АҚШ Исроил ҳукуматига яна 1 миллиард долларлик ҳарбий ёрдам бермоқчи

Оқ уй Конгрессга Исроилнинг Рафаҳ ҳужуми юзасидан босимга қарамай, Исроилга 1 миллиард доллардан ортиқ қийматга эга қурол жўнатмоқчи эканлигини айтди.

Рейтерс ахборот агентлигининг хабар беришича, пакетга танк ўқлари, миномётлар ва зирҳли тактик машиналар киради.

Би-Би-Cининг АҚШдаги ҳамкори Cи-Би-Си билан суҳбатда Конгресс ёрдамчиси томонидан тасдиқланган бу режа ҳали қонунчилар тасдиғидан ўтиши керак.

Ўтган ҳафта Президент Байден, агар Исроил Рафаҳга катта босқин бошласа, қурол-яроғ етказиб беришни тўхтатишини айтганди.

Сешанба куни Исроил танклари Ғазо шаҳрининг жануби-шарқидаги аҳоли ҳудудларига чуқурроқ кириб борди, дейди Рейтерс агентлиги.

Байден ўтган ҳафта 900 кг оғирликдаги бомбаларни қуруқликдаги операцияда қандай ишлатилиши мумкинлиги сабабли Исроилга жўнатишни кечиктирганини айтди.

Cи-Эн-Эн телеканалининг кечикиш ҳақидаги саволига жаноб Байден шундай жавоб қилган: "Бу бомбалар оқибатида Ғазода тинч аҳоли ҳалок бўлди".

Конгрессга юборилаётган пакет жаноб Байден маъмурияти ўтган ҳафта Исроилга қурол-яроғ етказиб беришни тўхтатганидан бери биринчи пакетдир.

Ассошиэйтед Пресс ахборот агентлиги маълумотларига кўра, у 700 миллион долларлик танк ўқ-дорилари, 500 миллион долларлик тактик машиналар ва 60 миллион долларлик миномётларни ўз ичига олади.

Жума куни АҚШ Давлат департаменти чиқарган ҳисобот Исроилга берилган Америкада ишлаб чиқарилган баъзи қуроллар халқаро ҳуқуқни бузган ҳолда ишлатилган бўлиши мумкинлигини билдирди.

Ҳисобот Исроилнинг Ғазодаги баъзи операцияларини очиқдан-очиқ танқид қилган бўлса-да, Исроил Мудофаа Кучлари (ИДФ) амалиётлари халқаро қонунларни бузганлигини аниқ айтишдан тийилган.

Унда қўшимча қилинишича, АҚШ қуролларидан қонуний фойдаланишга риоя қилиш бўйича Исроилдан "ишончли" кафолатлар олинган.

Ўтган ой Конгресс Исроил, Украина ва Тайванга 95 миллиард долларлик ёрдам кўрсатишни назарда тутувчи қонун лойиҳасини қабул қилганди.

2024 йил ноябр ойида бўлиб ўтадиган президентлик сайловлари олдидан Исроилга қурол-яроғ етказиб бериш масаласи Байден учун сиёсий бошоғриққа айланди.

Сўнгги қурол пакети ҳақидаги хабар Мериленд штатида бўлиб ўтган президентлик сайловларининг праймери босқичидаги овоз бериш якунланганидан кўп ўтмай пайдо бўлди. У ерда фаоллар сайловчиларни Байденнинг Ғазо уруши бўйича Исроилга нисбатан хайрихоҳлигига қарши норозилик бюллетенини рўйхатдан ўтказишга чақиришди.

Конгрессдаги республикачи қонунчилар Исроилга қурол-яроғ етказиб беришда кейинги кечикишларнинг олдини олишга қаратилган қонун лойиҳасини киритдилар.

Вакиллар палатаси шу ҳафтада давлат департаменти ва мудофаа департаментидан ҳарбий техниканинг "тезкор етказиб берилишини" таъминлашни талаб қилувчи чорани овозга қўяди.

Оқ уй агар қонун лойиҳаси Сенатдан ўтишга муваффақ бўлса, унга вето қўйишга ваъда берди, бу эса даргумон.

Исроил 7 октябр куни Ҳамаснинг Исроил жанубига чегара оша қилган ҳужумига жавобан ушбу гуруҳни йўқ қилиш учун ҳарбий кампания бошлаган. Ҳамас ҳужумида 1200 га яқин одам ҳалок бўлган, яна 252 киши гаровга олинганди.

Ғазонинг Ҳамас томонидан бошқариладиган соғлиқни сақлаш вазирлиги маълумотларига кўра, ўшандан бери Ғазода 35 170 дан ортиқ одам, жумладан, сўнгги 24 соат ичида 82 киши ҳалок бўлган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002