Сребреница қатлиомининг қурбонлари хотирланмоқда

Босния Сребреницасига ўн минглаб кишилар бундан 20 йил олдинги қатлиом қурбонларини хотирлаш маросимига йиғилганлар.

Югославия парчаланаётган пайтда кечаётган урушда Босния серблари 8000 мусулмон эркак ва ўғил болалар Сребреницада отиб ўлдирган эдилар.

11 июл куни ДНК текширувлари натижасида шахси аниқланган 136 қурбоннинг жасади қолдиқлари ҳам дафн этилади.

Сребреницадаги хотира маросимларига дунёнинг кўплаб сиёсатчилари иштирок этишлари хабар қилинган.

Улар орасида Оврўпо Иттифоқи Ташқи сиёсат идораси раҳбари Федерика Могерини, собиқ АҚШ президенти Билл Клинтон, Туркия Бош вазири Аҳмед Довутўғли, Сербия Бош вазири Александр Вучич ва бошқалар бўлишлари айтилган.

Хотира маросимига Сербия Бош вазири Александр Вучич ҳам борган, бироқ ғазабнок оломон тошлар отиб Сербия бош вазирини қувиб солганлар.

Жаноб Вучич бундан олдин хотира китобига ўз таъзиясини ёзган.

"Сербия ушбу даҳшатли жиноятни қоралайди ва бунда иштирок этганларни тутиш ва адлияга топшириш ишида давом этади", деб ёзган Вучич қатлиом сўзини ишлатишдан қочган.

Ўша пайтда Америка президенти бўлган Билл Клинтон хотира маросимларида қатнашган ва ўша урушни охирига етказиш узоққа чўзилгани учун кечирим сўраган.

"Мен бундан кейин ҳеч қачон бундай қотиллик майдонини кўришни хоҳламайман", деб айтган жаноб Клинтон.

Қирғин 20 йиллиги арафасида рамзий юриш ташкил этилган, унда 10 мингтача одам иштирок этган.

Ҳар йили Сребреницадан 1995 йили қочишга ҳаракат қилган инсонлар юрган йўлдан марш ўтказилади.

Оврўпода Холокостдан кейинги энг катта ваҳшийлик бўлган Сребреницада уч кун ичида 13 ёшдан 77 ёшгача босниялик 8000 мусулмон эркак ва болалар қатл этилган.

Сребреница ҳамда Сараевода содир этилган жиноятлар Иккинчи Жаҳон урушидан кейинги энг жиддий ҳарбий жиноятлар ҳисобланади.

БМТ тинчликпарвар кучлари назоратида бўлган Сребреница анклави 1995 йил 6 июлида Босния сербларининг генерали Ратко Младич раҳбарлигидаги қўшинлари томонидан босиб олинган ва қуролсиз инсонлар қатлиом қилинган.

Генерал Ратко Младич 2011 йилда ҳибсга олинган.

Ҳозирги пайтда Ҳолланиядаги Гаага трибуналида унинг устидан маҳкама давом этаяпти.

Бундан 20 йил олдинги қатлиомда гумон қилинаётган бошқа шахслар Сербия ва бошқа қўшни мамлакатларда қидирилмоқда, деб айтганлар прокурорлар.

8 июл куни БМТ Хавфсизлик Кенгаши Сребреница қатлиоми масаласини кўриб чиқди.

Унда ушбу жиноятларни геноцид деб тан олишга қарор қилинди.

Бироқ Россия БМТ Хавфсизлик Кенгашининг Сребреница қирғинини геноцид деб тан олиш ҳақидаги резолюцияга вето киритди.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

Instagram – BBC UZBEK

Twitter – BBC UZBEK

Odnoklassniki – BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio