Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.
Gara fuula marsariitii guutuutti na geessi
Filannoo daataa qusatu fayyadamu kanarratti hubannoo dabalataaf
Dubartiin umrii waggaa 37 qondaala immigireeshiniin haala suukanneessaan erga ajjeefamtee booda Miniyaapoolis keessatti hiriirri mormii ba'ameera.
Xinxalaa siyaasaa Jawaar Mohaammad dhimma muddama Gaanfa Afrikaa, siyaasa Itoophiyaafi Oromoo irratti BBC waliin turtii taasise.
Qondaalli olaanaa dhaaba mormituu Kongirasii Federaalawaa Oromoo kan ta'e Jawaar hariiroo inni mootummaa Itoophiyaa waliin qabuufi qooda dhaaba keessa qabullee ibseera.
Pirezidaantiin US Doonaald Tiraamp giddu seentummaan US Venezuweelaa keessatti taasistu waggootaaf kan turu ta'uu akka malu ibse.
Haleellaa waraanaan gaggeessaa Venezuweelaa erga to'attee booda, US bulchiinsa biyyattii akka to'attu ibsuun garuummoo yeroo dheeraaf bulchiinsi isaa dhimma Venezuweelaa akka to'atu dubbate.
Turtii Niwu Yoork Taayims waliin taasiseen, erga Maduuroon qabamee Venezuweelaa keessatti filannoon yoom akka gaggaggeeffamu ifa hin goone Tiraamp.
Tiraamp bulchiinsi isaa yeroo hangamuuf Venezuweelaa akka to'atu gaafatamee, "yeroon kan murteessu ta'a" jechuun yeroo dheeraaf US dhimma Venezuweelaa keessa galuu akka itti fufuu hin oolle akeeke.
Pirezidant Doonaald Tiraamp hawaasa Sumaalee bulchiinsa Minisootaa keessa jiran yakka waliin dhahuu fi goyyoomsaan himachuu itti fufeera.
''Hundasaanii hidhaa. Yakkamtoota waan ta'aniif,'' jechuun miidiyaa hawaasummaa isaa Truth Social irratti barreesse Tiraamp.
Tiraamp barreeffama saamichaan Sumaalee himatu maxxansa isaa kanaan walqabsiiseera.
Barreeffamni kun ''Sumaalonni maallaqa akkaan hedduu ta'e buufata xiyyaaraa Miniyaapooliis irraa gara alaatti baasu,'' jechuun himata.
''Maallaqi Sumaalonni shaanxaadhaan buufata xiyyaaraa Miniyaapoolis irraa gara alaatti geejjibsiisan kan waggaa lamaan darban keessatti Ameerikaa keessaa gara alaatti ba'e caala,'' jedha barreeffamni kun.
Barreeffamni kun gaazexaa qabeenya warra sirna duriitti cichanii- Just The News jedhamurratti maxxanfame.
Gaazexaan kun odeeffannoo kana aanga'oota nageenya biyya keessaa irraa argachuu ibse.
Qondaalli Venezuweelaa yeroof biyyattii hoogganaa jiru ajajaa garee eegdota Pirezidant Nikolaas Maduuroo kan ta'e Jeneraal Haaviyeer Maarkaanoon aangoorraa ari'e.
Jeneraalli Venezuweelaa kun erga Nikoolaas Maduuroon Karakaas keessaa qabamuun gara Niwu Yoork geeffamuun mana murtiitti dhihaatee guyyoota booda.
Gareen eegdota pirezidantii damee humna waraanaa biyyattii keessaa isa ijoo yoo ta'u itti gaafatamummaan isaa duree biyyattii eeguudha.
Mootummaan Venezuweelaa miidhaa haleellaa Ameerikaan qaqqabe hanga yoonaa hin ibsine.
Ameerikaan garuu Maduuroo qabuuf oppireeshinii gaggeessiteen kanneen jumlaan ajjeefaman keessa miseensonni eegdota pirezidantichaa jiraachuu ibsiteetti.
Jeneraal Haaviyeer Maarkaanoo ar'uun bakkasaa qondaala biraa kan muude yeroof Venezuweelaa kan bulchaa jiru Deelsii Roodiriigeez jedhama.
Roodiriigeez Wiixata darbe uummata mootummaa biyyattiif amanamoo ta'an fuulduratti kakuu seenuun pirezidantii biyyattii ta'e.
Roodirigeez itti aanaa Maduuroo ta'uun tajaajilaa Roodiriigeez ture. Yeroo ammaa mana hidhaa kan jiru Maduuroo faana michuu ture.
Erga Maduuroon qabamee ibsa kan kenne Pirezidant Doonaald Tiraamp, US Venezuweelaa akka bulchitu ibsuun, Roodiriigeez faana akka quba walqaban himeera.
Mootummaan Somaaliyaa himannaa saamicha gargaarsa namoomaan irratti ka'e haalteetti. Qondaaloti biyyattii man-kuusaa Sagantaa Nyaataa Addunyaa (WFP) mancaasuun ''nyaata gargaarsa fudhatan,'' jedhamuun himatamaniiru.
Himannaa kana booda US gargaarsa Somaaliyaaf kennite adda kutuu ibsiteetti.
Ibsi mootummaa Somaaliyaa akka jedhutti gargaarsi jedhame kun eegumsaa fi to'annoo WFP jala jira.
Ibsi kun Ameerikaanis eegumsa fi to'annoo gargaarsa namoomaa keessatti tumsa olaanaa taasisaa jiraachuu eerte.
Gargaarsi himannaan irratti dhihaate kun buufata handaara galaanaa Moqadishootti kan argamuu fi bakka kanatti hojiin misoomaa buufata doonii babal'isuuf hojjetamaa jiraachuu ibse mootummaan Somaaliyaa.
Sababa hojii misoomaa kanaan kuufamni fi raabsaan gargaarsaa akka hin miidhamne mirkaneesseera ibsi kun.
Ammoo sababa kanatti dhiibbaan gargaarsa namoomaarra ga'u yoo jiraate akka qoratu ibseera.
Mootummaan Somaaliyaa dhimma gargaarsa namoomaa irratti US fi arjoomtota idiladdunyaa waliin qindoominaan akka hojjetus ibseera.
Pirezidantii Itti Aanaan US JD Vaansi ajjeechaan qondaala immigireeshiniin dubartii tokko irratti raawwate ''balaa hamaadha, garuu balaa isheen ofitti fiddedha,'' jedhe.
''Wanti mudate balaa hamaadha, garuu balaa hamaa isheen ofiin ofirratti fidde ta'uu fudhachuun barbaachisaadha,'' jechuun X irratti barreesse.
''Oppireeshinii olaantummaa seeraa mirkaneessuuf qaamoleen federaalaa gaggeessaa jiran keessa hin seeninaa. Balleessitanii konkolaataa keessaniin poolisoota jalaa dheessuuf hin yaalinaa. Dubbii hammuma kana,'' jedhe.
Qondaalli dhimma immigireeshinii fi daangaa kan Tiraamp muudan Tom Homan gamasaan ''qorannoon akka gaggeeffaamuu fi bu'aa qorannoo irratti hundaa'uun qaamni balleesse seeraan gaafatama,'' jedha.
US yeroo ammaa humna fayyadamaa jiraachuu irratti wayita gaafatamu ''bulchiinsa Tiraamp keessatti humnatti fayyadamuun mudatee hin beeku,'' jedhe.
Erga qondaalli Immigireeshinii Ameerikaa dubartii umrii waggaa 37 Renee Nicole Good jedhamtu rasaasa itti dhukaasuun haala suukanneessaan ajjeesee booda magaalaa Miniyaapoolisitti hiriirri mormii ba'ameera.
