Irani thotë se programi bërthamor ka synime paqësore

Nga 35 vendet anëtare të agjensisë, 27 votuan pro referimit të Teheranit pranë OKB-së.

Mes vendeve që votuan pro janë Rusia, Kina, Shtetet e Bashkuara dhe evropianët.

Pesë vende abstenuan në votim.

Ndërkohë, Venezuela, Kuba dhe Siria votuan kundër raportimit të Teheranit në OKB.

'Manovër politike'

Shefi i delegacionit iranian Javad Vaidi, tha menjëherë pas marrjes së vendimit se vendi tij do të fillonte menjëherë pasurimin e uraniumit me kapacitet të plotë.

Ai e përshkroi rezolutën si manovër politike.

"Kjo rezolutë është e motivuar politikisht," tha ai.

"Mungesa e konsistencës dhe unanimitetit në vendimin e Bordit të Guvernatorëve është një tregues i qartë se çështja bërthamore e Iranit nuk përbën shqesim për gjithë komunitetin ndërkombëtar, por vetëm për pak vende."

Rezoluta për të raportuar Iranin në Këshillin e Sigurimit shton rreziqet në përplasjen rreth programit të debatueshëm bërthamor të Iranit.

Kërcënime

Nuk pritet që Këshilli i Sigurimit të ndërmarrë ndonjë veprim të menjëhershëm.

Rezoluta nuk përmban ndonjë kërcënim të menjëhershëm për sanksione.

Diplomatët thonë se Irani tani ka një muaj kohë për të përmbushur kërkesat e komunitetit ndërkombëtar për të pezulluar punën për pasurimin e uraniumit dhe të shtojë bashkëpunimin me inspektorët e kombeve të Bashkuara.

Por Irani nuk ka dhënë ndonjë shenjë se do të ndryshojë qendrim.
Ai ka kërcënuar se do të rifillojë procesin e pasurimit të uraniumit me kapacitet të plotë dhe do t'u japë fund inspektimeve të Agjensisë.

Ai gjithashtu ka thënë se raportimi në Këshillin e Sigurimit do të zhdukë çdo mundësi për arritjen e një marrëveshje kompromisi të propozuar nga Rusia.