Bethany Bell BBC, Vjenë

	Solana tha se Irani nuk ofroi asgjë të re në bisedimet në Vjenë

Bisedimet në kryeqytetin austriak Vjenë, u zhvilluan disa ditë përpara se Agjencia e Kombeve të Bashkuara për Energjinë Atomike, të zhvillojë të hënën një takim shumë të rëndësishëm për të vendosur se çfarë do të bëjë më pas lidhur me çështjen.

Shefi i diplomacisë evropiane, Havier Solana tha se Irani nuk kishte ofruar asgjë të re.

Agjencia e raportoi Iranin para Këshillit të Sigurimit në muajin shkurt, por la një muaj kohë për më shumë aktivitete diplomatike.

Ministri i jashtëm gjerman Frank-Walter Steinmeier, tha se diskutimet ishin zhvilluar në një atmosferë konstruktive.

Një çështje shumë e rëndësishme mbetet aktiviteti i Iranit për pasurimin e uraniumit.

Tre vendet e Bashkimit Evropian dhe një pjesë e madhe e komunitetit ndërkombëtar duan nga Irani që të pezullojë aktivitetin e pasurimit të uraniumit.

Deri tani Irani nuk ka dhënë asnjë shenjë se ka ndërmend të përmbushë kërkesat.