Dubartiin kun mana jireenyaa isheerraa dhiheenya irratti ajjeefamte.
''Dubartii gaarii, amala qabeettii turte, garuu lubbuunshee haala suukanneessaan darbe,'' jedhan maatiin ishee.
Dubartiin kun ogummaa walalootiin beekamti, damee kanaanis badhaasa argatteetti.
Lammii Ameerikaa ta'uu fi ogummaa geetaaraan beekamtuu ta'uushee ibsan Seneetarri Minisootaa Tiinaa Ismiiz.
Ogummaa hoogbarruu- Creative writing, Varjiiniyaa, Yuniversitii Noorfookitti baratte.
Dhalootaan Koloraadoo Ispiriingis yoo taatu bara darbedha kan isheen magaalaa Kansaas irraa gara Miniyaapoolis godaante.
Aanga'oonni magaalattii dubartiin tokko seera immigireeshinii kabajuu fi hojiirra oolchuun nama beekamtuudha jechuun falmaniif.
Bulchiinsi Tiraamp garuu ''shororkeessituu biyya keessaa'' jechuun ibse.
Abbaan manaa ishee duraanii osoo daa'imasaanii mana barumsaatiin ga'anii deebi'anii qondaalota (ejentoota) immigireeshinii (ICE Agents) karaatti arguu hime.
Haati dubartii kanaa Donna Ganger ammoo intalli isaanii ejentoota kunneen wayita argitu rifachuu dubbatan.
Raashiyaan haleellaa diroonii cimaa Yukireenirratti raawwachuu hordofee lammiileen biyyattii miliyeena tokkoo ol ibsaa malee hafana.
Waktii qorraafi cabbii ta'uurraa kan ka'e lammiileen Yukireen miliyeena tokkoo ol ibsaafi hoo'a malee hafuu ittaanaa Ministiira Muummee Yukireen kan ta'an Oleeksii Kueebaa ibsan.
Raashiyaan yeroo dhiyoo as haleellaa buufataalee anniisaa Yukireen irratti gaggeessitu cimsiree itti fufteetti.
Kuni ammoo waktii qorraafi roobatti ta'uunsaa lammiilee biyyattii balaa guddaaf saaxileera.
Pirezidaantiin Yukireen Voloodmiir Zeleniskiin haleellaa Raashiyaan buufataalee anniisaa irratti raawwattu balaaleffachuun michootasaanii biyyoota Lixaaf waamicha deeggarsaa godhaniiru.
Pirezidaant Zeleniskiin torban kana biyyoota Awurrooppaa kanneen akka UKfi Faransaayi waliin marii gaggeessuun dhiibbaan dippilomasii akka cimu irratti xiyyeeffateera.
Somaaliyaatti qondaaloti man-kuusa Sagantaa Nyaata Addunyaa mancaasuun ''nyaata gargaarsaa fudhatan,'' jedhamuun himatamuun booda Ameerikaan gargaarsa Somaaliyaaf kennitu addaan kutte.
''Bulchiinsi Tiraamp imaammata qisaasama, hannaafi maqfamuu deeggarsa nyaataa lubbuu baraaruu tasumaa hin fudhatu,'' jedhe Waajirri Hajaa Alaa Ameerikaa ibsa X irratti baaseen.
Ergaa dabarseen waajirichi nyaatni gargaarsaa ''lammiilee Somaaliyaa saaxilamoo'' tahaniif kennamu toonii 76 seeraan ala fudhatamuu gabaasni isa qaqqabuu hime.
Gargaarsi kan deebi'ee kannamu yoo mootummaan Somaaliyaa ''gochaa raawwateef yoo ittigaafatamummaafi tarkaanfii furmaataa yoo fudhate dha,'' jedhe ibsichi.
