Самолёт можароси: Беларусь Ҳамас таҳдид қилганини айтмоқда - Belarus, Rossiya, Lukashenko, Putin, yangiliklar

Воқеалар кутилмаган тус олмоқда. Беларусь "бомба хавфи"га оид пайғом тафсилотларини очиқлади. Уни Фаластин қуролли гуруҳига боғлади. Ryanair йўловчи самолётининг Минскка қўндиртирилишига худди шу таҳдид сабаб бўлгани айтилганди.

"Беларусь Транспорт вазирлигининг даъво қилишича, бу пайғомни Ҳамас Фаластин жангари гуруҳи шу йилнинг 23 май куни электрон почта орқали Минск Миллий аэропортига юборган.

Мазкур пайғом билан Беларуснинг БелТА давлат ахборот агентлиги бўлишган.

Унда, "Биз, Ҳамас аскарлари Исроил Ғазо Бўлгасида ўт очишни тўхтатишини истаймиз. Биз жорий урушда Европа Иттифоқи Исроилни дастаклашни бас қилишини талаб қиламиз. Delfi Иқтисодий Форуми иштирокчиларининг FR4978 рейси билан уйларига қайтишаётгани бизга маълум. Самолётга бомба ўрнатилган. Агар, талабимиз қондирилмаса, бомба 23 май куни Вильнюс устида портлайди", - деб ёзилган.

Беларуснинг бу даъвосига икки сабабга кўра эҳтиёткорлик ва шубҳа билан қараш лозим.

Биринчидан, Ғазода оташкесин талаб қилинган пайғомдан икки кун аввал бўлгада Миср воситачилигида эришилган сулҳ битими кучга кирган ва амалда бўлган.

Иккинчидан, Ҳамас Исроил ёки Фаластин ҳудудларидан ташқарида амалиёт олиб боришга қодир эмас, бундай қилгани шу пайтгача кўрилмаган.

Шундай экан, Беларуснинг бу каби изоҳи Европа лидерларини ишонтира олмаслиги тайин.

Кеча, душанба куни Германия канцлери Ангела Меркель ҳам уларга "мутлақ ишониб бўлмаслиги"ни айтганди", - деб ёзмоқда Би-би-сининг Араб хизмати мухбири Муҳаммад Яҳё.

Беларусь томонининг бу каби расмий изоҳига ҳалича Ғазо Бўлгасини назорат этувчи Ҳамас қуролли гуруҳининг муносабати маълум эмас.

Беларусь шу якшанба куни Грециядан Литвага учаётган самолётни Минскка қўндиртирган.

Ҳодиса Беларусь ҳаво ҳудудида юз берган.

Аммо қирувчи учоқ ҳамроҳлигида Минскка қўнгач, самолёт бортида "бомба" топилмаган.

Бутунбошлик халқаро йўловчи самолётини йўлдан қайтариш амалиёти беларуслик диссидент журналист ва унинг севган қизини қўлга олиш билан якунланган.

Литвага учаётган ва Минскда қўлга олинган диссидент журналист Nexta-Telegram каналининг асосчиси ва собиқ Бош муҳаррири Роман Протасевич бўлган.

Бу Telegram канал Беларусдаги президент Александр Лукашенкога қарши сўнгги оммавий намойишларни фаол ёритиб келган.

Европа давлатлари бунга ғазабнок муносабат билдиришган, Беларусни "давлат терроризми"да айблашган.

Самолёт қарийб етти соатлик кечикиш билан алал-оқибат Литва пойтахти Вильнюсга келиб қўнган.

Беларусь давлат ахборот агентлиги БелТА, "бомба хавфи" туфайли самолётни MiG-29 қирувчи учоғи ҳамроҳлигида Минскка қўндириш қарорини шахсан президент Лукашенконинг ўзи бергани ҳақида ёзган.

Беларусь Транспорт вазирлиги кеча, душанба куни, "Вазиятни ўрганиш учун комиссия тузилгани, тафсилотлари тез орада жамоатчиликка маълум қилиниши"ни билдирган.

Литва Бош прокуратураси эса, "самолётни террористик мақсадларда олиб қочиш ва одамларга нисбатан халқаро қонунларга зид муносабатда бўлиш бўйича судгача тергов бошланганлиги"ни маълум қилганди.

Йўловчиларининг айтишларича, самолёт нега кутилмаганда Минскка қўндирилгани сабабини ўзларига айтишмаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek