Koloneelli Faannoo hoogganan 'araara buusan'

Haguuggii Tamsaasa Kallattii

1. 11 Amajjii 2026MM Abiy Ahmad daawwannaaf Jibuutii seenan

   

   Madda suuraa, Abiy Ahmed Ali/FB

   Ministirri Muummee Itoophiyaa Abiy Ahmad daawwannaa hojiif Jibuutii seenaniiru.

   MM Abiy wayita Jibuutii seenan Pirezidantiin biyyattii akka gaariitti simachuu miidiyaa hawaasummaa isaaniirratti ibsaniiru.

   Akkasumas mariin isaan Pirezidant Ismaa'el Omaar Giilee waliin taasisan dhimmoota Ji'oopolitiikaa irratti akka xiyyeeffatu ibsaniiru MM Abiy.

   Keessattuu dhimmoota akka nageenya naannawa kanaa, tasgabbii akkasumas hariiroo qindaawaa biyyoota lameenii cimsuu irratti akka xiyyeeffatan ibsan.

   MM Abiy kun ''nagaa fi tasgabbii, hariiroo diinagdee fi badhaadhina waloo irratti ejjannoo qabnu kan mul'isudha,'' jedhan.

   Israa'el Somaalilaandiif beekamtii kennuu booda biyyoota ollaa Somaaliyaa tarkaanfii kana morman keessaa Jibuutiin tokko.

   Itoophiyaan garuu hanga yoonaa murtee Israa'el kanarratti homaa hin jenne.

   MM Abiy dhihoo kana wayita Korporeeshinii Daandii Baaburaa Itiyoo-Jibuutii daawwatan ''daandiin baaburaa guddina Itoophiyaan karoorfattee jirtuuf murteessaadha,'' jedhanii turan.

2. 11 Amajjii 2026Ameerikaan Sooriyaa keessatti haleellaa raawwachuu ibsite

   

   Madda suuraa, AFP via Getty Images

   US michuuwwan ishee waliin qindaa'uun haleellaa cimaa Sooriyaa keessatti raawwachuu ibsite.

   Ajaji Giddugalaa (Central Command) US akka ibsite xiyyeeffannaan haleellaa kanaa dawoo IS ture.

   Pirezidantiin US Doonaald Tiraamp ajaja haleellaa kana kan dabarsan Sambata kaleessaa (Amajjii 10, 2026) ture.

   Ajaji kun qaama duula Operation Hawkeye Strike jedhamuuti. Kana jechuun haleellaa hamaa Mudde 13 IS loltoota US Sooriyaa jiran irratti raawwate haaloo ba'uuf oppireeshinii gaggeeffamuudha.

   Ajaji Giddugaleessaa US haleellaan kun tattaaffii shororkeessummaa dura dhaabbachuu fi humnoota US fi michuuwwan naannawa sana keessa jiran baraaruuf raawwatame jedhe.

   Gabaasa dabalataa

3. 11 Amajjii 2026Awustiraaliyaatti balaan abiddaa lubbuu namaa galaafate, gamoowwan 300 barbadeesse

   

   Madda suuraa, Reuters

   Balaan abiddaa bosonaa kibba baha Awustiraaliyaatti mudate babal'achuun gamoowwan 300 barbadeesse.

   Gamoowwan kunneen keessaa hedduun manneen jireenyaati.

   Balaa kanaan lubbuun nama tokkoo darbuutu ibsame.

   Balaan kun guyyoota hedduuf kutaalee kibba baha Awustiraaliyaa keessatti babal'achuun amma sadarkaa kanarra ga'e.

   Keessattuu bulchuunsota akka Viktooriyaa fi Weelsi baayyee miidhe.

   Lafa dachaa bal'ina magaalaa Landan ta'u gubeera. Hektaara kuma 350 jechuudha.

   Sababa kanatti bulchiinsa Viktooriyaatti labsiin yeroo muddamaa labsameera.

   Hojjettoonni balaa abiddaa kumaatamaan lakkaa'aman fi xiyyaaronni abidda dhaamsan 70 ta'an ramadamaniiru.

   Haala qilleensaa ho'aa kana keessatti abiddi kun torbanootaaf itti fufuu akka danda'u aanga'oonni yaaddoo qaban ibsaniiru.

   

   Madda suuraa, AAP/Michael Currie via REUTERS

4. 11 Amajjii 2026Iraan haleellaa USf deebii akka kennitu akeekkachiifte, Israa'el giddu-seentummaa US eegaa jirti

   

   Hiriira mormii gara hookkaraatti jijjiirameen jeeqamaa kan jirtu Iraan, haleellaa Ameerikaan raawwattu kamiifuu deebii hatattamaa akka kennitu dhaadatte.