Ameerikaan bulchiinsa Tiraamp jalatti dhaabbilee UN baayyee keessaa baatus maallaqa Sagantaa Nyaata Addunyaaf(WFP'F) irra guddaa kan gumaachu US dha. Bara 2025 keessa qofa doolaara biiliyoona lama ramaddeetti.
Mootummaan Somaaliyaa hamma yoonaa dhimma kanarratti deebii hin kennine.
Pirezidaantiin Ameerikaa Doonaald Tiraamp, pirezdaantii Kolombiyaa Gustaavo Peetiroo waliin 'yeroo dhiyootti'' Waayit Haawusitti akka wal argan himan.
Kunis erga Tiraamp xiyyeeffannoon Ameerikaa Kolombiyaa irratti taasiftu ''haala gaarii irra jira '' jedhanii guyyoota muraasa booda dha.
Ameerikaan pireezdaantii Veenzuweelaa Niikoolaas Maaduroo to’achuun booda biyyota irratti xiyyeeffattu ifoomsitee ture. Sana keessaa Kolombiyaan ishee tokko.
Pirezidaantiin Kolombiyaa Gustaavo Peetiroo bilbilan marii Tiraamp waliin taasisaniin, ''haala qoricha sammuu namaa hadoochuu fi kanneen biroo irratti waliigaltee dhabuu '' ibsaniiru,
Pirezidaantiin Ameerikaa jalqaba torbee kanaa wal ilaallaa jechuun Peetirootti dhaadatanii turan.
Tiraamp ''nama dhukkubsataa kookeenii gurguruu fi Ameerikaa miidhuu barbaadutu Kolombiyaa bulchaa jira'' jechuun ibsan. Yeroo dheeraaf waan itti fufu mitis jedhan
Kolombiyaa daldala qoricha sammuu namaa hadoochun kan himattu Ameerikaan kuufama boba'aa fi albuuda gati jabeeyyiii qabduun xiyyeeffannoo Ameerikaa keessa galteetti.
Deebii kanaaf, Petroon Kolombiyaan yoo US tarkaanfii waraanaa kamiyyuu biyya isaa irratti fudhatte ''meeshaa waraanaa akka kaasu'' akeekkachiiseera.
Tiraamp amma haasawa Peetroo waliin taasisan “nama kabajamaa sagaleen isaa namatti tolu'' jechuun jaajan.
Kolombiyaan akkuma Veenzuweelaa kuufama boba’aa guddaa qabdi.
Pireezidantiin Ameerika Donaald Tiraamp waliigaltee jijjiirama haala qilleensaa ittisuuf hojjetu ( UN Framework Convention on Climate Change) dabalatee dhaabbilee idil-addunyaa danuu keessaa US'n baase.
Gareewwaan 66 Ameerikaan keessaa baate keessaa walakkaa kan tahan qaama Dhaabbata Biyyoota Gamtoomaniiti.
Ibsi Waayit Haawus kenne gareeleen kunneen ''fedhii Ameerikaa waan hin fayyadneefi ajandaa gatii hin baasneefi diinummaa jajjabeessa,'' jedhe.
Tiraamp dhaabbilee idil-addunyaa itti hin tolle baayyee irraa maallaqa kutuun jijjiirama haala qilleensaa mancaatii nam-tolcheedhaan dhufu saayintistoonni irratti waliigalan ''qoosaa dha,'' jedheera.
Waliigalteen wal hubannoo dhimma kanaa Roobii kaleessaa kan mallatteefame yoo tahu, Waayit Haawus ''qisaasama kaffaltoota gibiraati,'' jechuun sababa dhaabbilee kunneen keessaa bahuu ibseera.
Ameerikaan biyyoota Afrikaa dabalataa viizaa argachuuf qarshii qabsiisuu qaban ifa goote.
Bara darbe baatii Adoolessaa keessa hojimaatni bahe iyyattoonni viizaa Ameerikaa gaafatan doolaara kuma 15 akka qabsiisan ajaja.
