Швеция: Қуръони Каримни ёқиш режасидан сўнг тартибсизликлар авж олди
Сурат манбаси, EPA
Швециянинг бир неча шаҳарларида ўта ашаддий ўнг қанот, мигрантларга қарши гуруҳ томонидан мусулмонларнинг муқаддас Қуръони Карим китобини ёқиш режаси эълон қилингач, тартибсизликлар бошланиб кетган ва ҳозиргача ўнлаб одамлар ҳибсга олинган.
Шарқдаги Норшопинг шаҳрида полиция тартибсизлик иштирокчиларига қарата огоҳлантирувчи ўқ узганидан сўнг 3 кишининг жароҳат олгани айтилмоқда.
Бир неча автомобилга ўт қўйилган ва 40 нафардан кўпроқ одам ҳибсга олинган.
Шанба куни жанубдаги Малмо шаҳрида ашаддий ўнгчиларнинг намойиши давомида бир автобус дохил бошқа автомобилларга ўт қўйилган.
Дания ва Швециялик экстремист Stram Kurs ёки "Муросасиз йўл" ҳаракати раҳбари Расмус Палуданнинг айтишича, у Исломнинг энг муқаддас матнларини ёққан ва бу ҳаракатини яна қайтаради.
Мусулмонлар Қуръони Каримнинг Аллоҳнинг сўзлари, деб эътиқод қилади ва унга ҳар қандай зарар беришга уриниш ва ҳурматсизликни қаттиқ ҳақорат сифатида қабул қилади.
Саудия Арабистони "Швециядаги айрим экстремистлар томонидан муқаддас Қуръони Каримни қасддан таҳқирлаш ва мусулмонларга қарши провокация ва гиж-гижлашни" қоралашини билдирди.
Эрон ва Ироқ ҳукуматлари норозилик билдириш учун Швеция элчиларини чақирган.
Сурат манбаси, EPA/Sweden Out
Пайшанба, жума ва шанба кунлари ўта ўнгчилар ёқиш тадбирини режалаштирган Стокгольм чети ва Линшопинг ҳамда Норшопинг шаҳарларидаги содир бўлган тартибсизликлар натижасида камида 16 полиция ходими жароҳат олган ва бир нечта полиция машиналари вайрон қилинган.
Палудан якшанба куни Норшопинг шаҳрида яна бир намойиш ўтказиш билан таҳдид қилди, бу у ерга унга қарши намойишчиларнинг тўпланишига олиб келди.
Маҳаллий полиция хабарида айтилишича, ҳужумга учраганидан сўнг отган огоҳлантирувчи ўқлари рикошет орқали 3 кишига бориб теккан.
Швеция миллий полиция раҳбари Андрес Торнбергнинг айтишича, намойишчилар полиция ходимларининг ҳаётига бефарқлигини кўрсатган.
"Биз олдин ҳам шафқатсиз тартибсизликларни кўрганмиз, аммо буниси бошқаларига ўхшамайди", деган у.
Швецияда "Муросасиз йўл" ҳаракати режаларига қарши намойишлар бундан олдин ҳам зўравонликларга айланиб кетган эди.
2020 йили Малмодаги тўқнашувларда намойишчилар машина ва дўконларга ўт қўйган.
2020 йили Данияда ирқчилик ва бошқа қонунбузарлик билан бир ой қамоққа ташланган Расмус Палудан Франция ва Белгияда ҳам Қурони Каримни ёқишни режа қилишга уриниб кўрган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
