Hogganaan waraana Yukireen erga mannisaa sakkata'ameen booda aangoo gadhiisan

Haguuggii Tamsaasa Kallattii

1. 28 Sadaasa 2025Balaa ibidda Hoong Koongitti yoo xiqqaate namoota 128 galaafateen namoonni 8 dabalataan to'ataman

   

   Madda suuraa, Reuters

   Balaa ibidda hamaa gamoolee olka'oo hedduu Hoong Koong keessatti mudateen hanga ammaatti yoo xiqqaate namoonni 128 du'uun isaanii beekameera.

   Hojii haaromsaa gamooiwwan kunneen osoo balaa ibiddaa kanaan hin barbadaa'iin dura ittiin haaromfamaa turan irratti malaammaltummaadhaan shakkamuun namoonni saddeet to'annoo jala oolaniiru.

   Namoonni biroo sadii ammoo kanaan dura himannaa ajjeechaa hamaatiin to'annoo jala oolaniiru.

   Sababni ka'umsa ibiddaa kanaa ammallee ifa miti, qondaaltonni ammoo meeshaalee poolistaayirinii fi toora ittisaa foddaa alaa irratti kaa'ame babal'ina isaaf haala mijeesse jedhu.

   Balaa ibidda kanaan namoonni 79 dabalataan kan madaa'an yoo ta'u, waggoota 70 oliif balaan kunis isa magaalattii keessatti lubbuu namaa baayyee galaafateedha. Namoonni hedduun ammallee achi buuteen isaanii hin baramne.

   Erga qondaaltonni torban sadii hanga afur itti aanan keessatti qorannoon akka gaggeeffamu himanii booda poolisiin ragaa walitti qabuu jalqabuuf gamoolee gubatan keessa seeneera.

   Komishiniin Walaba Malaammaltummaa (ICAC) akka jedhetti, kanneen qorannoo malaammaltummaatiin gaafa Jimaata darbe gaggeeffameen to'annoo jala oolanis daayreektaroota dhaabbata injinariingii fi kontiraaktaroota xiqqaa iskaafooldii kan dabalatuudha.

2. 28 Sadaasa 2025Hogganaan waraana Yukireen erga mannisaa sakkata'ameen booda aangoo gadhiisan

   

   Madda suuraa, Reuters

   Pirezidantiin Yukireen Volodmiir Zeleniskiin erga manni hogganaa waraana biyyattii, Andrii Yermaak, garee farra malaammaltummaatiin sakka'ameen booda aangoo gadhiisuu isaanii beeksiisan.

   Yermaak, namni maqaa gaariifi dhiibbaa siyaasaa guddaa qaban, waraana guutuu Raashiyaa keessatti gorsaa dhiyoo Zelensikii ta'un hajjataa turan.

   Haata'u malee, badii kamiinuu adda himatamuu baatus, salphina hammaataa dhufeen dhiibbaa irratti dabalaa dhufeera.

   Zelensikiin dhiheenya kana, pirezidantiin Ameerikaa Doonaald Tiraamp waraana Raashiyaa fi Yukireen xumuruuf sochii haaraa geggeessaa jiran keessatti, marii murteessaa akka hoogganu muudaniin ture.

   Zeleniskiin waajjira pirezidantii isaaniitiin alatti haasawa cimaa ummataaf taasisaniin, hawaasni tokkummaa akka qabaataniif waamicha dhiyeessan.

   Akkasi jechuunis akeekkachiisaniiru: "Waan hunda dhabuudhaaf saaxilamna: ofii keenyas, Yukireenis, egeree keenyas."

3. 28 Sadaasa 2025Kaasi'eedoo V Raayis 'Piriimer Liigii keessatti hunda caaluu?'

   

   Madda suuraa, Getty Images

   Taphattoonni sarara gidduu Arsenaal fi Chelsii- Dekilaan Raayis fi Mo'isees Kasi'eedoo bara kana akkaan leellifamaa jiru.

