Ijọba Nàìjíríà pinnu láti dá àwọn èèyàn lókowò N10,000

Ọṣinbajo ni káàdì ìdìbò kọ́ ni wan a fi san ẹgbẹrun mẹwaa náà fáwọn ènìyàn.

Ijọba Naijiria ti kede pe wọn yoo pese ẹgbẹrun mẹwaa owo iranwọ fawọn oniṣowo keekeeke jakejado Naijiria.

Lẹyin tijọba ṣe ìkede yii ni BBC jade lọ ṣe iwadii oriṣii irufẹ ọja tabi okòwò ti èèyàn le fi ẹgbẹrun mẹwaa naira ṣe lasiko yii pẹlu bi ìta ṣe rí.

Ọpọlọpọ lara awọn ti BBC ba sọrọ ni àwọn ti sẹ okowo loriṣii pẹlu owo ti kò to ẹgbẹrun mewaa naira sẹyin.

Díẹ̀ lára àwọn okòwò tí ó ṣeéṣe lásìkò yi pẹlu N10,000

Iwadii BBC fihan pe eniyan le maa ta aṣọ àlòkù oyinbo ti àwọn kan n pe ni òkìrìkà ni ẹyọ.

Awọn mii gba pe ẹni ti kò ba ni itiju iṣẹ le maa ta èso bii ọsan, ibẹpẹ, ọ̀pẹ̀ oyinbo àti bẹẹ bẹẹ lọ.

Àwọn oniṣowo kan sọro lori tita ohun mimu tutu bii ẹlẹrindodo ati omi tutu ninu ọ̀rá àti nínú ike.

Ero awọn miran ni síse ounjẹ ta nitori wi pe, ojumọ kan kò ni mọ́ ki ẹnu má gba ẹbọ ounjẹ.

Imọran àwọn oniṣowo mii ni pe ki wọn maa ta àwọtẹlẹ obinrin bii kọ́mú àti pátá àti tọkunrin naa ni èrè lórí ti ko si nilo owó okowo to pọ ju.

Igbagbọ awọn mii nipe àtẹlẹwọ́ ẹni kìí tan ni jẹ. Pe iṣẹ́ ọwọ́ ni o yẹ ki èèyàn fi ẹgbẹrun mẹwaa naa dá silẹ̀ ki o le maa mu owó wole sii.

Oriṣi iṣẹ ọwọ bii aránṣọ, irun gigẹ, irun dídì, kafinta àti bẹẹ bẹẹ lọ.

Omiran tun ni iṣẹ alagbafọ aṣọ fifọ ni eyi to dabi apọnmita ti ko le kuna loju awọn kan.