Янгиликлар. Россия: Пригожинга очилган жиноий иш ёпилди. Путин "хоин"ларни кечирдими? Video Rossiya Putin Yangiliklar

Россия Федерал хавфсизлик хизмати Евгений Пригожинга нисбатан ўзи очган қуролли исён ҳақидаги жиноий ишни ёпди. Путин қуролли жангчилари билан Россия шаҳарларини бирин-кетин эгаллаб, Москвага юриш қилган "Вагнер"чилар билан тўқнашувда ҳалок бўлган ҳарбий учувчиларни хотирлади.

Федерал хавфсизлик хизмати "Вагнер томонидан қуролли исён факти бўйича олчилган жиноий иш тўхтатилди", деган.

"Унинг иштирокчилари 24 июн куни бевосита жиноят содир қилишга қаратилган ҳаракатини тўхтатгани аниқланди", дейилади расмий хабарда.

Бу вақтда эса Президент Владимир Путин Кремлда 2,5 мингдан ортиқ ҳарбий, ҳуқуқ тартибот органи ходимлари ва бошқа куч тизимлари билан учрашган.

Путин куч тизимлари Россияда "фуқаролик урушини тўхтат"ганини айтиб, миннатдорчилик билдирган.

Россия давлат раҳбари исён давомида ҳалок бўлган россиялик ҳарбий учувчиларнинг ҳурматига 1 дақиқа сукут сақлаган.

Путин "Вагнер" хусусий ҳарбий компанияси тўлиқ давлат томонидан молиялаштирилганини тан олди.

Россия президентига кўра, ўтган йилнинг май ойидан шу йилнинг май ойигача давлат "Вагнер"га 86 миллиард рубль (1 миллиард доллардан ошиқ) тўлаган.

"Вагнер"нинг эгаси "Конкорд" эса ҳарбий савдо орқали 80 миллиард рубль фойда қилган.

"Конкорд" Евгений Пригожинга қарашли, аммо Путин чиқишлари давомида Пригожин номини тилга олмаган.

Пригожин ғалаёни билан боғлиқ ҳодисалардан кейин Президент Путин ўзининг мавқеъини мустаҳкамлашга ҳаракат қилмоқда.

У халққа теле-мурожаат билан чиқди ва сўнг хавфсизлик қўмондонлари билан мажлис ўтказди.

"Россияда ҳар қандай тартибсизлик барибир бостирилган бўларди", деди у.

"Исён раҳбарлари адолат олдида жавоб берадилар, лекин Вагнер жангчилари хоҳласа, Россия армиясига қўшилсин, хоҳласа, оиласига қайтсин, хоҳласа Беларусга кетсинлар", деган Путин.

Бироқ Би-би-си Россия муҳаррирининг айтишича, Президент Путиндан хусусий Вагнер армиясининг қисқа фурсатли ғалаёни туфайли келиб чиққан масалаларни ҳал этиши талаб қилинади.

Грэҳам Сатчел

Би-би-си

Владимир Путин шанбадан буён кўриниш бермади, бироқ душанба тунида хавфсизлик раҳбарларини мажлисга чақирди.

Халққа мурожаатида россияликларга раҳмат айтди, "хиёнатга қарши туриб берганингиз учун", деди.

"Бу фуқароларимиз ватанпарварлиги бўлди - бутун Россия жамиятининг бирлашгани ушбу ҳодисаларда ҳал этувчи роль ўйнади. Ушбу дастак ватанимиз дуч келган энг мушкул қаршиликни енгиб ўтишда ёрдам берди. Бунинг учун сизга раҳмат", деган у.

Драматик ҳодисаларда ёлланма Вагнер жангчилари танкларга ўтириб, Россия жанубидаги шаҳарларни қўлга олди, сўнг Москва томон юриш бошладилар.

Бу тўлақонли ҳарбий давлат тўнтаришига ўхшар эди.

Лекин у қандай тез бошланган бўлса, тўсатдан шундай тез тугади.

Сўнг Вагнер раҳбари Евгений Пригожин ушбу хабарни тарқатди.

"Биз ўз норозилигимизни изҳор этиш учун юриш қилдик - мамлакатда ҳокимиятни ағдариш учун эмас. Юриш мақсади - Вагнер гуруҳи тарқатиб юборилишининг олдини олиш, Украинадаги махсус ҳарбий амалиётда хатога йўл қўйганларни жазолаш эди", деган Пригожин.

Хўш, бундан қандай хулоса келиб чиқади?

Россия давлат телевизиони мамлакат Президент Путин ортида бирлашди, деди, ғалаённи Ғарб ташвиқоти учун мўлжалланган ҳодиса деб танқид этди.

Бироқ Москвада нашр қилинган рўзномалар очиқчасига Россиянинг заифлиги ва Владимир Путинга қарши намойиш этилган мисли кўрилмаган қаршилик ҳақида ёздилар.

"23 йиллик бошқарувдан кейин сен реаллик туйғусини йўқотасан. Ҳамма нарса марказлаштирилган, ҳамма одам фақат сенинг фармонингни бажарадиган бундай улкан мамлакатда реалликдан узоқлашмаслик учун ақл бовар қилмас даражада буюк одам бўлиш керак", дейди Нина Хрушчева

Россия Мудофаа вазирлиги Қора денгиз осмонида Британия жосуслик учоғи парвози деб видео намойиш этди.

Россия иддаосича, Британ учоғини ўз ҳудудидан қувиб чиқарган.

Британия Мудофаа вазирлиги, «учоқ халқаро ҳаво маконида эди», деди.

Ерда эса Украина Президенти Зеленский Бахмутга бориб, у ердаги жангларда қатнашган аскарларни медаллар билан мукофотлади.

Зеленский аскарларни қаҳрамонлар деб атаб, хизматлари учун миннатдорлик билдирди.

Украина бу урушда секинлик билан ўз ҳудудларини қайтариб олаяпти.

Ва Украина Россиядаги тартибсизликлар ўз ерларини қайтиб олишига ёрдамлашишига умид қилади.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002