Kaaba Maqdooniyaatti abidda mana shubbisaa halkaniitti mudateen 59 du'an

Haguuggii Tamsaasa Kallattii

1. 16 Bitooteessa 2025Namoonni 59 mana shubbisaa halkaniitti balaa abiddaan dhuman

   

   Madda suuraa, Social media

   Qondaalonni Kaaba Maqdooniyaa akka jedhanitti balaa abiddaa kanaan yoo xiqqaate namoonni 59 du'uun alatti 155 kan caalan miidhamaniiru.

   Balaan kun mana shubbisaa Pulse club kan Kokaanii keessatti argamutti halkan qixxee mudate.

   Iddoon kun magaalaa guddoo biyyattii Skopje irraa kiilomeetira 100 fagaata.

   Wayita balaan abiddaa mudatu namoonni 1,500 ta'an sagantaa konsartii weellistoota lamaan baandii DNK jalatti dhihaate irratti hirmaachuun bashannanaa turan.

   Balaan kun agarsiisa dhukaasa abidda baasu (fire work) bal'inaan turerraa akka mudate miidiyaan biyya keessaa gabaaseera.

   Wayita laboobni abiddaa waltajjiirraa agarsiifamaa ture akka malee hammaachuun baaxii manaatti qabatu viidiyoo fi suuraan mul'isaniiru.

   Sababa kanaan namoonni to'ataman jiraachuu ministirri dhimma biyya keessaa Pance Toskovski himan.

   Ministirri Muummee biyyattii Hristijan Mickoski ''mootummaan humna qabu hundaan waan danda'u hojjechaa akka jiruu fi sababa balaa kanaa fi miidhaa qaqqabe hatattamaan akka adda baasu,'' Facebook isaaniirratti ibsan.

   Taateen kun baayyee hamaa fi guyyaa gaddaa kan dargaggoota biyyattii hedduu galaafateedha jechuun ibsan.

   Namoonni 90 ta'an abiddaan gubatanii hospitaala Kokaanii keessatti yaalamaa jiru.

   Hedduunsaanii qaamnisaanii guddoo gubatee du'aa fi jireenya gidduu jiru.

   Kanneen gubatan kaan gara hospitaala Skopje keessa jiruutti dabarfamaniiru.

   

   Madda suuraa, Reuters

2. 16 Bitooteessa 2025Balaa Tiraafikaa Walaayittaatti mudateen lubbuun namoota 15 darbe

   

   Madda suuraa, FBC

   Balaa Tiraafikaa Godina Walaayittaa Aanaa Daamoot Wayideetti mudateen lubbuun namoota 15 darbuu fi namoota 27 irraa miidhaan qaqqabuun Miidiyaaleen biyya keessaa gabaasaniiru

   Balaan kun kaleessa galgala kan qaqqabe yoo ta'u konkolaataan geejjiba uummataa namoota 46 fe'ee ture rakkoo tekinikaa isa muudateen Fireenii kutee garagaluudhani

   Namoota achi keessa turan keessaa 5 miidhaan omaatu irra hin geenye

   Namootni miidhaan irra ga'e Hospitaala Ootoonaatti wal'aansi taasiifamaafii jiraachuu himameera.

3. 16 Bitooteessa 2025Itoophiyaan sagantaa Ifxaaraa fi dorgommii Qur'aanaa guddicha har'a gaggeessiti

   

   Madda suuraa, FBC

   Manni Maree dhimmoota Islaamummaa bulchiinsa magaalaa Finfinnee akka ibsetti sagantaan Ifxaaraa fi dorgommii Qur'aanaa Dilbata har'aa adda babayii Masqalaatti gaggeeffama.

   Calalliin dorgommii Qur'aanaa mata duree ''Qur'aana- madda beekumsaa fi nageenyaa,'' jedhuun gaggeeffamaa tureera.

   Kaayyoon dorgommii kanaa dargaggoonni qur'aana guutuu qalbiisaaniitti qabatan (haafizoonni) akka heddummaatan fi dhaloonni itti aanus kana akka faana bu'u gochuudha jedhe manni maree kun.