Ibsa marsariitii waajira hajaa alaa Ameerikaa irratti boodana baheen ammoo biyyooti 38 kan tarreefaman yoo tahu, 24 biyyoota Afrikaa dha.
Biyyooti dabalataa yeroo ammaa viizaa argachuuf qarshii akka qabsiisan gaafataman Aljeeriyaa, Angoolaa, Baangilaadeesh, Beeniin, Burundii, Keep Verdee, Kuubaa, Jibuutii, Fiijii, Gaaboon, Ayivoorii Koost, Kiriigiistaan, Neeppaal, Naayijeeriyaa, Senegaal, Taajikistaan, Toogoo, Yuugaandaa, Vaanuwaatuufi Zimbaabwee dha.
Hojimaata kanaan viizaa hojiifi turistii B1 fi B2 argachuuf lammiileen biyya kanaa yeroo iyyatan murtoo abbaa taayitaa dhimmi ilaallatuun doolaara 5,000, 10,000 ykn 15,000 qabsiisuun irra jiraata.
Murtoon bara darbe hojiirra akka oolu tahe kuni biyyoota kanneen akka Buutaan, Bootiswaanaa, Rippaabliika Giddugalaa Koongoo, Gaambiyaa, Giinii, Giinii Bisaawuu, Maalaawwii, Mooriteeniyaa, Naamibiyaa, Soo'aatoomee, Taanzaaniyaa, Turkimistaanfi Zaambiyaa ilaallata ture.
Iyyattoonni viizaa kuni qarshiin qabsiisan viizaa argachuu isaanif wabii kan hin taane yoo tahu eeyyama viizaa argatanis tahe, yoo dhaban qarshiin kuni isaaniif deebi'a.
Hojimaatni biyyoota 38 irratti hojiirra oola jedhame kuni Ameerikaatti yeroo isaaniif eeyyamame caala warra turan to'achuuf akka tahe qondaaloti biyyattii ni himu.
Pireezidantiin Ameerikaa Donaald Tiraamp baasiin waraanaa US ''yeroo hamaafi balaafamaa'' jedhanii waaman kanaaf bara 2027tti doolaara tiriiliyoona 1.5'tti akka guddatu gaafatan.
Baasiin kuni baajata bara kanaa doolaara biiliyoona 901 Kongireesiidhaan ragga'e dhibbeentaa 50 ol caala.
''Kuni 'waraana qabaachuuf abjoochaa turre' ijaaruuf nu dandeessisa. Diinni keenya eenyuyyuu haatahu ''nageenya keenya eega,'' jedhe Tiraamp ergaa Roobii miidiyaa hawaasaa isaa irratti barreesseen.
Dabaluunis qaamoti waraana US keessaa qooda qaban ijoon meeshaalee waraanaa yerootti yoo hin dhiyeessineefi warshaalee miya waraanaa oomishan yoo hin ijaarre tarkaanfiin irratti fudhatama jedhe.
Dhaaboti waraana US keessaa qooda qaban gatiin qooda isaanii %5nin kan dabaluu Tiraamp beeksiseera.
Ogeeyyiin diinagdee kanaan dura garaagarummaa baasii waraana Ameerikaa fi galii galchu giddu jiru qabxii itti fufsiisuun hin danda'amnerra gaheera jedhu.
Tiraamp garuu 'galata qarshii taarifarraa argamuu' baajata dhiyeesse kana Waashingitan salphaamatti milkeessuu danda'a jedhe.
Miniisootaatti miseensi Seera Kabachiisaa Imaltootaafi Gumurukaa(ICE) dubartii ganna 37 tokko ajjeese.
Qondaaloti Miniisootaa Tiraamp miseensi of tiksuuf jecha itti dhukaase jechuu balaaleffataniiru.