   Dubbi himaan paarlaamaa biyyattii Mohammad Baqar Qaliibaf ‘’haleellaan Iraan irratti raawwatu kamiyyuu buufataaleen waraanaa US fi Israa’el naannawa kana (Baha Giddugaleessaa) keessa jiran akka haleelamaniif karaa saaqa,’’ jechuun paarlaamaatti himan.

   Iraan wayita haala kanaan akeekkachiisa Pirezidant Doonaald Tiraampiif deebii kennitu mormiin biyyattiitti hammaateera.

   Tiraamp fi Ministira dhimma US Maarkoo Ruubiyoo dabalatee qondaalonni US mormii lammiileen Iraan gaggeessaa jiran akka deeggaran ibsaniiru.

   Inumaa Tiraamp ammoo aanga’oonni Iraan yoo humna fayyadaman tarkaanfii akka fudhatu akeekkachiiseera.

   Israa’el gamasheen, US hiriira mormii guutummaa Iraan keessatti gaggeeffamaa jiru kana keessa seenuun lammiilee hiriira gaggeessaa jiran ni tumsiti shakkii jedhuun, qophaa’inaan eegaa jirti.

   Rooyitarsi maddeen dhimma kana itti dhiheenyaan hordofan wabeeffachuun akka gabaasetti Israa’el giddu-seentummaa Ameerikaa qophiidhaan eegaa jirti.

   Erga hiriirri mormii kun Iraan keessatti eegalee Pirezidant Tiraamp gidduu seenuuf dhaadataa jira.

   Inumaa aanga’oonni yoo humnaan hiriirtota cabsuu eegalan US ‘’gidduu seentee uummata gargaaruuf’’ qophiidha jedhan.

   Israa’elii fi Iraan Waxabajjii darbe guyyoota 12f wal haleelaa turan. Yeroo sanas US gara Israa’el goruun Iraan haleelaa turte.

   Sambata kaleessaa Ministirri dhimma alaa US Maarkoo Ruubiyoo Ministira Muummee Israa’el Beenjaamiin Neetaaniyaahuu waliin dhimma Iraan irratti bilbilaan dubbataniiru.

   Maddi Israa’el haasaa qondaalota kunneen keessatti hirmaate US dhimma Iraan keessa seenuu akka dandeessu irratti mari’achuu Rooyitarsitti hime.

5. 11 Amajjii 2026Pirezidaant Abdel Fattah Elsisi eenyu?

   

   Madda suuraa, AFP

   Jeneraala waraanaa yeroo turetti hogganaa aangoo guddaatti isaan fide fonqolchuun pireezidaantii aangoo humnaan qabachuun waggoota 12 ta'uuf Masrii bulchaa jiraniidha.

   Dhimmootni falmisiisoon pirezdaantichi ittin beekaman hedduudha.

   Atakaroo Masrii fi Itoophiyaan waggoota kurna darbe taasisaan keessatti nama adda durummaan maqaan isaa ka'uudha.

   Magaalaa durii naannawa Kaayirootti argamtu kan hambaa durii turistootnii hedduun dawwachuuf achi yaa'aan 'Gamaleya' jedhamutti Sadaasa 9, 1954tti dhalate

   Ijoollee 14 abban isaa horatan keessaa mucaa 2ffaadha.

   Ofii maaliin beekama?

6. 11 Amajjii 2026Mormii Miniyaapolisitti dhalateen poolisiin madaaye, namootni hidhaman

   

   Madda suuraa, Getty Images

   Dubartiin qaamolee seera Immigireeshinii kabachiisanii itti dhukaafamee du'uushee booda mormii dhalateen Poolisiirra miidhaan gaheera, Namootni 29 ta'anis to'atamaniiru.

   Poolisiin tokko cabbiin itti darbatamee miidhameera jedhame. Mormiin kun Jimaata galgala gaggeeffame.

   Kutaalee US hedduu keessatti mormiin farra raawwii seera immigireeshinii kun kan eegale dubartiin ganna 37 konkolaataa shee keessatti qaamolee seera immigireeshiniin raawwachiisaniin itti dhukaafamee booda du'uusheerraa kan ka'eedha.

   Dubartii Renee Nicole Good jedhamtutti kan dhukaafame Roobii darbe ture.

   Bulchiinsi Tiraamp qondaalli dubartii kanatti kan dhukaase tarkaanfii ittisaa fudhateeni jedheera. Aanga'oonni naannoommoo dubartiin kun hammeenya hin qabdu jedhan.

7. 11 Amajjii 2026Akkam jirtu

   Tamsaasa kallattii eegalleerra. Taateewwan biyya keessaa fi biyya alaa asiin isin biraan geenya.

   Mormii Iraan, hiriira US fi dhimmoota Baha Giddugaleessaa keessatti raawwatan gaggabaabsinee karaa kanaan isin biraan geenya.

   Nu hordofaa!

   Tamsaasa kallattii kanaan duraa asii argattu.