leje që të konsultohej me vëllain e tij Fidel Castro për çështje të rëndësishme.