Bola Tinubu: N kò rán ẹnikẹ́ni láti bẹ̀rẹ̀ ìpolongo fún ìbò ààrẹ ọdún 2023

Asiwaju Bola Ahmed Tinubu ti fesi si iroyin to tan kalẹ lori ayelujara pe o ti ṣe agbekalẹ ohun ti yoo fi ṣe ipolongo fun ibo aarẹ ọdun 2023.

Oluranlọwọ lori ọrọ iroyin si Tinubu, Ọgbẹni Tunde Rahman lo sisọ loju ọrọ yii fun BBC Yoruba, to si ni iroyin ofege lasan ni.

Ọgbẹni Rahman ṣalaye pe o digba ti Tinubu ba to kede erongba rẹ lati dupo aarẹ, ki o to le sọ nipa ipolongo ibo.

Àwọn iròyin tì ẹ leè ní ìfẹ̀ síí:

''Ko si ohun to jọọ pe Tinubu ti ṣe agbekalẹ eto ipolongo fun ibo aarẹ ọdun 2023, Asiwaju ko tii kede pe oun yoo dije ninu ibo aarẹ to n bọ lọdun 2023.

Awọn oriṣiiriṣii ẹgbẹ awọn ololufẹ Tinubu lo wa nidi ọrọ iroyin ipolongo fun ibo aarẹ orilẹede Naijiria to wa lori ayelujara.

Asiwaju ko mọ ohun kan ni pa rẹ, bakan naa ni ko mọ ohunkohun nipa awọn eeyan to n ha raisi ati ẹwa ninu baagi kaakiri.

Awọn afẹnifere ti wọn nifẹ Asiwaju lo n ṣe awọn nnkan yii fawọn eeyan, Asiwaju ko ran ẹnikan ni iṣẹ, ko si fun ẹnikan kan lowo lati maa pin raisi tabi ẹwa.

A o le da awọn eeyan yii lọwọ kọ nitori itọrẹ aanu ni wọn n ṣe fawọn ti ko rọwọ họri lawujọ.

Asiko kan tiẹ wa ti Asiwaju ni lati dupẹ lọwọ awọn eeyan yii fun iṣẹ itọrẹ aanu ti wọn n ṣe fawọn eeyan.

O ti pẹ ti awọn eeyan yii ti n ṣe awọn ohun ti wọn n ṣe ni orukọ Tinubu bo tilẹ jẹ p e ko mọ nipa rẹ,'' Ọgbẹni Rahman lo ṣalaye bẹẹ.

Oriṣiiriṣii nkan bii aṣọ ilewọ, fila, ounjẹ inu baagi lawọn eeyan kan n pin eleyii ti orukọ Tinubu fun ipo aarẹ ọdun 2023 wa lara rẹ.