Justin Webb BBC, Uashington

	Presidenti Bush tha se dhuna do të vazhdojë në Irak

Një zëdhënës i administratës sugjeroi se ato ishin pjesë e një plani të gjerë tërheqjeje.

Presidenti Bush mbajti një fjalim si pjesë e fushatës për të bindur amerikanët që të vazhdojnë të mbështesin përpjekjet në Irak.

Njoftimi i britanikëve për tërheqjen e trupave i përshtatet panoramës që paraqet administrata e Bushit për Irakun si një vend që po e rrit aftësinë për t'u kujdesuar për veten.

Zëdhënësi i presidentit tha se forcat britanike dhe ato amerikane ishin duke bashkëpunuar ngushtë.

Ndërsa për të ardhmen e Irakut presidenti tha:

"Ne do të përfundojmë atë që nisëm në Irak. Do ta përfundojmë misionin atje. Ne do të lëmë një demokraci që është e zonja të drejtojë veten, të mbajë veten dhe të mbrojnë veten në Irakun e lirë", tha zoti Bush.

Zoti Bush e bëri të qartë se dhuna pritet të vazhdojë në të ardhmen dhe se besonte se forcat irakiane të sigurisë kishin kaluar me sukses provat e fundit.

Presidenti e përdori fjalimin e tij edhe për të bërë akuza kundër Iranit:

"Forcat e koalicionit kanë kapur eksplozivë dhe mjete shpërthyese që është e qartë se janë prodhuar në Iran".

"Këto veprime së bashku me mbështetjen që Irani i jep terrorizmit dhe vazhdimi i përpjekjeve për të zhvilluar armë bërthmaore janë duke e izoluar Iranin".

"Amerika do të vazhdojë të bëjë fushatë ndërgjegjësuese për të përballuar kërcënimet."