   Dorgommiin xumuraa ammoo har'a adda babayii Masqalaatti gaggeeffama akka ibsa mana marechaatti.

   Sagantaa Ifxaaraas mata duree ''Ifxaaraa hanga Qur'aanaa'' jedhuun ni gaggeeffama.

   Poolisiin magaalaa Finfinnee sagantaa kanaan walqabatee daandiiwwan cufaman akka jiran ibseera.

4. 16 Bitooteessa 2025Kutaa Kibba Ameerikaatti bubbee hamaa rooba makateen 34 ol du'an

   

   Madda suuraa, Missouri State Trooper

   Bubbee hamaan kun konkolaattotaa fi manneen hedduu mancaaseera. Balaa kutaalee US kallattii kibba-bahaan jiran keessatti mudate kanaan yoo xiqqaate namoonni 34 kan du'an yoo ta'u, bulchiinsa Misuurii keessatti qofa namoonni 12 du'aniiru.

   Balaa kanaan Kansas keessatti yoo xiqqaate namoonni saddeet du'aniiru, bubbeen kun konkolaattota 55 walitti buuse.

   Sababa bubbee hamaa kanaa bulchiinsota akka Michigaan, Misuurii fi Ilinois keessatti manneen fi gamoowwan 250,000 caalan irraa ibsaan citeera.

   Naannawa kunneen keessatti ammas bubbee hamaan akka mudatu eegama.

   Bulchiinsota akka Louisinana, lixa Jorjiyaa, giddugala Tennessee fi lixa Filooriidaattis balaan kun ni mudata jedhamee eegama.

   Giddugala Mississipi, lixa Louisiana fi lixa Tennessee akkasumas kutaalee Alabama fi Arkansas garii keessatti lolaa hamaan akka mudate akeekkachiisi kennameera.

   Tajaajilli Raaga haala qilleensaa Biyyaalessaa (NWS) lolaan uumamu akkaan balaafamaa akka ta'u akeekkachiise.

   Bara 2024 balaa bubbee hamaan (obomboleettii hamaan) qaqqabsiiseen namoonni 54 du'aniiru.

   Teeksaasitti namoonni sagal, Oklahoma keessatti saddeet, Arkansas keessatti shan fi Misuurii keessatti tokko kanneen du'an keessaati.

   US keessatti waqtiin bubbeen kun akkaan hammaatu Caamsaa fi Waxabajjii keessa.

   Garuu ogeeyyiin raaga haala qilleensaa yeroo kamiyyuu bubbee hamaan rooba makate uumamuu akka danda'u akeekkachiisaniiru.

5. 16 Bitooteessa 2025Yooyyaa!

   Tamsaasa kallattii eegalleerra. Odeessaalee biyya keessaa fi alaa akkuma mudataniin hordofnee karaa kana isiniif dhiheessina.

   Nu hordofaa!

   Bakka nagaa oolaa!

6. 15 Bitooteessa 2025Kaayyoon kora kanaa nageenya Yukireen mirkaneessuurratti US amansiisuudha

   

   Madda suuraa, Getty Images

   Pirezidantiin Yukireen Volodmiir Zeleniskiin walga'uu hoggantoonni Awurooppaa,Awusteraaliyaafi Kanaadaa Landanitti gaggeessaa jiran kanarraa watota lama eeggachaa jira.

   Inni jalqabaa, gaffii yeroo gabaabaaf hatattamaan dhukaasa dhaabuudha- waliigalteen kun yoo hojiitti hiikame hordoffiifi mirkaneessuu keessatti warri Awurooppaa gargaarsa dabalataa akkamii akka kennan ilaallata.

   Yukireen samiifi galaana to'atachuudhaaf humna akka qabdu ifa gooteetti garuu gama adda waraanaa bahaatiin gargaarsa barbaaddi. Kun ammoo Ameerikaarraa osoo hin taane Awurooppaarraati.

   Inni lamaffaan, gaaffii haala egeree waraanaan booda jiru yoo waliigalteen dheeraa uumamedha.

