Ғарбнинг Украинага бераётган қуроли тугаяпти, Америка Путин ғалаба қозонишидан хавотирга тушдими? Yangiliklar, Urush

Ғарб давлатлари Украинага етказиб бериш учун қурол-яроқнинг туби кўриниб қолаётганидан огоҳлантирди. АҚШ илк бор давлат бюджетини Украинага ёрдам пакетисиз қабул қилди.

Ўз ерларини Россия босқинидан ҳимоя қилаётган Украина ҳар куни минглаб артиллерия снарядлари отади. Уларнинг аксар қисми НАТОга аъзо давлатларнинг захирасидан келади.

Россия уруш бошлагандан бери Британия Украинага 300 минг снаряд берди бўлса, АҚШ 2 миллиондан ортиқ етказган. Бироқ ғарблик иттифоқдошлар ўз захираларини тўлдиришда қийналаётган кўринади.

НАТО ҳарбий қўмитаси раҳбари, адмирал Роб Бауэр Варшавадаги хавфсизлик бўйича форумда сармоя етишмаётганини таъкидлади.

"Саноат ишлаб чиқаришни янада юқори суъратга чиқариши керак. Бизга янада кўпроқ керак", деган у.

Швеция Мудофаа вазири Поп Йонсон Европа "захираларининг туби кўриниб қолганини" айтди.

Британия Мудофаа вазири Жеймс Ҳиппи қурол-яроқ "захираси камайиб" қолганини билдирган ва НАТОдаги ҳамкорларини ўз зиммасига олганидек, мудофаа учун ИЯМнинг 2% ни сарфлашга чақирган.

Сўнгги ойларда Ғарб давлатлари тажриба алмашиш ва ўзаро шартнома тузиш эвазига ишлаб чиқаришни кўпайтириш режасини маъқуллашганди. Аммо, афтидан, жараён секин кечаётган кўринади. Бу Украина жанубида кечаётган қонли жангларга жиддий таъсир кўрсатиши мумкин.

Россия босқинида Украини мунтазам қўллаш АҚШ учун ҳам осон кечмаяпти. АҚШ бюджети илк маротаба Украинага ёрдам пакетисиз қабул қилинди.

Тортишувлардан сўнг парламентдаги депутатлар сўнгги кунга келиб 45 кунлик бюджетни Украинага ёрдамсиз қабул қилишга келишишган.

Парламентдаги икки партия ҳам Украинага ёрдам борасида алоҳида келишув бўлишини таъкидлаётган бўлса-да, айни дамда бу масала кун тартибида кўндаланг турибди.

Ушбу хавотирлар ортидан АҚШ президенти Жо Байден НАТО ва Европа Иттифоқидаги иттифоқдош давлатлар раҳбарлари билан гаплашган.

Байден Америка Украинани дастаклашда давом этишини ва ёрдам бериш кўлами тушиши Россияга куч бағишлаб, можаро кўлами янада кенгайиб кетишига олиб келиши мумкинлигидан огоҳлантирган.

"Президент Байден ҳар қандай шароитларда ҳам Американинг Украинага ёрдами тўхтаб қолишига йўл қўймаслигимизни таъкидлади", деган Оқ уй миллий хавфсизлик вакили Жо Кирби.

Кирбининг таъкидлашича, Украинанинг жанг учун талабларини "маълум муддат" қаноатлантириш учун АҚШ етарли маблағ ажратган. Бироқ узлуксиз ёрдам таклиф қилиш учун Конгресснинг дастаги керак бўлади. У Американинг Украина учун "бир неча ойга етадиган" ҳарбий таъминоти борлигини таъкидлаган.

Кирби олдинроқ Байден Украина дастагига тўсқинлик қилишда танқид қилган парламентдаги Республикачиларнинг кичик гуруҳини яна бир бор айблаган ва шу билан бирга, республикачиларнинг кўпчилиги мамлакатни қўллаб-қувватлаётганини таъкидлаган.

"Дастаклашдаги бундай узилиш Путинни пайт пойлашга ишонтириши ва биз ҳамда иттифоқчиларимиз таслим бўлмагунимизча можарони давом эттиришига олиб келиши мумкин", деган Кирби.

У, шунингдек, бу Путиннинг ғалабаси билан тугашига олиб келишини таъкидланган.

Жо Кирби Украинани ўз ҳолига ташлаб қўйиш Путиннинг "ёлғонларини" тасдиқлаш билан тенглигини урғулаган.

"Агар Украинадан ҳозир чиқиб кетсак, мантиқан унинг ёлғонини тасдиқлаймиз. Биз унга "Биласанми, Путин, сен ҳақсан, биз ноҳақ эканмиз. Сен бу ерда жабрландинг" деган бўламиз", деган Кирби.

У буни "даҳшатли" деган ва Путиннинг урушни бошлашдаги ёлғон ҳикоясига қўл келишини айтган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002