Jonathan Beale BBC, Uashington

	Motorçiklistë ndoqën pas incindentit makinën e ambasadorit

Një zëdhënës i Departamentit të Shtetit e quajti sulmin një shkelje të konventave ndërkombëtare.

Ambasadorit venezuelian në SHBA iu komunikua nga Departamenti i Shtetit se amerikanët mbajnë përgjegjës qeverinë e Venezuelës për incidentin e ndodhur.

Ngjarja në Karakas

Ambasadori amerikan, William Brownfield, u vu në shënjestër kur po merrte pjesë në një aktivitet bamirësie në Karakas.

Njoftimet bënë të ditur se makina e tij u godit me vezë dhe fruta dhe protestuesit thirrën 'ik prej këtej Gringo'.

Më pas një motorçiklist ndoqi makinën e tij.

Zyrtarët amerikanë në Karakas thanë se policia lokale nuk bëri asgjë për të ndërhyrë.

Departamenti amerikan thotë se ngjarja ishte e planifikuar dhe e quajti incidentin një përpjekje të mbështetur nga qeveria për të trembur ambasadorin amerikan Brownfield dhe ambasadën amerikane.

Departamenti amerikan përmes zëdhënësit Sean McCormack, tha se incidenti ishte një shkelje e Konventës së Vjenës dhe si e tillë shkaktonte mjaft indinjatë.

Ai tha se ambasadori i Venezuelës ishte paralajmëruar se përsëritja e këtij incidenti do të ketë pasoja të rënda diplomatike.

Marrëdhëniet diplomatike mes të dy vendeve kanë qënë të tensionuara edhe përpara këtij zhvillimi.

SHBA-ja nuk është nxituar të përfshihet në një luftë fjalësh me presidentin venezuelian, Hugo Chavez.

Por ky incident i fundit, e ka provokuar mjaft Uashingtonin për të reaguar ashpër.