Kryeparlamentarja shqiptare viziton Prishtinën

Zonja Topalli, që ndodhet për një vizitë në Prishtinë, shfaqi bindjen e saj se Rusia nuk do të përdorë veton kundër pavarësisë së Kosovës.

"Besoj se po shkohet aty ku ne të gjithë kemi dëshiruar, ku kemi ëndërruar dhe nuk besoj dhe nuk gjej bazë për të menduar për ndërlikime të tilla, përkundrazi, në takimet që kam pasur në Kinë, në Luksemburg, në Itali etj, më bëjnë të mendoj se nuk do të shkohet aty," tha zonja Topalli pas takimeve me udhëheqësit më të lartë të Kosovës.

"Një pavarësi e konsoliduar dhe afatgjatë është gjëja më themelore për Kosovën, për stabilitetin, për perspektivën evropiane, për rajonin dhe për të gjithë ne," tha kryeparlamentarja Topalli.

Kryetari i Kuvendit të Kosovës, Kolë Berisha, tha se Shqipëria ka një meritë të veçantë për procesin e zgjidhjes së statusit.

Ai ka shprehur falenderimin e tij për ndihmën që kanë dhënë institucionet e Shqiptarisë në çështjen e Kosovës.

"Tirana zyrtare është shndërruar kaherë në një avokat të fuqishëm të çështjes së Kosovës dhe takimet që i ka vazhdimisht me të huaj, qoftë brenda apo jashtë shtetit, Kosova zë një vend të madh të asaj agjende," tha zoti Berisha.

Zonja Topalli dhe homologu i saj nga Kosova Berisha janë zotuar se do të vazhdojnë bashkëpunimit ndërmjet dy parlamenteve edhe pas zgjidhjes së statusit.

Kjo është vizita e dytë zyrtare e zonjës Topalli në Kosovë, që kur mori udhëheqjen e legjislativit shqiptar.