Steve Rosenberg BBC, Moskë

	Irani ngul këmbë se e zhvillon teknologjinë për qëllime paqësore

Rusia ka propozuar një marrëveshje kompromisi, në bazë të së cilës Irani mund të pasurojë uranium në territorin rus.

Moska ka besim se do të mundet të arrijë një marrëveshje diplomatike dhe do ta bindë Iranin që të pranojë kompromisin për programin bërthamor.

Në bazë të propozimit rus, Irani mund të pasurojë uraniumin vetëm në territorin rus dhe përmes infrastrukturës ruse.

Në këtë mënyrë, Teherani do të lejohet që të zhvillojë një program bërthmor për energjinë, për të cilin iranianët thonë se është i vetmi qëllim i tyre dhe jo krijimi i energjisë për zhvillimin e armëve bërthamore, siç besojnë Evropa dhe SHBA-ja.

Javët e fundit, zyrtarët iranianë kanë diskutuar herë me zjarr e herë ftohtë idenë e Moskës.

Në perëndim janë shtuar dyshime se iranianët janë duke blerë kohë.

Rusia, nga ana e saj është duke ushtruar presion që të arrihet një marrëveshje.

Arritja e një marrëveshjeje do të thotë rritje e prestigjit të Moskës.

Marrëveshja nga ana tjetër, do të mbronte në mënyrë të konsiderueshme interesat e Rusisë në Iran, që do të goditeshin rëndë nëse komuniteti ndërkombëtar vendos sanksione mbi Teheranin.

Ndërkohë ministri i Jashtëm iranian Manouchehr Mottaki, takohet në Bruksel me zyrtarët evropianë, duke rritur shpresat se Irani dëshiron dialog me Evropën për programin bërthamor.