   Yukireen humnni wabii nageenyaa mirkaneessuuf maal akka fakkaatu, miseensota hangamitu garee fedhiin hundeeffamu keessa jiraata, humna akkamiimmoo dhiyeessuu danda'u kanneen jedhanidha.

   Qabxiin murteessan humni kun hanga danda'ametti guddaa ta'ee Ameerikaa kan amansiisu ta'uu qaba. Sababiin isaa ammoo US yeroo ammaa kana gargaarsa qilleensarraa kennuurraa duubbatti jechaa jirti.

   Kanaaf, kaayyoon kora har'aa kun Awurooppaan yaada qaban hunda dhiyeessuun Ameerikaan wabii nageenyaa egeree Yukireeniif mirkanaa'uu qaburratti amansiisuudha.

7. 15 Bitooteessa 2025Puutin waliigaltee dhukaasa dhabuun taphachaa jira-MM UK

   

   Madda suuraa, Reuters

   Ministirri Muummee UK Kiir Istaarmar Vladimir Puutin “nagaa irratti dhimma hin qabu” jechuun akeekkachiisan.

   Jechiisaa kun walgahii toora interneetiirratti hoggantoonni Awurooppaa 25 har'a waa'ee Yukireen irratti mari'achuuf taasisan dursee kan dhaga'amedha.

   Puutin yaada dhukaasa dhaabuu Tiraamp dhiheesse “akka itti taphatu” hayyamamuu hin qabu jedha Istaarmar. Dabalatanis, biyyoonni kaan Yukireeniif wabii nageenyaa akka dhiyeessan gaafate.

   Jalqaba Bitootessa hoggantoonni Awurooppaa kan Ministirri Muummee kun “tumsa fedhiin taasifamurratti" Landanitti walga’uun waa'ee Yukireen haasa'aan.

   Ergasii yaada guyyoota 30f dhukaasa dhaabuu dabalatee wantoota gurguddoo hedduutu mul'ateera.

   Yaadni kun Zeleniskiin deeggaramee ture garuu ammallee Puutiniin hin raggaasifamne.

   "Kireemiliin yaada prezidaant Tiraamp guutummaatti tuffachuun isaa Puutin nagaarraa dhimma akka hin qabne agarsiisa," jedha Istaamaar.

   Yeroo ammaa kana wal dhabdeen jiraatus, prezidaantiin Ameerikaa Doonaald Tiraamp Kamisa darbe Puutin waliin marii ''gaariifi bu'a qabeessa'' taasisuu himan.

   Jalqaba torban kanaa Vilaadmiir Puutin yaada dhukaasa dhaabuurratti waliigaluu isaanii ibsan. Garuu haallii araara kana maal akka ta’u ratti gaaffiin jiraachuu ibsa gaazexeessitootaaf kennaniin dubbataniiru.

   "Yoo Raashiyaan dhuma irratti gara maritti dhufte, egaa nagaa cimaa fi waaraa ta'uu isaa mirkaneessuuf dhukaasa dhaabuu hordofuuf qophii ta'uu qabna," jedha Istaamar.

   "Yoo isaan didan ammoo, waraana kana dhaabuuf dhiibbaa dinagdee Raashiyaa irratti akka cimsuu qabna.”

8. 14 Bitooteessa 2025Loltoonni Yukireen kumaatamni Raashiyaan marfamanii du'a eeggataa jiru- Tiraamp

   

   Madda suuraa, Reuters

   Loltoonni Yukireen kuma heddu ta'an loloota Raashiyaan marfamanii haala rakkisaa keessa jiraachuu pirezidaantiin US Doonald Tiraamp ibsan.

   Tiraamp kana kan jedhan dhimma marii USfi Raashiyaa gidduutti taasifame ilaalchisee yeroo yaada kennanitti.

   Qondaalli olaanan US kaleessa Mooskitti Raashiyaa waliin mariyachuu hordofee, lamaansaanii gidduu "marii gaariifi bu'a qabeessatu ture" kan jedhan Tiraamp haala loltoonni Yukireen keessa jiranis ibsan.

