Ёш, гей ва гапга уста: Франциянинг янги бош вазири ҳақида нималар маълум? Янгиликлар Yangiliklar

Эммануэл Макрон ўз президентлигини янги ҳукумат билан жонлантириш мақсадида Габриэл Аттални Франция Бош вазири этиб тайинлади.

Аттал бу лавозимда 20 ой ишлаган Элизабет Борннинг ўрнини эгаллаяпти.

Алоқадор мавзулар:

Макрон ва Ўзбекистон: Франция президенти нима учун Марказий Осиёга ёқишга уриняпти? - Янгиликлар

Туркия ва Франция жанжалига фақат Ислом дини сабабми? Dunyo Yangiliklar Turkiya

Макрон Буратино каби ёки Озарбайжон Франциядаги инсон ҳуқуқларидан нега хавотирда?

Келишган, ёш, жозибадор, ишончли ва омманинг катта дастагига эга Аттал ўзининг устози Макрон бир вақтлар президентликка келгани каби ҳукумат тепасига қарсаклар остида чиқмоқда.

Хўш, Аттал ҳақида нималар маълум?

Ёш сиёсатчи

34 яшар Габриэл Аттал Франция тарихидаги энг ёш бош вазир бўлмоқда. 1984 йилда социалист Лорон Фабиус бош вазир бўлганида 37 ёшида эди.

Атталнинг ўсиши тез юз берди. Ўн йил аввал у Соғлиқни сақлаш вазирлигида ҳеч ким танимайдиган маслаҳатчи ва Социалистлар аъзоси эди.

2017 йилги президентлик сайловлари арафасида Аттал парламент аъзоси бўлиб сайланди. У тезда парламентдаги қизғин чиқишлари билан Макроннинг нигоҳига тушди.

29 ёшида унга Таълим вазирлигида лавозим берилди, 2020 йилда ҳукумат воизи этиб тайинланиши ортидан эса сайловчилар уни таний бошлашди.

Ҳар қандай мавзуда маҳорат билан муносабат билдириши билан у "Сўз мергани" деган лақабни ишлаб олди.

2022 йилги сайловларда Президент Макрон қайта сайланиши ортидан, Аттал қисқа вақт Бюджет вазири, июль ойидан эса Таълим ваъзири бўлиб тайинланди.

Таълим ваъзири лавозимида у Макронга сиёсатчи сифатида ўз қатъиятини намойиш қилди - у мусулмонлар абая кўйлаклари борасида чиққан можарони шунчаки бу кўйлакларни мактабда таъқиқлаш билан қарори билан ечди.

Келиб чиқиши

Аттал тунислик яҳудий ҳуқуқшунос ва филм продюсери Ив Атталнинг ўғли.

Унинг онаси Мари де Курисс эса Одесса православ насронийларининг авлоди.

Аттал телевизон интервюда ўз ота-онасининг ажрашишидан жабр чекканини гапирган. Отаси Ив Аттал 2015 йилда оламдан ўтган.

Габриэл Парижда уч синглиси билан катта бўлган ва нуфузли хусусий École Alsacienne мактабида ўқиган.

2019 йилда Liberation билан қилган интервюсида у шундай деган: "Отам менга айтганди, балки сен православдирсан, лекин сен бутун умр ўзингни яҳудийдек ҳис қиласан, чунки асосан фамилиянг туфайли сен антисемитизмга учрайсан."

Жинсий йўналиши

Габриэл Аттал Франциянинг илк очиқчасига гомосексуал бош вазири бўлмоқда. У Президент Макроннинг яна бир шогирдларидан бири, Европа парламентининг аъзоси 38 ёшли Стефан Сежурн билан турмуш қурган.

Жинсий озчиликлар Францияда 2013 йилдан бери турмуш қуриш ҳуқуқига эгалар.

Матбуотдаги баъзи хабарларга кўра, улар ҳозирда бирга яшамайдилар, лекин ажрашувни очиқ эълон қилмаганлар.

Аттал 2018 йилда Макроннинг илк президентлик муддати давомида вазирликка ишга олинганида ўзининг дўсти томонидан жинсий ориентацияси оммага ошкор қилинганини айтган.

Буллинг қурбони

Габриэл Аттал буллинг, яъни камситилиш ва сиқувга олишларга қарши чиқишлари билан ҳам танилган.

Таълим вазири лавозимида у Президент Макроннинг рафиқаси Брижит Макрон билан бирга мактабларда буллингни йўқ қилиш йўлида бирга ишлаганлар.

Макрон хоним унинг ўқувчилар учун мажбурий формани татбиқ қилиш қарорини қўллаб-қувватлаган.

У École alsacienne мактабида ўқиётганида ўзи ҳам буллинг қурбони бўлганини айтган.

Яқинда у машҳур телешоудаги чиқишида мактабда ўз синфдоши томонидан қандай буллингга учраганини айтиб берган.

Унинг айтишича, синфдоши ўз интернет блогида синфдагиларнинг қоматини солиштирган ва унинг устидан кулган.

Politico ёзишича, Аттал гей бўлгани учун ўз синфдоши томонидан буллинг қилинганини айтган.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002