Украина уруши: Қрим кўпригига зарба, Украина ҳали ҳақиқий қарши ҳужумини бошлагани йўқми? Янгиликлар Dunyo Yangiliklar

Россиянинг Херсон вилояти бўйича раҳбари Владимир Сальдо Қрим ярим оролини қуруқлик билан боғлайдиган Сиваш бўғозидаги кўприклар ракета ҳужумларига тутилганини хабар қилди.

Украина қуролли кучлари Британиядан олган Storm Shadow ракеталари билан Чонгар деган жойдаги кўприкларни нишонга олган.

Чонгар йўли Қримни қуруқликдаги Мелитополь билан билан боғлайдиган энг қисқа йўл.

Сальдо кўприкларга шикаст етгани, лекин Қрим билан бошқа йўллар орқали қатнов давом этаётганини айтди.

Қримни Россия 2014 йили аннексия қилган, Керч орқали янги автомобиль ва темир йўллари барпо этган.

Қрим Россия қўшинларини қурол-яроғ билан таъминлайдиган, ярадор ҳарбийларини даволайдиган муҳим нуқта бўлиб турипти.

Украина ўзининг ҳудудларини тўла, шу жумладан, Қримни ҳам ўз назоратига олишга қарор қилган.

Шунинг учун ҳам Россия Қримда мустаҳкам мудофаа иншоотлари, бир неча қаторли хандақлар тизимларини қуришда давом этаяпти, соҳилларни миналаштирган.

АҚШдаги Урушни ўрганиш институти (ISW) Украинанинг контр ҳужуми атрофидаги вазиятни кузатиб бораяпти, Украина расмийларининг сўнгги баёнотларидан келиб чиқиб, ҳали тўлақонли қарши ҳужумини бошламаган, деган қарор қелди.

ISW сўнгги ҳисоботида ёзишича, Украина армиясининг секин олдинга силжиётгани сабаби, бу ҳаракатлари фақат йирик қарши ҳужумга тайёргарлик, деган хулосага келган.

"Эҳтимолки, Украина армияси бир неча ҳужум амалиётлари билан Россия кучларининг силласини қуритмоқчи ва келажакдаги асосий зарба учун шароит тайёрлаяпти", дейилади Урушни ўрганиш институтининг сўнгги ҳисоботида.

Украина Президенти Володимир Зеленский эълон қилишича, Украина жосуслик хизматлари Россия Запорожия Атом электр станциясида террорчилик ҳужумини ўйлаб кўраётгани ҳақидаги маълумотга эга бўлган.

Украина ўзида бор жами ахборотни дунёга тарқатишини айтди Президент Зеленский.

"Европа, Америка, Хитой, Бразилия, Ҳиндистон, Араб дунёси, Африка - ҳамма мамлакатлар, буткул ҳамма бу ҳақда билиши керак. Бу гал Каховкадагидек бўлмаслиги керак: дунё гоҳлантирилди, демакки, дунё ҳаракат қилолади ва қилиши шарт", - деган Президент Зеленский.

Кремль матбуот коти Дмитрий Песков Зеленский баёнотига "навбатдаги ёлғон" деб муносабат билдирди.

Россия матбуоти яна ядровий ҳужум мавзусини муҳокама этмоқда.

Яқинда россиялик мафкурачилардан бири Сергей Караганов огоҳлантирувчи ядровий зарба билан Россияга қарши чиқаётганларнинг "ақлини киргизиб қўйиш" таклифи илгари сурилган мақола эълон қилди.

Россиянинг "Коммерсант" рўзномаси Карагановнинг ғояси маъқул ғоя эмаслиги ҳақида мақола чоп этди.

Яқинда Россия тактик ядровий каллакларини Беларусда жойлаштиргани ҳақида Президент Лукашенко ва Президент Путин хабар қилдилар, аксар таҳлилчилар фикрича, ушбу ядровий пўписалардан кўзланган мақсад, Ғарбдаги оддий одамларни қўрқитиб қўйиш, ўзларининг тинч ҳаёти бузилиши эҳтимолидан қўрққан маҳаллий жамоатчилик ўз сиёсатчиларига таъсир ўтказиб, Украинани ҳарбий ва молиявий қўллаб-қувватлашдан воз кечилишига эришиш.

Бу ҳақда таҳлил қиларкан, ВВС мухбири Стив Розенберг, Россия ядровий тугмани босадими, деган савол 2022 йил 24 феврали, яъни Россия Украинага бостириб киргандан буён долзарб бўлиб турганини ёзади.

Бир нарса аниқ: Россияда аксилғарб риторика ортиб борар, Украина армиясининг контр ҳужуми давом этар экан, ядровий мавзу четга чиқмайди, деб ёзи мухбиримиз.

Украина уруши, Зеленский: Айримлар қарши ҳужумни Голливуд киноси деб ўйлайди - Видео

Президент Володимир Зеленский Россия босиб олган ерларни қайтариб олиш мақсадида Украина қуролли кучлари бошлаган қарши ҳужум ўзлари истаган тезликда кетмаётганини тан олди.

Украина контр ҳужумини бошлаганига икки ҳафтадан ошди.

Шу вақт мобайнида 100 квадрат километр ер озод этилди, демоқда Украина ҳарбийлари.

Жанглар Донецк ва Запорожия вилоятлари ҳудудида кечмоқда.

Украина Мудофаа вазири ўринбосари Анна Маляр саккиз қишлоқ озод этилганини хабар қилди.

