Jigan Baba Oja: Àṣírí tí ẹ kò mọ̀ rèé nípa ohun tó sọ mí di ẹlẹ́sẹ̀ kan

Gbajumọ oṣerekunrin, Abimbola Kazeem, Jigan Baba Oja ti kede pe kii ṣe abinibi ni ẹsẹ to n dun.

Oserekunrin naa to gbajumọ ninu ere tiata Yoruba, paapaa fun aṣa 'So mọ age mi ni' lasiko diẹ sẹyin, sọ eyi ninu ifọrọwanilẹnuwo kan to ṣe pẹlu tẹlifisan ori ayelujara Ojopagogo TV.

Jigan sọ pe wọn ko bi oun ni ẹni ti ko le fi ẹsẹ kan rin, o ni nigba ti oun wa ni ọmọ ọdun meje, aisan kan ṣe oun.

Àwọn iròyin tì ẹ leè ní ìfẹ̀ síí:

Aisan naa sọ ọ di ero ileewosan, to si jẹ pe abẹrẹ ti wọn fun lati tọju aisan naa lo pada sọ ọ di ẹni ti ko le fi ẹsẹ kan rin mọ.

O ṣalaye pe gẹgẹ bi oṣere, ọpọlọpọ ere ni oun ni agbara ati ọgbọn lati ṣe, ṣugbọn wọn ki fun oun ni iru iṣẹ bẹẹ nitori pe wọn n 'ṣaanu ẹsẹ oun".

Eyi to n jẹ idiwọ fun bo ṣe yẹ ko ga to nidi iṣẹ tiata.

O ni agbegbe Shomolu nipinlẹ Eko ni wọn bi oun si, to si lọ si ile ẹkọ alakọbẹrẹ ati girama nipinlẹ Eko bakan naa.

O lọ si fasiti Olabisi Onabanjo, Ago-Iwoye nipinlẹ Ogun fun eto ẹkọ giga, to si kẹkọ gboye nibẹ pẹlu.

Nipa nkan to gbe e de idi iṣẹ tiata, Jigan Baba Oja sọ pe lati kekere ni oun ti fẹran lati ma a kọrin Fuji, ti oun si ni awọn ọmọ ẹgbẹ.

O ni koda, wọn ma n pe oun si ibi ayẹyẹ fun orin kikọ, eyi si lo ni o jẹ ki oun mọ pe iṣẹ amuludun ni oun yoo ṣe.

Jigan sọ pe oun tun bẹrẹ orin takasufe 'hip pop', ko to o tun pada si idi orin Fuji.

O fikun ọrọ rẹ pe oun ma n kọkọ kọrin ni agbo ti Wasiu Alabi Pasuma ba ti fẹ ẹ kọrin.

O ni agbo Paso l'oun ti pade awọn oṣere loriṣiriṣi, eyi to mu ko pinnu lati darapọ mọ wọn pe boya okiki oun naa yoo yọ.