Waajirri Dhimma Nageenyaa Ameerikaa Renee Nikool Guud 'jeequmsa uumuun' Seera Kabachiisaa Imaltootaafi Gumurukaa(ICE) jala bahuuf yaalaa turte jedhe.
Kantiibaan magaalaa Miniiyaappooliis Jaakoob Firee ''miseensi kuni humna akka malee fayyadamuun du'a namaaf sababa taheera,'' jechuun ICE magaalattidhaa akka bahu gaafate.
Tarkaanfii godaantota seeraan alaa irratti taasifamaa jiruun miseensoti ICE dhibbaan lakkaa'aman magaalattiitti ramadamanii jiru.
Viidiyoon miidiyaa hawaasaa irratti gadhiifame Roobii ganama sa'atii 04:25 battala dubartii kanatti dhukaafame agarsiisa.
Bulchaan Miniisootaa Tiim Waalz waan qondaaloti federaalaa waa'ee taatee kanaa jedhan balaaleffateera
''Meeshaa ololaa kana hin amaniinaa,'' jedhe waan Waajirri Nageenya Biyyaa keessaa jedheef yeroo deebii kennu.
Erga US doonii boba'aa alaabaa Raashiyaa ofirraa qabu Garba Atlaantiik keessatti to'achuu ibsitee booda Waayit Haawus ibsa kenneera.
Ibsa kana keessatti waa'een dooniiwwan boba'aa to'atamanii akkaataa eegameen hin kaane.
Garuu Ministirri dhimma alaa US Maarkoo Ruubiyoo ''US oppireeshinii kanarraa buufatteetti. Dhimma Venezuweelaatti marsituuf hin qabdu,'' jechuun komii irratti ka'uuf deebii kennan.
Seneetaroonni gariin US ammallee Venezuweelaa marsaa jirti jechuun qeeqaa turaniiru.
Maarkoo Ruubiyoo tarkaanfiin itti aanu yeroo dandamannaati jedhan. Kun dureewwan mormitootaa Venezuweelaaf dhiifama gochuu dabalata jedhan.
Sana booda ''ce'umsaaf haala mijeessuudha,'' jedhan osoo ibsa bal'aa hin kennin.
Ameerikaan boba'aa Venezuweelaa gabaa jiruun akka gurgurtuu fi kan to'atus US ta'uu ibsan.
Akkaataa lammiilee Venezuweelaas fayyaduun kan haala mijeessu US ta'uu ibsan.
Kana booda doorsisi uummata Venezuweelaarra ga'u hin jiru jedhan.
Ministeerri dhimma alaa Raashiyaa Ameerikaan lammiilee Raashiyaa doonii to'atamte keessa jiraniif ''eegumsa ga'aa fi qabiinsa dhala namaaf malu'' akka taasistu gaafateera.
Dooniin boba'aa feetee Garba Atlaantiik irratti to'annoo US jala oolte alaabaa Raashiyaa kan ofirraa qabu ta'uu US ibsiteetti.
Raashiyaanis lammiileenshee doonii Marinera jedhamtu keessa jiraachuu ibsiteetti.
Mirga lammiilee kunneenii qixa sirriin eegamuu fi kabajamuu qaba jedhe Ministeerri dhimma alaa Raashiyaa.
Ministeerri Ittisaa UK wayita Ameerikaan doonii boba'aa kaaba Atlaantik keessatti to'attu tumsuu ibseera. Humni ittisaa kun oppireeshinii doonii alaabaa Raashiyaa ofirraa qabu to'achuuf gaggeeffame kana xiyyaara waraanaa RAF jedhamuun tumsuu ibseera.
Ministirri Ittisaa UK Joon Hiilii ''har'a humni waraanaa keenya oppireeshinii US doonii Bella 1 jedhamu to'achuuf gaggeesse tumsuun milkaa'eera. Doonii gara Raashiyaa imalaa turte kana to'achuun milkoofneerra,'' jedhan.
