Янгиликлар: Педофиллар сунъий ақл ёрдамида қўшиқчилар ва киноюлдузларни болага айлантирмоқда Dunyo, Ilm-fan
Сурат манбаси, Getty Images
- Author, Жо Тайди
- Role, Кибер хавфсизлик мухбири
Педофиллар сунъий ақл (СА) ёрдамида машҳурларнинг ёш болача қиёфасини чизмоқда.
Интернетни мониторинг қилувчи ташкилот - The Internet Watch Foundation (IWF) билдиришича, машҳур аёл қўшиқчининг бола сифатида қайта ўзгартирилган сурати интернет "йиртқичлари" орасида кенг тарқатилган.
Ташкилот айтишича, қора тармоқда (darknet - интернетнинг назоратдан четдаги, аноним фойдаланувчилардан иборат қисми) актёрларнинг бола қиёфасидаги суратлари тағин ўзгартирилиб, шаҳвоний қиёфага киритилмоқда.
Жинсий таҳқирланган болаларнинг юзлаб суратлари ҳам махсус тасвир генераторлари ёрдамида яратилиб тарқатилмоқда.
IWF'нинг охирги ҳисоботида берилган айрим тафсилотлар муаммо ўсиб бораётганини кўрсатади. Ташкилот педофилларнинг оддий кўрсатмалар орқали СА ёрдамида тасвирлар яратиши оқибатларидан огоҳликка чақирмоқда.
Бу тасвир яратувчи тизимлар омма ихтиёрига ўтиб борар экан, тадқиқотчилар улар ноқонуний тасвир яратишда ҳам қўлланиши мумкинлиги ҳақида гапирмоқда.
Май ойида Британия ички ишлар вазири Суэлла Браверман ва АҚШ ички ишлар вазири Алехандро Майоркас "педофиллар қурбони бўлган болаларнинг СА ёрдамида яратилган ёқимсиз суратлари кескин кўпайгани"га қарши биргаликда курашиш ҳақида баёнот чиқарди.
IWF ҳисоботида тадқиқотчилар даркнетдаги болаларни таҳқирловчи бир вебсайтга СА тасвирини киритгач, қандай қилиб Британияда тақиқланган 3000 синтетик тасвир пайдо бўлгани тафсилотлари берилган.
Таҳлилчилар айтишича, "йиртқичлар" бирор жинсий таҳқирланган боланинг суратини олиб, ундан кўплаб шаҳвоний суратлар улашиши кенг тарқалган.
Улар топган бир папкада 9-10 ёшида жинсий таҳқирланган қизчаларнинг 501 та сурати тўпланган экан.
IWF айтишича, айрим суратлар, жумладан, машҳурларнинг суратлари ҳам шу қадар реалистик чиққанки, оддий одам уларни ажрата олмайди.
Таҳлилчилар асосан аёл қўшиқчилар ва киноюлдузларнинг СА ёрдамида болага айлантирилган суратларини кўришган.
Ҳисоботда айнан қайси машҳур шахс нишонга олингани аниқ кўрсатилмаган.
Ташкилот айтишича, у ўз тадқиқоти хулосаларини Британия ҳукуматига тақдим қилган ва ҳукумат бу масалани келаси ҳафта Блечли Паркда ўтадиган Сунъий ақл саммитида кўтаришини истайди.
Бир ойда, IWF аниқлашича, 11108 та СА тасвирлар даркнетдаги педофиллар форумида улашилган.
- Шулардан 2978 таси Британия қонунларини бузади, яъни уларда бола таҳқирланиши тасвирланган.
- Бу тасвирларнинг ҳар бештадан биттаси (564) A категорияга киритилган, яъни жуда жиддий хавотирга солувчи тасвирлардир.
- Уларнинг ярмидан кўпи (1372) бошланғич синфлар болалариники (7-10 ёш)
- Шу билан бирга, 143 та тасвир учдан олти ёшгача болаларники, иккитасида чақалоқ тасвирланган (2 ёшдан кичик).
- Июн ойида IWF "йиртқичлар" болалар тасвирларини яратиш учун САдан фойдаланаётгани ҳақида гапирган эди, ҳозирга келиб бу реал воқеликка айланганини айтмоқда.
"Энг ёмон тахминларимиз юзага чиқяпти," дейди IWF директори Суси Ҳаргривес.
"Жорий йил бошида СА тасвирлари жинсий таҳқирланган болаларнинг ҳақиқий суратларидан фарқланмай қолиши ҳақида огоҳлантирган эдик, ҳозир бундай суратлар кенгроқ тарқалаётганини кўряпмиз."
IWF ҳисоботи СА тасвирларининг реал хавфидан огоҳлантиради. Гарчи бу тасвирлар тайёрланишида болаларга бевосита зарар тегмаса ҳам, улар бузуқ хулқни нормал ҳолга айлантиради, полиция эса асли йўқ бола тасвирини тергов қилиш учун ресурс сарфлайди.
Айрим вазиятларда янги турдаги қонунбузарликлар пайдо бўлади ва бу ҳуқуқ тартибот органлари ишини янада мураккаблаштиради.
Масалан, IWF моделлар агентлигидан олинган яланғоч бўлмаган икки қизнинг юзлаб суратларини топган ва улар ўзгартирилиб, тарқатилган ва А категория тасвирларга қўшилган.
Ҳозир бу қизлар А категорияга кирувчи таҳқир қурбони бўлиб қолган, аммо бу таҳқирнинг ўзи реал ҳаётда бўлмаган.
https://t.me/bbcuzbek
BBC.COM/UZBEK
Telegramda bog'lanish raqami +44 7858860002