21 июнь куни Лондонда Украинани қайта тиклашга қаратилган халқаро конференция бошланди.

Шу куни Би-би-си мухбири Ялда Ҳакимга интервью берган Президент Зеленский контр ҳужум қаттиқ бўлаётганини айтди.

Суҳбат бошида Би-би-си мухбири қарши ҳужум ҳақида сўради.

Президент Зеленский: Ҳамма нарса ҳам осон бўлавермайди. Бу ерда қатор мушкулликлар бор. Биринчи сабаби, ерларимиз миналаштирилган. Шубҳасиз, биз каттароқ қадамлар ташлашни хоҳлардик. Ҳозирги қадамларимиз биз истаганимиздан кичикроқ. Лекин курашган енгади, таққилатган эшик очилади. Шунинг учун ҳам из қарши ҳужумимиз ғалабасига ишончимиз комил.

Би-би-си: Сизнинг Мудофаа вазирингиз ўринбосари бу қарши ҳужумда босиб олинган ерларни қайтариб олиш қийин бўлишини тан олди.

Президент Зеленский: Бирорта ҳам қарши ҳужум осон бўлмайди. Осон эмас. Айниқса, ҳозирги жабҳа чизиқларида аҳвол оғир. Ўтган кузда ҳам биз қарши ҳужумларга ўтгандик. Жараён жуда секин кечаётганга ўхшарди. Сўнг олдинга силжишга тезлаштиришга имкон берган фурсат етиб келди. Бу гал ҳам шундай бўлади.

Би-би-си: Яъни, Россия бу қарши ҳужум олдини олиш учун қўлидан келган ҳамма ишни қилган...

Президент Зеленский: Ҳар куни Россия бизнинг заминимизга даҳшатли фожеалар келтираяпти. Уларга фарқи йўқ: ҳарбийларни нишонга олаяптиларми ёки тинч аҳолини. Факт шуки, улар бу даҳшатларни давом эттиришга, одамларни азоб-уқубатга қўйиб, инсон қўли билан яратилган улкан фалокатларни содир этишга тайёрлар. Бу нарса аниқ.

Би-би-си: Америкаликлар бу зафарни қандай ўлчашларини аниқ айтдилар: сиз музокара даврасига бориб ўтиргунча, жанг майдонида имкони борича кўпроқ ғалабани қўлга киритишингиз лозим…

Президент Зеленский: Биз учун илгари силжиш ўта муҳим. Бу нарса нафақат ўз аскарларимизни, балки ғарбий иттифоқчиларимизни руҳлантириш учун ҳам муҳим. Бизга ёрдам секинлашиши ҳам мумкин, тезлашиши ҳам. Тўғриси, кўмак миқёси олдинга силжишимизга боғлиқ. Жуда кўп нарса шунга боғлиқ. Мен учун қарши ҳужумимизнинг энг катта ютуғи - бу одамларни руҳлантириш.

Би-би-си: Жаноб президент, сиз шерикларингиздан босим ҳис қилаяпсизми? Улар сиздан натижа, тезроқ натижа кутишаяптими?

Президент Зеленский: Айримлар хоҳлаяпти ва кўп нарсани кутишаяпти. Айримлар Голливуд киносидек воқеаларни кўрмоқчи бўлаяпти. Лекин ҳаётда бундай бўлмайди.

Би-би-си: Америкаликлар «биз охиригача Украина билан бирга бўламиз» дейишаяпти. Сиз уларга ишонасизми?

Президент Зеленский: Бошқа йўли борми? Биз уларга ишонамиз. Чунки бир томондан улар бизнинг шерикларимиз. Иккинчи тарафдан, биз ўзимизга ишонишимиз керак.

Би-би-си: Бунинг учун зарур нарсалар рўйхатига қарасак, F-16 самолётлари бор. Америка расмийлари, "Украина F-16 ларни олиши учун ойлар зарур", дейишади...

Президент Зеленский: Афсуски, бу ерда кўплаб қоғозбозликлар бор, улар нега кераклигини мен тушунмайман. Чунки биз урушдамиз ва бўладиган иш тез бўлишини хоҳлаймиз. Тўланадиган ҳақ - бу вақт. Вақт - бу инсон ҳаёти дегани. Мен тайёргарликни ёздаёқ бошлашимизга ишонаман. Биз кунларни тезлаштириш учун босимни кучайтиришда давом этамиз. Улар ўқув машқлар августда бошланади, тайёргарликлардан 6-7 ой ўтиб Украина учоқларни олади, деб ишонишади.

Би-би-си: Жаноб президент, сиз Лондонда бошланган Украинани қайта тиклаш анжуманига қандай мужда йўллайсиз?

Президент Зеленский: Британия Бош вазирига, ҳукуматига катта раҳмат. Бизни дастаклаётган барча бизнесларга, барча одамларга катта раҳмат. Бу фақат қайта тиклашгина эмас, Украинани қайта ўзгартириш ҳамдир. Шунинг учун ҳам коррупцияга қарши ислоҳот, адлия тизимини ўзгартириш ўта муҳим. Биз ўз ҳамкорларимиз билан урушдан кейин Украинани сармоялар учун жозибали қилиш устида ҳам ишлашимиз лозим. Украина ўзгарган, бошқа мамлакат бўлади. Ўзгармаган ягона нарса - халқимиз кучи бўлиб қолади.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.