Sunday Ighoho kéde àwọn ọ̀daràn Fulani mẹ́ta tó ṣàkọlù sílé ìyá rẹ̀, ọwọ́ tẹ ọ̀kan, méjì na pápá bora

Gbajugbaja ajijagbara, Sunday Adeyemo, ti ọpọ mọ si Sunday Igboho ti kede pe awọn ọdaran Fulani mẹta kan ti ṣakọlu sile iya oun to wa niluu Igboho, nipinlẹ Oyo.

Igboho ni ọwọ tẹ ọkan lara awọn afurasi naa, wọn si ti faa le ileeṣẹ ọlọpaa lọwọ, nigba ti awọn meji to ku na papa bora.

Nigba ti BBC Yoruba kan si alukoro ileeṣẹ ọlọpaa ipinlẹ Oyo, Olugbenga Fadeyi, o ni lootọ ni afura kan ti wa ni ahamọ awọn, iwadii si ti bẹrẹ lati mọ okodoro iṣẹlẹ ọhun.

Ẹwẹ, minisita ileeṣẹ to n ri si eto irinna ọkọ ofurufu tẹlẹri, ti awọn eeyan tun n wo gẹgẹ bii alatilẹyin Sunday Igboho, Femi Fani-Kayode naa tun kede ọrọ naa loju opo Twitter rẹ.

O ni "mo ṣẹṣẹ ba Sunday Igboho sọrọ tan ni, o si sọ fun mi pe ọwọ tẹ awọn Fulani meji to jẹ ọmọ ilẹ okeere nile iya oun to wa ni Igboho, nipinlẹ Oyo."

"Afojusun awọn Fulani naa ni lati ṣakọlu si iya agba ọhun, ọkan ninu wọn sa asala ṣugbọn ẹnikeji rẹ ti wa ni gbaga ọlọpaa."

Lẹyin naa lo fi oju afurasi naa lede loju opo ọhun.

Ṣaaju ni agbẹnusọ fun Ighoho, Olayomi Koiki ti kọkọ kede iroyin naa, to si sọ pe iṣẹlẹ ọhun waye ni nnkan bii aago mẹjọ alẹ ku iṣẹju diẹ.

Ti ẹ ko ba gbabgbe, Sunday Igboho ati awọn ẹmẹwa rẹ ti kọkọ kede pe awọn mu awọn eeyan meji kan, ti ọkan jẹ ọmọ ogun, to si fẹsun kan awọn eeyan naa ope wọn wa ṣe ami oun.

Ṣugbọn ko pẹ si asiko naa ti ileeṣẹ ologun fesi pe eni tim wọn mu ninu aṣọ ṣọja kii ṣe oṣiṣẹ ileeṣẹ ọmọ ogun.