Violeta Hyseni

	Kryeministri i Kosovës po takohet me përfaqësues të Grupit të Kontaktit

Grupi i Kontaktit ende nuk ka dhënë sinjale për mundësinë e shtyrjes së procesit të zgjidhjes së statusit për shkak të zgjedhjeve të reja parlamentare që mund të mbahen në Serbi në muajin dhjetor.

Zyra e misionit ndërkombëtar për statusin e Kosovës ndërkaq ka theksuar se procesi i zgjidhjes së statusit të Kosovës do të mund të shtyhet vetëm nëse Grupi i Kontaktit e ndryshon afatin e përcaktuar më parë, respektivisht fundin e këtij viti.

Deklaratën e kryenegociatorit Martti Ahtisari për shtyrjen e mundshme të paraqitjes së rekomandimit të tij në KS të OKB-së e ka përkrahur të mërkurën edhe shefi i politikës së jashtme të BE-së, Javier Solana.

Pak ditë më parë, Grupi i Kontaktit në takimin ministror në Nju-Jork ka deklaruar se zgjidhja e negociuar për statusin e Kosovës duhet të gjendet deri në fund të vitit 2006 dhe u ka tërhequr vërejtjen Prishtinës dhe Beogradit se asnjëra palë nuk mund ta bllokojë procesin e bisedimeve në mënyrë të njëanshme.

Ndërkohë, udhëheqësit e institucioneve të Kosovës kanë kërkuar që procesi i statusit të përfundojë këtë vit.

Presidenti i Kosovës, Fatmir Sejdiu pas takimit me një delegacion të Asamblesë Parlamentare të NATO-s, ka deklaruar se statusi i Kosovës duhet të zgjidhet këtë vit me pavarësi.

Ndërkaq përfaqësuesi i Asamblesë Parlamentare të NATO-s, gjermani Karl Lamers tha se të gjithë pajtohen që nuk do të ishte mirë të kishte ndonjë vonesë në përcaktimin e statusit të Kosovës, për shkak të pritjeve pozitive që kanë qytetarët e Kosovës.