   Leenjisaan Chelsii Enzoo Maareskaa taphattoonni kunneen Piriimer Liigii keessatti hunda caalaa filatamoodha jettee yaaddaa jedhamee gaafatamee akkas jedhe:

   Piriimer Liigiin taphattoota ciccimoo hedduu qaba, taphattoota sarara gidduu baayyeema gaarii ta'an qaba.

   Moo'i jira, Dekilaan jira, akkasumas Roodiriin, Andersan, [Buruunoo] Gumereesh -kaasuun waan danda'amuuf Liigichi taphattoota sarara gidduu gaggaariin guutameera.

   Tapha Dilbata dhufuurratti morkiin isaan gidduutti ta'aa kan jedhuuf: "Qaama dorgommichaa guddaadha, garuu isaan qofammoo miti. Taphichi 11 V 11 ta'ee warra eeggatanirraas ni ta'a. Kanaaf, kan isaanii qaama dorgommii qaama tokkooti.

4. 28 Sadaasa 2025Dekilaan Raayis bara dhufu Ballon d'Or mo'ataa?

   

   Madda suuraa, Getty Images

   Leenjisaan Arsenaal Mikeel Arteettaan taphataa sarara gidduu kilabichaa Dekilaan Raayis yeroo ammaa gahumsa gaariirra jiru bara dhufu Ballon d'Or mo'ataa jedhamee gaafatameera.

   Akks jechuun deebise Arteettaan: "[Ni mo'ata] jedheen abdadha, sana jechuun ammoo nuti hedduu mo'anne jechuudha. Inni jalqaba bara kanaarraa kaasee baayyee cimeera. Inni nuuf taphataa ajaa'ibaafi murteessaadha."

   Darbii Landan Chelsiifi Arsenaal walitti fidu dabalatee Piriimer Liigii torban 13ffaan eenyu mirgaan gala?

5. 28 Sadaasa 2025Abbootiin qabeenyaa dhaabota beetingii ispoortii birrii biiliyoona 100 ol miliqsan to'ataman

   

   Madda suuraa, SM

   Abbootiin qabeenyaa qotinyaa(betting) ispoortii maallaqa olaanaa miliqsan jedhaman qooda fudhattoota kaan waliin to'annoo jala ooluu Tajaajilli Tikaafi Nageenyaa Biyyaalessaa beeksiseera.

   Akka dhaabbatichi jedhetti, namooti dhuunfaa kunneen birrii biiliyoona 100 ol miliqsuun shakkamaniiti to'ataman.

   Tarkaanfii dhaabbati kuni fudhateen abbootiin qabeenyaa 24 dhaabbota qotinyaa ispoortii irratti bobba'an qabamaniiru.

   Dhaaboti qotinyaa ispoortii kunneen tajaajilota faayinaansii dijitaalaa biyya keessaa fayyadamuun qarshii kana miliqsaa tura jedhameera.

   Sirnooti kaffaltii fiinteek fi agriiteek jedhaman Baankii Biyyaalessaa Itoophiyaa irraa eeyyama fudhataniitu socho'u.

   Dhaaboti kunneen sababa ''icciitii maamilaa eeguu'' jedhuun dhaabota qotinyaa kunneen qarshiin sochoosan dhaabota mootummaa dhimmi ilaallaturraa dhoksaniiru ykn xiqqeessanii dhiyeessaniiru.

   Tajaajilli Tikaafi Nageenyaa Biyyaalessaa sababa kanaan dhaabonni beetingii ispoortii ''gibira waliin dhahuu akkasumas qabeenya biyyaa olaanaa tahe gara biyya alaatti miliqsuu keessatti hirmaannaa qabu,'' jechuun akeekeera.

   Dhaabonni beetingii ispoortii adeemsa waliigaltee mootummaa wajjin taasisaniin hojjetaa hin jirre eeyyamni isaanii akka haqames dhaabbatichi beeksiseera.