Tarkaanfiin kun dooniiwwan qoqqobbii jala jiran kutaa addunyaa kamirraayyuu socho'uu akka hin dandeenye mul'isa jedhan qondaalli waraanaa UK kun.
''Dooniin seenaa yakkaan beekamu kun kan qindoomina Raashiyaa fi Iraan (Russian-Iran Axis). Kunneen qoqqobbii jala jiru. Shororkeessummaa, waraana fi walitti bu'iinsa babal'isuuf oola,'' jedhan.
UKn dantaa biyyaalessaa fi nageeya biyyaalessaa eegsisuu keessatti qoodashee gumaachuu itti fufti jedhan.
Humni Waraanaa US doonii boba'aa Venezuweelaa feetee deemtu Garba Atilaantikii irratti to'achuu beeksifte.
Dooniin boba'aa feetee deemtu kun alaabaa Raashiyaa kan ofirraa qabdu yoo ta'u, qoqqoobbii US jalaa miliquun boba'aa feetee deemaa turte kan jedhuuni US doonii kana kan to'achuu beeksifte.
Raashiyaan ibsa baasteen doonii alaabaasheen boba'aa fe'ee deemaa ture waliin qunnamtiin qabdu adda cituu ibsite.
Ministeerri Geejjibaa Raashiyaa ibsa baaseen, "biyyi kamuu geejjiba biyya maqaa biyya biraan galmaa'e humnaan to'achuuf mirga hin qabu" jedhe.
Dooniin kun alaabaa Raashiyaan boba'aa akka geejjibduuf "hayyama yeroo argachuu" ibsuun sa'aatii itti humnoonni eegumsa qarqara galaanaa US oppireeshinii gaggeessaniin doonicha yaabanii kaasee qunnamtiin adda cituu ibsite Raashiyaan.
Leenjisaan Liiverpuul Arne Siloot deeggartoonni kilabichaa ''dadhabaa fi hawwataa kan hin taane'' jechuun gareesaa arrabsuu dhagahuun baayyee namatti ulfaata jedhe.
Leenjisaan kun qeeqa kana guutummaatti hin mormine, ammoo yoomiyyuu tapha hawwataa taphachuu akka barbaadu ibseera.
''Jechoota kunneen dhagahuun baayyee ulfaata. Garuu guutummaatti hin mormu. Garuu ga'umsi ammaa [kan Liiverpuul] ibsuuf jecha biraa fayyadamuun nan danda'a. Haalota tokko tokko ilaalcha keessa galchuun. Tapha taphanneen carraa barbaadamu uumuu dhiisuu dandeenya. Kun ammoo nu qofa miti kan mudatu. Carraa nuti uumne yoo fudhanne kan kilaboota ga'umsa gaariirra jiranii gadi miti,'' jedhe Siloot.
Liiverpuul taphoota sagal irratti hin mo'amne, garuu dhiheenya kana ga'umsi isaa gadi bu'uun baayyee qeeqamaa jira.
Dirreesaaraatti goolii 2 fi 1n erga Woolvis mo'atee booda Leeds fi Fuulham faana qixa ba'eera.
Kamisa ammoo dursaa liigichaa qabxii 14n irraa fagaatee jiru Arsenaal faana taphata, sunuu Istaadiyeemii Emireet irratti.
Kilabicha keessaa goolii hedduu kan qabu Huugoo Ekitikee miidhama sarbaa isaa mudateen ammallee shakkii keessa jira.
Aliin kilaba Kaanaadaa Vaankooveer Waayit Kaappiif taphataa ture.
Waggoota lamaan darbaniis Garee Biyyaalessaa Kaanaadaaf taphachaa ture.
Harmeen isaa Aadde Muntahaa Aliyyii kana dura yeroo BBC'n dubbise akka inni kilaba Awurooppaaf taphatu hawwuu ture.
Abjuun isaanii waan milkaa'e fakkaata. Daawwadhaa!