   Loltoonni Yukireen kumaan lakkaa'aman loltoota Raashiyaan "guutumaan guututti marfamaniiru, haala baay'ee raakkisaafi isaan saaxilu" keessa jiru jechuun fuula miidiyaa hawaasaa dhuunfaasaanii Truth jedhamurratti barreessan.

   Loltoonni Yukireen marfamanii jiran kun "lubbuunsaanii akka ooluf" Pirezidaant Puutin "gaafadheera" jechuun, hin ta'u taanan "erga Waraana Addunyaa Lammaffaa booda bifa argamee hin beekamneen dhumaatii qaqqabuu maluudha" jedhan Traamp.

   Yukireen garuu dubbii Tiraamp kana dhara jette.

   Biiroon Ajajaa Waliigala Humna Warana Yukireen ibsa baasen, loltoonni Yukireen marfamanii yaadoo keessa galan hin jiran jedhe.

9. 14 Bitooteessa 2025Raashiyaafi Yukireen waliigaltee dhukaasa dhaabuu mallatteessuu qabu- Tiraamp

   

   Madda suuraa, Getty Images

   Yaada dhukaasa dhaabuu guyya 30f turu kan dhiyeessan Tiraamp waliigalteen kun osoo hin turin hojiitti hiikamuu qaba jedhan.

   Yaada waliigaltichaa Yukireen dursitee fudhattus Raashiyaan ammayyuu dubbii afaan keessa qabataa jirti.

   Guyyaa 30 osoo hin taane, waliigaltichi akkaataa guutummaan waraanni dhaabbatuun ta'uu qaba jetti Raashiyaan.

   Sodaanshee ammoo Yukireen guyyoota kana keessatti deebitee of ijaarufi humnashee jalaa miidhame bakka buufachuufi kan jedhuudha.

   Doonaald Tiraamp garuu waraanni kun duraanuu kan ta'uu hin malleefi Raashiyaa waliin "tirgaa" akka taphachuu ta'uu eerun hatattamaan hojiitti akka hiikamu gaafatan.

   Barreeffama miidiyaa hawaasaa isaanii Truth jedhamurratti barreessaniin, "Namoonni miliyeenan lakkaa'aman akkasumaan du'aniiru, kuni irra deebin ta'uu hin qabu. Raashiyaan waliigalticha hatattamaan hin mallatteessitu taanan namoonni kana caalan yeroo du'an arguuf jirra" jedhan Tiraamp.

   Dabaluunis, "Osoon pirezidaantii turee waraanni kun tasumaa hin eegalu ture" jechuun bulchiinsa Baayidan isaan dura turetti quba qaban.

10. 14 Bitooteessa 2025Gaaggeessaan Sooriyaa haaraan heera biyyattii waggaa shaniif tajaajilu mallatteesse

    

    Madda suuraa, Reuters

    Bulchiinsa Asaad Al-Bashiir kaasun ji'oota dura aangoo kan qabate pirezidaantin yeroo cehuumsaa Sooriyaa heera biyyattii haaraa mallatteesse.

    Ahmad al-Shaaran heera yeroo cehuumsaa kan jedhe kana ifa gochuun mallatteesse. Heera haaraa kana keessatti "amantiin pirezidaantii biyyaattii amantii Islaaamati" jedha.

    Dabaluunis bu'uurri seera Sooriyaa duudhaalee amantii Islaamaa ta'uu akka qabus eera.

    Akkaataa heera haaraa waggaa shaniif tura jedhame kanaan sirni haqaafi aangoon siyaasaa garaa gara ta'u. Mirgi dubartootaa, mirgi bilisaan yaada ofii ibsachuufi mirgi walabummaa miidiyaas ni kabajama jedhame.

    "Hacuucaa haqaan bakka waan buusnuf seenaa Sooriyaa haaraa arguuf jirra," jedhe pirezidaantin yeroo cehuumsaa biyyattii Ahmad al-Shaaran.