6. 28 Sadaasa 2025Loltonni Israa'el lammiilee Filisxeem harka kennan ajjeefte

   

   Madda suuraa, Getty Images

   Weest Baank keessatti humnooti nageenyaa lammiilee Filisxeem lama otoo harka kennaa jiran yeroo ajjeessan viidiyoon agarsiisu qoodamaa jira.

   Taateen kuni yeroo Israa'el magaalaa Jeeniin keessatti oppireeshinii waraanaa adeemsisaa jirtutti raawwate.

   Bulchinsi Filisxeem Israa'el yakka 'waraanaa' raawwataa jirti jechuun ajjeechaa kana 'suukaneessaa' jedheera.

   Waraanni Israa'el, akkasumas poolisiin namoonni kunneen ''kan garee shororkeessa waliin hidhata qabu'' barbaadamaa turaniiti jedhe.

   Taateen kuni qoratamaa jira.

7. 28 Sadaasa 2025Puutin marii US waliin Mooskootti taasisuuf ulaagaa guutamuu qaba jedhu baayyee cimse

   

   Madda suuraa, EPA

   Pirezidant Vilaadmiir Puutin waraana Yukireen keessatti gaggeessaa jiran dhaabuuf waan akka guutamu fedhu akkaan cimse.

   Raashiyaan kan waraana dhaabdu yoo loltoonni Yukireen daangaa Mooskoon qabatte keessaa bahan qofadha jedhe.

   Puutin lafa Raashiyaan daangaa Yukireen ceetee humnaan qabatte akka beekamtiin seeraa kennamuuf yeroo dheeraaf dhiibbaa taasisaa tureera.

   Lafti kunneen galoo galaanaa Kireemiyaa kibbaa, bara 2014 keessa qabatteefi naannoo Donbaas bahaa bakka gara caalu Mooskoon amma to'attee jirtu dabalata.

   Kutaa Donbaas amma qabattee jirtu dabarsitee kennuu kan hin barbaadne Kiiv, kana gochuun biyya weerara bante Raashiyaaf kennaa kennuun kan hin yaadamnedha jetti.

   Pirezidantiin Yukireen Volodmiir Zeleniskiin dubbii Puutin dhageessise kana booda yaada kenneen, Raashiyaan "carraaqqii" dhugaatti waraana kana dhabuuf taasifamu akka "aariin" gufatu gochaa jirti jedheera.

   Ejjennoo Puutin hin sochoone duuba maaltu jira?

8. 28 Sadaasa 2025Bulchiinsi Tiraamp lammiilee biyya 19 'Giriin Kaard' argatanii deebisee qorachuuf

   

   Madda suuraa, Getty Images

   Bulchiinsi Tiraamp namoota biyyoota 19 irraa gara Ameerikaa deemuun 'giriin kaardii' argatan deebisee ilaaluuf tahuu ibse.

   Hogganaan Tajaajila Lammummaafi Godaansaa Jooseef Edloow pireezidantichi ''giriin kaardiin namoota biyyoota 'nu yaaddeessu' jedhamanirraa godaananii bal'inaan irra deebiin ilaalamuu qaba,'' jechuun na ajajaniiru jedhe.

   Giriin kaardii biyyoota kamiitu irra deebiin ilaalamuuf tarree keessa gale jedhee BBC'n dhabbata Tajaajila Lammummaafi Godaansaa gaafatee ture. Dhaabbatichi labsii Waxabajjii darbe Waayit Haawus baase eeruun Afgaanistaan, Kiyuubaa, Heeytii, Iraan, Somaaliyaa fi Veenixuweelaan faa' keessa jiru jedhe.

   Murtoon kuni kan darbe gaafa Roobii Waashingitan DC'tti lammiin Afgaanistaan loltoota National Guard'tti dhukaasuun booda dha.

   Shakkamaan Raaahmaanullaah Laakaanwaal jedhamu bara 2021 ture gara Ameerikaa kan deeme, kunis yeroo Ameerikaan Afgaanistaanii baate sagantaa lammiilee biyyattiif eegumsa kennu dhiyeessiteen achi gale.

