Para Parisit z.Çeku vizitoi Londrën ku u takua me zyrtarë të lartë

Kryeministri Çeku ka deklaruar se askush nuk e di saktë nëse zgjidhja e statusit do të shtyhet për disa muaj, por u shpreh optimist se procesi do të përfundojë deri në fund të këtij vitit.

Vizita e kryeministrit Çeku në Francë bëhet në kuadër të një fushate diplomatike që kanë filluar anëtarët e Ekipit Negociator të Kosovës në vende të ndryshme të botës për të kërkuar mbështetje për pavarësinë e Kosovës.

Kjo në kohën kur procesi i zgjidhjes së statusit ka hyrë në fazën më kritike.

Para Parisit, kreu i qeverisë së Kosovës qëndroi në Londër, ndërsa më pas ai pritet të vizitojë edhe disa shtete tjera.

Kryeministri Agim Çeku tha se askush nuk e di me siguri kohën kur do të zgjidhet statusi i Kosovës, por sipas tij, tanimë dihet që zgjidhja do të jetë pavarësia.

Ndërkohë kryenegociatori Martti Ahtisaari po përgatit propozimin e tij për zgjidhjen e statusit të Kosovës, i cili pritet t’u prezentohet më pas Prishtinës e Beogradit në njërën anë dhe Grupit të Kontaktit e Këshillit të Sigurimit të OKB-së në anën tjetër.

Në fund të muajit tetor zoti Ahtisaari do të marrë pjesë në takimin e drejtorëve politikë për Ballkanin të vendeve anëtare të Grupit të Kontaktit.

Zëdhënësja e zotit Ahtisaari, Hua Jiang ka thënë se mandati i Misionit të OKB-së për statusin e Kosovës skadon në nëntor, por ka lënë të hapur mundësinë që ky afat të vazhdohet.