11. 13 Bitooteessa 2025Amma nu gahe, Raashiyaan yaada dhukaasa dhaabuu dhiyaate fudhatte

    

    Raashiyaan yaada Yukireen waliin dhukaasa dhaabuun nagaa buusuuf dhiyaate fudhachuu ibsite. Haata'u malee, yaadni dhiyaate kun gara naagaa waara'aatti geessuu qaba jetteetti.

    Pirezidantiin Raashiyaa Vilaadmiir Puutin jalqabarratti xiyyeeffannaa "cimaa" dhimma Yukireen furuuf kennaniif Tiraamp galateeffateera.

    Yaada dhukaasa dhaabuu Raashiyaan akka fudhattu kan dubbate Puutin, garuu kan gara "nageenya waara'aatti" geessu ta'uu qaba jedheera.

    "Yaada dhukaasa dhaabuuf dhiyaate ni fudhanna, garuu kan gara nageenya waara'aatti geessuufi kan rakkoo kanaaf sababa ta'e bu'uurarraa maqsu ta'uu qaba," jedhe.

    Yukireen haala qabatamaa lafarra jirurraa kan ka'een Yukireen walga'uu kan akka yeroo ammaa kana Sa'ud Arabiyaatti gaggeeffama jiruutiif osoo walirraa hin kutiin gaafachuun akka isheerra ture amanuu dubbateera Puutin.

12. 13 Bitooteessa 2025Aayyoon waggoota 31 oliif qofaasaanii odola Haroo Dambalirra jiraachaa turan boqotan

    

    Odolawwan Haroon Dambal qabu keessaa isa xiqqaa kan ta’e Galiilaa irra waggoota 31 darban qofaasaanii jiraachaa kan turan Aadde Kushee Gondor du’an boqochuu maatiin BBCtti himan.

    Ilmisaanii Obbo Isheetuu Barreessaa akka jedhanitti, Aadde Kusheen Kibxata Galgala kan du'an yoo ta'u, Roobii sirni Awwaalchasaanii mana amantaa odola Galiilaa kanarratti argamutti raawwatame. Aaddee Kusheen Haroo Dambal, odola hawaasni bal’aan irra jiraatuufi Tulluu Guddoo jedhamuun beekamutti dhalatan.

    Umriisaanii waggaa 15tti gara odola Galiilaa jedhamu kanatti heerumanii ilmaan horatan.

    Duraan Odola Galiilaa kanarra namootni hedduun jiraachaa akka turaniifi yeroo Dargii Lafti kennamuuf jennaan namni hedduun lafa bishaaniin marfame kana gadhiisanii deeman.

    Aadde Kusheen garuu odola kana waan jaalataniif namootni dhiisanii deemanis qofaasaanii waggoota hedduuf jiraachaa turuu waggaa sadiin dura turtii BBC waliin taasisanirratti dubbatanii ture.

    Odola Galiilaa jedhamu kanarra waggoota 80f kan jiraatan yoo ta’u, kana keessaa waggaa 31 nama tokkolleen ollaas ta’e maatii of biraa osoo hin qabaatiin qofumasaanii lafa bishaaniin marfame kanarra jiraachaa turan.

    Aayyoo dargaggummaa hanga dullumaatti Oddoola Haroo Dambalirra qofaa jiraatan eenyu?

13. 13 Bitooteessa 2025Vilaadmiir Puutin adda waraanaa deemun daawwatan

    

    Madda suuraa, EPA-EFE/REX/Shutterstock

    Pirezidaantiin Raashiyaa Vilaadmiir Puutin daangaa kanaan dura loltoonni Yukireen qabatanii amma keessaa baafamaa jiranitti argamuun daawwannaa taasisan.

    Puutin yeroo daawwannaa taasisan huccuu waraanaa uffachuuni kan mul'atan.

    Kuni ammaa yaada waliigaltee dhukaasa dhaabuu guyyaa 30 US dhiyeessitee Yukireen fudhachuuf walii galte diduuf agarsiisufi kan jedhanii ija shakkiin laalanis jiru.