   Biyyoonni ammatti ibsaman isaan kami?

9. 28 Sadaasa 2025Loltoota US Waayita Hawus cinaatti itti dhukaafame lamaan keessaa tokko boqotte

   

   Madda suuraa, Sarah Beckstrom

   Loltoota Ittisa Biyyaa US lama Waashingiten DC ollaa Waayita Hawusitti Roobii darbe rasaasaan rukkutaman laaan keessaa tokko lubbuun ishee darbuu pirezidantiin US Doonaald Tiraamp himan.

   Shamarree waggaa 20 kan taate Saaraah Beekistoorm madaa rukkutamuun ishee mudateen akka duute Tiraamp Kamisa dubbataniiru.

   Loltuun lamaffaa Andiriiwu Woolf jedhamu umuriin isaa waggaa 24 ta'e ammoo ammallee madaa'uu hamaa isa mudateen "du'aafi jireenya gidduu jira".

   Loltoota kanneen lamaanitti gaafa Roobii addabaabaayii Faraguut magaalaa walakaa jirutti dhiyeenyarraa itti dhukaafame.

   Poolisiin dhukaasa kanaaf shakkamaa maqaa isaa Rahaamaanullaah Lakanwal jedhamu umuriin isaa waggaa 29 ta'e Afgaanistaanirraa dhufe to'ateera.

10. 28 Sadaasa 2025Balaa abiddaa Hong Koongiin namoonni 128 du'an

    

    Madda suuraa, EPA

    Balaa abiddaa gamoowwan gurguddoo Hong Koongitti qabateen yoo xiqqaate namoonni 128 du’anii 76 madaa’aniiru.

    Balaan abiddaa gamoo gurguddoo saddeeti walitti qabatee jiru keessaa torba mancaase kun amma “waan to’atame fakkaata” akka bulchaan Hong Koong jedhanitti.

    Balaa kana ilaalchisee waan hanga ammaatti beeknu kunooti:

    • Balaan lubbuu baayyee galaafate kun erga mudatee guyyaa tokkoon boodallee namoonni dhibbaan lakkaa'aman bakki isaan jiran hin baramiin jira.

    • A Saaphanni sadarkaa isaan hin eegganneefi maraan pilaastikaa foddaa gamoowwaniirra ture abiddi kun akka saffisaan babal'atu gochuu aanga'oonni dubbataniiru

    • Namoota gamoowwan haareffamaa jiran kana gaggeessaa jiran sadii erga to'atamanii booda qorannoon malaammaltummaa jalqabameera.

    • Jiraattonni baayyeen gaaffii gaafatamaniin sagaleen balaan dhufuu akeekkachiiftu yeroo abiddi dhaatetti hin hojjetu jedhan

    • Qajeelchi ittisa balaa abiddaa hojjetoonni jiraattota baraaruudhaaf wayita yaalanitti rakkoon isaan mudachuu ibseera, kan ammoo sababa qileens aho'aafi gamoon gubatee jijjigaa waan tureefidha

    • Namoonni dhibbaan lakkaa'aman yeroodhaaf akka baqatanii bakka adda baafame kan qubsiifaman yoo ta'u, manni yeroof keessa jiraatanis kennameeraaf

    • Balaan abiddaa kun seenaa Hong Koong waggaa 80 keessatti isa hamaa lubbuu galaafate ta'ee galmaa'eera. Kun ammoo balaa abiddaa bara 1962 konyaa Shaam Shu'ii Poo keessatti mudatee namoota 4 galaafate caaleera.

11. 28 Sadaasa 2025ASHAMAA?

    Akkam jitu hordoftoota BBC Afaan Oromoo?

    Toora tamsaasa kallattiin odeeffannoo wayitaawaa ta'e ittiin isin biraan geenyu jalqabneerra.

    Nu hordofaa.

    Galatoomaa!