Atileetiin Itoophiyaa si'eessituun walqabatee waggaa sadiif adabamte eenyu?
Madda suuraa, Getty Images
Dhiyeenya fiigicha maaraatoonii kan injifatte atileet Jamiilaa Worteessaa waggaa sadiif dorgommiirraa ittifamte.
Atileetiksii Addunyaan kan dhaabbate Kutaan Amanamummaa Atileetiksii (Athletics Integrity Unit), atileetii Itoophiyaa kan taate Jamiilaa Worteessaa waggoota sadiif atileetiksiirraa ittisuusaa beeksise.
Ibsa dhaabbatichi baaseen qaama atileetittii keessa qorichi dhorkamu argameera yookiin fayyadamteerti jedheera.
Atileet Jamiilaan dorgommii maaraatoonii Guiyang ji'a Waxabajjii darbe Chaayinaatti adeemsifame sa'aatii 2:36:22'n sadarkaa tokkoffaa qabachuun xummurte.
Haa ta'u malee murtee AIU'n dabarse kanaan injifannoon isheen galmeessiste kun akka haqamus himameera.
"Itti gaafatamummaa nan fudhadha"
Atileetii umrii waggaa 39 kan taate Jamiilaa Worteessaa dorgommii maaraatoonii Guiyang ALA Waxabajjii 15, 2025 Chaayinaatti adeemsifamerratti samuuda qorannoo qoricha si'eessituu akka laatte ibsi AIU hima.
Haa ta'u malee ALA Adoolessa 21, 2025 samuuda atileetittiin kennite keessa wanti 'Erythopoietin' jedhamu akka argame laaboraatooriin qorannichi itti adeemsifame beeksise.
Wanti kun dandeettii oksijiinii baachuu dhiigaa kan guddisu yemmuu ta'u, dadhabbiis ni hir'isa. Haa ta'u malee waan kana fayyadamuun Ejansii Farra Qoricha Si'eessituu Addunyaan (WADA) dhorkaa dha.
Oduufi xiinxala kallattiin bilbila keessan irratti argachuuf ammuma
Asiin seenaa
End of podcast promotion
Haaluma kanaan ji'a Adoolessaa keessa atileetittiirra qoqqobbii yeroo kan kaa'e AIUn, atileet Jamiilaa Worteessaa "dogongorashee amanteerti" jechuun ibsasaa keessatti eeree jira.
Ergaa atiletittiin ergiteefin qorichichi vitaaminii itti fakkaatee akka fudhatte, namni itti gurgures vitaaminii miidhaa hinqabne akka ta'e eeruun akka itti gurgurefi boodarra garuu wantichi seera farra-qoricha si'eessituun kan dhorkame ta'uusaa akka barte himushee AIU ibsasaatiin himeera.
Dabalataan oggeessa fayyaa yookiin ispoortii osoo hin mariisisin fudhachuunshee dogongora ta'uusaafi wanticha fayyadamuusheetti itti gafaatamummaa guutuu akka fudhattu ergaa imeeliin himuunshees himameera.
Haaluma kanaan balleessaan atileetittii waggoota afuriif dorgommiirraa akka ittifamtu kan taasisu akka ta'e kan hime AIUn, atileetittiin balleessaashee daftee waan amantefi adabbii irra kaayame waan fudhatteef adabbichi waggaan tokko akka hir'ateef beeksiseera.
Haaluma kanaan atileet Jamiilaa Worteessaa ALA Adoolessa 31, 2025 irraa eegalee waggoota 3'f dorgommiilee atileetiksiirraa akka ittifamtu murteessera.
Atileet Jamiilaa Worteessaa waggoota 15 oliif dorgommiilee maaraatoonifi walakkaa maaraatoonii garagraarratti dorgomuun injifachuun cinatti sadarkaa qabachuun xummuraa turteerti.