    Ji'oota torba dura Yukireen haleellaa tasaa banuun daangaa Raashiyaa bulchiinsa Kursk seenun lafa hamma tokko qabattee turte.

    Dhiyeenya kana Raashiyaan haleellaa banteen loltoota Yukireen duubatti deebisaa jirti.

    Puutinis kanuma hordofee guyyaa kaleessaa huccuu waraanaa uffachuun Kursk bakka loltoonni Yukireen keessaa baafaman daawwataniiru.

14. 12 Bitooteessa 2025'Baayidan diina ture, Tiraamp ammoo morkataa keenya'- gorsaa duraanii Putiin

    

    Madda suuraa, EPA

    US biyyoonni ollaa walii- Raashiyaa fi Yukireen, waraana waggoota sadan darbaniif gidduusaanii ture mariidhaan akka furatan yeroo jalqabaaf bulchiinsa Tiraamp jalatti tattaaffii gochuu eegalte.

    Biyyoonni lameen guyyoota 30f dhukaasa dhaabuurratti akka waliigalaniif marii Sa'uudii magaa Jiddaatti taa'amerratti Ameerikaan yaada dhiheessiteetti.

    Yaada kana Yukireen akka fudhattu ibsiteetti, Raashiyaan akka fudhattu hojjechuun ga'ee Ameerikaati.

    Warri Raashiyaa waa'ee waliigaltee kanaa yaada hin kennine. Garuu aanga'oonni mootummaa Raashiyaatti hidhata qaban yaada kennaa jiru.

    Seera baastota Raashiyaa keessaa tokko kan ta'an waliigalteen kun ulaagaa Raashiyaan feetuun ta'a malee akkaataa fedhii US qofaan waan raawwatu miti jedhan.

    Duraan Pirezidantii Raashiyaa Vilaadmiir Putiin gorsaa kan turan deeggaraa cimaan pirezidantichaa Sergee Markoov, wayita mariin dhimma Yukireen gaggeeffamaa jirutti hariiroon US fi Raashiyaa gidduu jiru hiika guddaa qaba jedhan.

    Markoov Raadiyoo BBC4 sagantaa Today Programme jedhamurratti hariioon Raahiyaa fi US bulchiinsa Baayidan fi Tiraamp jalatti guutummaatti adda adda jedhan.

    ''Baayidan diina ture, Tiraamp ammoo morkataadha,'' jedhan qondaalli duraanii Raashiyaa kun.

    Wiixineen waliigaltee dhukaasa dhaabuu Putiinitti ''mamii ykn shakkii'' uumeera kan jedhan qondaalli kun, uummanni Raashiyaa ''waraana waan hifateeruuf nagaa barbaada,'' jedhan.

15. 12 Bitooteessa 2025Raashiyaan waliigaltee dhukaasa dhaabuu irratti yaada kennuu dura US irraa ibsan eega jette

    

    Madda suuraa, Getty Images

    Dubbi himaan mootummaa Raashiyaa Dimitirii Peskoov marii US fi Yukireen ilaalchisee ibsa ba'aa jiran xiyyeeffannaan hordofaa jirra jedhan.

    ''Marii Jiddaa booda ibsa waloon kenname irratti hubannoo cimsataa jirra. Waan kaleessa Jiddaatti jedhamerraa itti fufna,'' jedhan.

    Mooskoon waa'ee wiixinee waliigaltee dhukaasa dhaabuu irratti maaliif akka yaada hin kennine wayita gaafataman, ''kun osoo Ameerikaarraa hin dhagahin waan goonu miti,'' jedhan.

    ''Ministirri haajaa alaa Maarkoo Ruubiyoo fi Gorsaan nageeya biyyaalessaa waltiz bal'ina marii JIddaa fi waan irratti wal ta'an nuuf ibsu jennee eegna,'' jedhan.

    ''Marii bilbilaan sadarkaa dureewwan biyyoota lamaanii [Putiin fi Tiraamp] gidduutti gaggeeffama jedhames hin haalle.'

    Waa'ee guyyoota 30f dhukaasa dhaabuurratti ''nuti adeemsa jirurra tarkaanfannee deemuu hin feenu. Jalqaba US irraa ibsa argachuu qabna,'' jedhan.

    Fuulduratti warra Ameerikaa waliin dubbachuuf sagantaan akka qabame kan ibsan qondaalli Raashiyaa kun, adeemsa kana keessatti odeeffannoo bal'aa arganna jedhan.

16. 12 Bitooteessa 2025'Tarkaanfii kana fudhachuuf qophiidha': Zelensky marii Ameerikaa fi Yukireen irratti dubbatan

    

    Madda suuraa, Ukrainian Presidency

    Pirezidantii Yukireen Volodymiir Zeleniskii irraa, mariin jilli Yukireen garee Ameerikaa waliin Jiddaatti taasisan guyyaa kaleessaa akkamitti akka itti fufe irratti bal’insaa ibsaniiru.

    Akka yaadachiisaatti, Zeleniskiin marii kana irratti hin argamne. Yukireen bakka bu'udhaan kan maricharratti hirmaatan, itti gaafatamaa waajjira Zeleniskii Andrii Yermaak, gorsaa nageenya biyyaalessaa biyyattii fi ministeerota dhimma alaafi ittisaa hedduu turan.

    Zeleniskiin haasaa karaa viidiyootiin Kibxata galgala taasisaniin, yaadni Yukireen walgahii kanaaf dhiheessite qabxii sadii kan of keessaa qabu ta'uu dubbata.

    Isaanis: "Samii fi galaana irratti dhukaasa dhaabu... hidhamtoonni gadhiifamuu... fi daa'imman Yukireen gara Raashiyaa geeffamanis deebi'uudha."

    Itti dabaluudhaanis, "yaadni addatti gama Ameerikaatiin dhiyaate turee ammoo, hatattamaan tarkaanfii jalqabaa sana bira darbuu fudhachuun guyyoota 30'f dhukaasa dhaabuu guutuu diriirsuuf yaaluun" adda waraanaa guutuu irratti.

    ''Yukireen yaada kana ni fudhatti, akka waan gaariitti ilaalla, tarkaanfii kana fudhachuuf qophiidha,'' jechuun kan dubbatan Zeleniskiin, amma US ''Raashiyaa amansiisuu akka qabdu'' irra deebi'anii cimsanii dubbatu.

17. 12 Bitooteessa 2025Yukireen waliigaltee dhukaasa dhaabuu guyyoota 30f turu fudhatte, US waliigaltee kana Raashiyaaf dhiheessuuf

    

    Madda suuraa, Reuters

    Waggoota sadan darbaniif Raashiyaa waliin waraanatti kan jirtu Yukireen, Sa'uudii Arabiyaatti US waliin erga mari'attee booda waliigaltee dhukaasa dhaabuu guyyoota 30'f turu akka fudhattu ibsite.

    Ministirri dhimma alaa US Maarkoo Ruubiyoo waliigaltee kana Raashiyaafis akka dhiheessan himan. Raashiyaan hanga yoonaa dhimma kanarratti yaada hin kennine.

    Pirezidantiin Yukireen Voloodmiir Zeleniskii kanaan booda Raashiyaan waliigaltee akka fudhattu amansiisuun ga'ee US jedhan.

    Pirezidanti Doonaald Tiraamp Guraandhala 28 gitasaanii kan Yukireen Zeleniskii waajjirasaaniitti waamuun erga marii dheekkamsaan guutame waliin taasisanii booda mariin Sa'uudii Arabiyaa magaalaa Jiddaatti US fi Yukireen gidduutti gaggeeffame kan jalqabaati.

    Ibsa waloo Yukireen waliin baasan keessatti US deeggarsa nageenyaa adda kuttee turte Yukireeniif taasisuutti akka deebitu ibsiteetti.

    Odeeffannoo tikaa fi basaasaa murteessoo ta'an Yukireeniif qooduutti akka deebitus ibsiteetti Ameerikaan.

    Maarkoo Ruubiyoo Jiddaatti ibsa gaazexeessitootaaf kennaniin Raashiyaan wiixinee waliigaltee kanaa akka fudhattu abdii qaban ibsan.

    Yukireen ''dhukaasa dhaabuun marii eegaluuf'' qophiidha jedhan. Raashiyaan waliigaltee kana kuffisnaan ''yeros gufuun nageenyaa maal akka ta'e ni hubanna,'' jedhan qondaalli US kun.

    Jila Jiddaa turan keessaa kan ta'an ergamaan addaa Tiraamp, Istiiv Witkoof, guyyoota dhufan gara Raashiyaa imaluuf.

    Mariin bu'a qabeessa ta'e Jiddaatti akka gaggeeffamu taasisuu isaaniif Pirezidant Tiraampiin kan galateeffatan Zeleniskiin, ''Raashiyaan waraana dhaabuu fi itti fufuu keessaa fedhiin ishee garam akka jiru agarsiisuu qabdi. Amma yeroo guutummaatti dhugaan ifa ba'udha,'' jedhan.

    Raashiyaan marii US fi Yukireen booda ibsa akka kennintu eertee turte, marii kana booda garuu hanga yoonaa homa ahin jenne.

    Garuu seerota baastota Raashiyaa keessaa dhiibbaa guddaa uumuun kan beekamu Kostaantiin Kosachev wlaiigalteen taasisan kamiyyuu ''fedhii Ameerikaan osoo hin ulaagaa keenyaan ta'a,'' jedhan.

18. 12 Bitooteessa 2025Lammileen Itoophiyaa kaampii yakkaa Miyaanmaar keessaa gadhiifaman biyyatti deebiyan

    

    Madda suuraa, Reuters

    Lammileen Itoophiyaa kaampii Miyaanmaar keessatti hojii yakka waliin dha’uu (Scam) keessaa gadhiifaman keessaa 45 ganama kana Finfinnee gahaniiru.

    Walakkeessa Guraandhalaa keessa waliigalatti lammileen Itoophiyaa 138 kaampii Miyaanmaar keessatti hojii yakka waliin dhahuu karaa oonlaayinii (online scam) dirqamaan hojjechiifamaa turan gadhiifamanii gara daangaa biyya ollaa Taayilaand geeffamanii ture.

    Ammallee namoonni 60 ta’an biyyatti akka isaan deebisaniif eeggachaa jiru.

    Kanneen biroon dhibbaan lakkaa’aman ammoo harka hidhattoota daangaa Miyaanmaar-Taayilaand irra socho’u jiru.

    Haala lammiileen Itoophiyaa Miyaanmaaritti keessa jiran iyyaafannee gabaasa kanaan dura qindeessine dabalataan asii argattu.

19. 12 Bitooteessa 2025ASHAMA?

    Ashamaa, akkam jirtu? Tamsaasa kallattiin isinitti deebineerra.

    Marii nagaa US, Raashiyaafi Yukireen Sa'ud Arabiyaatti gaggeeffamaa jiru dabalatee waan addunyaarrati ta'aa jiru kallattiin toora kanaan isin biraan geenya.

    Dhiyaadhaa!

20. 11 Bitooteessa 2025Manchestar Yunaaytid isteediyeemii haaraa paawundii biliyeena lamaan ijaarsisuufi

    Kilabni Maanchestar Yunaayitid isteediyeemii haaraa paawundii biliyeena lama itti baasun ijaaruuf akka jiru beeksise.

    Isteediyeemin haaraa ijaaramu kun namoota 100,000 qabachuu danda'a jedhame.

    Abbaan qabeenyaa Reed Deevils Sar Jiim Raatkiliif "isteediyeemii guddaa addunyaa" ijaaruu akka barbaadu beeksise.

    Mootummaa wajjin yoo waliigalame isteediyeemii haaraa kana waggaa shan keessatti ijaarsisuun akka xumursiisan dubbatan abbaan qabeenyaa Manchestar Yunaayitid.