UNICEF: Ẹ̀rọ ìbánisọ̀rọ̀ pọ̀ ju ilé ìgbọ̀nsẹ̀ lọ l'órílẹ̀-èdè Nàìjíríà
Oríṣun àwòrán, Getty Images
Ẹ gbọ na, ninu ẹrọ ibanisọrọ ati ile igbọnsẹ ewo gan lo ṣe pataki ju?
Ibeere yii lo n gba ẹnu ọpọ kan bayii lẹyin ti Ajọ to n risi idagbasoke ọmọ wẹwẹ lagbaye, UNICEF sọ pe awọn ọmọ orilẹ-ede Naijiria to ni ẹrọ ibanisọrọ pọ ju awọn to lanfani ile igbọnsẹ lọ.
Ko si ani-ani pe iṣoro igbọnsẹ pọ lorilẹ-ede Naijiria, paapaa julọ lawọn ẹsẹ pupu.
Àwọn iròyin tì ẹ leè ní ìfẹ̀ síí:
Amọṣa awọn onka ti ajọ UNICEF wa fi sita nibi idanilẹkọọ kan lo tun da bi ẹni pe o kọ ọpọ onwoye nibi idanilẹkọọ naa ni ominú.
Gẹgẹ bii ọga agba fun imọtoto ati omi to mọ gaara lajọ UNICEF, Zaid Jurji ṣe sọ, ogoje miliọnu lawọn ọmọ orilẹ-ede Naijiria to ni ẹrọ ibanisọrọ, ṣugbọn miliọnu mẹtadinlọgọrun lawọn to ni anfani ile igbọnsẹ.
O ni ida mẹtadinlogoji ninu ọgọrun awọn ile eto ilera lorilẹ-ede Naijiria lo ni ile igbọnsẹ fawọn alaisan.
Oríṣun àwòrán, Getty Images
Bakan naa lo ni ida mọkandinlogoji ninu ọgọrun awọn ọmọ orilẹ-ede Naijiria ni wọn lanfani si ile igbọnsẹ to jẹ pe idile kan nikan lo n lo o.
"Lai si ile igbọnsẹ, ọranyan ni fun awọn eeyan lati wa ibi ti wọn yoo tura si; ita gbangba si ni ọna abayọ niru ipenija bẹẹ, eleyi si lee fa ọpọ arun bii igbẹ gbuuru, ọnigbameji tabi iba pọnju-pọntọ"
Ọga agba UNICEF naa ṣalaye pe, "ẹgbẹrun mejilelọgọfa awọn ọmọ orilẹ-ede Naijiria, ninu eyi ti ẹgbẹ mẹtadinlaadọrun ti jẹ ọmọ wẹwẹ, ni aisan igbẹ gbuuru n ran lọ sọrun lọdọọdun; bẹẹ ni biliọnu marundinlẹẹdẹgbẹta naira ni orilẹ-ede Naijiria n padanu lọdun nitori aisi imọtoto to yẹ".
