Wo àwọn nǹkan tó yẹ láti ṣe tí o bá fẹ́ máa lo ẹ̀rọ a-mú-oúnjẹ-gbóná

Lóde òní, ọ̀kan lára àwọn ohun èèlò ilé táwọn obìnrin máa ń gbìyànjú láti ní ni ẹ̀rọ a-mú-oúnjẹ-gbóná (microwave).

Èyí rí bẹ́ẹ̀ nítorí ìrọ̀rùn tí ẹ̀rọ yìí máa ń mú wá nígbà tí èèyàn bá fẹ́ tún oúnjẹ gbé kaná láì ṣẹ̀ṣẹ̀ máa dáná sí ààrò.

Àmọ́ gbígbé oúnjẹ sínú ẹ̀rọ a-mú-oúnjẹ-gbóná (microwave) ní àwọn ipa kan tó máa ń ní lórí ìlera èèyàn pàápàá látara àwọn oúnjẹ tí èèyàn ń gbé sínú ẹ̀rọ yìí.

Àwọn ọ̀nà tí èèyàn lè gbà dá ààbò bo ara ẹni lọ́wọ́ àwọn àìsàn tó lè ti ìdí àwọn oúnjẹ náà jáde.

Àwọn nǹkan tí o kò gbọdọ̀ ṣe

Má jẹ̀ ẹ́ kí oúnjẹ máa pẹ́ nínú ẹ̀rọ a-mú-oúnjẹ-gbóná ju bí ó ṣe yẹ lọ pàápàá ìrẹsì. Ìrẹsì ní kòkòrò àìfojúrí kan tó ń jẹ́ bacillus cereus tó le pọ̀ si nígbà tó bá pẹ́ nínú ẹ̀rọ a-mú-oúnjẹ-gbóná.

Lọ́pọ̀ ìgbà ni àwọn ilé ìtajà tó ń ta oúnjẹ síse máa ń gbé oúnjẹ sínú ẹ̀rọ a-mú-oúnjẹ-gbóná kí wọ́n tó gbe fún oníbàárà wọn. Tí èèyàn bá ń tún àwọn oúnjẹ náà gbé sí inú ẹ̀rọ a-mú-oúnjẹ-gbóná le dákún kí oúnjẹ náà léwu ní jíjẹ.

Ó dára láti jẹ oúnjẹ tí èèyàn bá sè láàárín ọjọ́ kan sí ọjọ́ méjì. Tí o bà le parí oúnjẹ láàárín ọjọ́ kan sí ọjọ́ méjì, ó dára láti gbe sínú ẹ̀rọ a-mú-oúnjẹ-dì (freezer) dípò ẹ̀rọ a-mú-oúnjẹ-tutù (refrigerator).

Gbígbé ẹran adìyẹ tí ó bá dì sínú omi gbígbóná nígbà tí ẹ bá ṣẹ̀ṣẹ̀ gbe jáde nínú ẹ̀rọ a-mú-oúnjẹ-dì (freezer) láti le fi jẹ́ kó rọ̀ le mú kí kòkòrò àìfojúrí Campylobacter tó máa ń fa inú rírùn àti èébì wọ inú rẹ̀.

Àwọn ohun tó yẹ láti ṣe

Ìwádìí fi hàn pé gbígbé oúnjẹ sínú fíríìjì máa ń dènà kí àwọn kòkòrò àìfojúrí le hù níbẹ̀.

Gbígbé oúnjẹ tọ bá gbóná gidi sínú fíríìjì le mú kí fíríìjì náà gbóná èyí ló sì lè ṣàkóbá fáwọn oúnjẹ mìíràn tó bá wà nínú rẹ̀.

Jẹ́ kí oúnjẹ máa tutu kí o tó gbe sínú fíríìjì.

Ohun tó dára jùlọ ni pé kí èèyàn ri dájú pé oúnjẹ tó bá dì tutu dáadáa kí èèyàn tó gbé sínú ẹ̀rọ a-mú-oúnjẹ-gbóná.