Ҳукм: Россия эри хиёнатда айблаб, қўлларини болта билан чопиб ташлаган аёлга товон тўлайди Rossiya ayollar yangiliklar
Сурат манбаси, Margarita Gracheva
Инсон Ҳуқуқлари бўйича Европа Суди ўз қарорини эълон қилди. Россияга шафқатсиз зўравонликка учраган тўрт аёлга товон пули тўлашни буюрди.
Суд хулосасига кўра, Россия маиший зўравонликка қарши кураша олмаган.
Эри қўлини чопиб ташлаган Маргарита Грачева ана шу тўрт аёлдан биттаси бўлади.
Суд ҳукмига биноан Россия ҳукумати энди унга 370 минг евро товон тўлайди.
Алоқадор мавзулар:
Россия: 'Эрим хиёнат қилдинг, деб қўлимни болта билан чопди'
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Маргаританинг иши
Маргаритани эри 2017 йилда олиб қочган, уни хиёнатда айблаб, ўрмонга олиб бориб, қўлини болта билан чопиб ташлаганди.
Суд бунга ўхшаш зўравонликларга чек қўйиш учун Россияни зудлик билан чора кўришга ҳам ундаган.
Маҳкамага кўра, Россияда маиший зўравонлик ҳоллари ҳайратланарли миқёс касб этган.
Россия бу масалада Инсон Ҳуқуқлари бўйича Европа Конвенциясининг икки моддасини бузган.
Маълум бўлишича, полиция Маргарита эрининг зўравонлигидан бохабар бўлган, аммо унинг шикоятларига қулоқ тутмаган.
Маргаританинг эри чопиб ташлаган чап қўли ўрмондан олиб келиниб, ўрнига қайта тикилган, ўнгига эса, одамларнинг пулига сунъийси ўрнатилган.
Унинг зўравон собиқ эри ҳодиса ортидан 14 йиллик қамоқ жазосига ҳукм қилинган.
Маиший зўравонлик ва Россия қонунчилиги
Суд айни ўринда Россия қонунчилигини танқид қилган.
Маргаританинг иши бунга далолат эканини айтган.
Россияни маиший зўравонликка қонуний таъриф бериш ва барча айбдорларни жазолашга чақирган.
Судга кўра, Маргаританинг иши Россия қонунлари масъулларнинг маиший зўравонлик ҳолларини ўз вақтида аниқлай олмасликларини кўрсатган.
2017 йилда президент Владимир Путин маиший зўравонлик учун кўзда тутилган жазо чораларини юмшатган, махсус қонунга имзо чеккан.
Янги қонунчиликка мувофиқ, маиший зўравонлик жиноий ҳуқуқбузарлик, деб топилиши учун жабрдийда касалхонага тушиши шарт бўлиб қолган, жазолар ҳам қисқартирилган.
Инсон Ҳуқуқлари бўйича Европа Судининг қарори ортидан тўрт жабрдийда аёл ҳимоячиларидан бири ўзларининг "ютиб чиққанлик"ларини айтган.
Мари Давтян бу ҳақда ўзининг Facebook саҳифасида ёзган.
Аммо Россия бундан аввал жабрдийда аёлларга товон пули тўлашдан бош тортган.
Ўшанда Россия Адлия вазири муовини давлат алоҳида шахслар томонидан содир этилган маиший зўравонлик ҳолларига жавобгар эмаслигини айтган.
BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek
