Россия Украина билан урушадими? Кремль ва геосиёсат - video NATO Rossiya Ukraina Qrim

Россиянинг 40 минг қўшини Россия-Украина чегарасига, яна 40 минг аскар Қримда тўпланди. Россия Украина билан урушадими, деган саволлар пайдо бўлди, НАТО қўшинлар жамланишини қоралади.

Хабарларга кўра, АҚШ ҳарбий кемалари Қора денгизга йўл солган, Россия Ташқи ишлар вазирлиги эса, "ўзларининг фойдаларига" эканини айтиб, уларни аллақачон огоҳлантиришга ҳам улгурган.

Президент Байден Президент Путинга мурожаат қилиб, Украина чегарасидаги тарангликни юмшатишга чақирган, АҚШ-Россия саммитини таклиф қилган.

Бу охирги 7 йилдаги Россия қўшинларининг энг йирик ҳаракатланишидир, - дейди мавзуни яқиндан ўрганган Би-би-си мухбири Алим Мақбул.

Мухбиримизнинг айтишича, бошида Украина чегарасига кетаётган ҳарбий техника узун колоннасининг мобиль телефонда олинган видеоси тарқалган.

Мана, энди Россия Мудофаа вазирлиги ифтихор билан ўша томонга йўл олган ҳарбий қирувчи самолёт ва кемалари видеосини эълон қилди, дея давом этади у.

Бир неча кун олдин Украина Президенти Владимир Зеленский фронт чизиғига борди, Россия дастагидаги исёнчиларга қарши урушаётган Украина ҳарбийлари билан кўришди.

Бу ташқи дунёдан ёрдам илтимосининг бир кўриниши эди. Энди бошқалар ҳам зудлик билан чора кўриш кераклигини англадилар.

Брюсселда АҚШ Давлат Котиби Энтони Блинкин Украина ҳайъати билан учрашди, Американинг минтақада ҳарбий ҳозирлигини ошириш ваъдасини муҳокама қилдилар.

НАТО Россия кучларининг тўпланиши "асоссиз ва номақбул" деди, Москвани қўшинларини қайтаришга чақирди.

"Биз сўнгги ўзгаришлардан жиддий ташвишдамиз ва НАТО вазиятни жуда яқиндан кузатмоқда. Охирги ҳафталарда Россия минглаб аскарларини Украина чегарасига тўплади, бу 2014 йили Қрим ноқонуний аннексия қилинганидан кейинги Россия қўшинларининг энг йирик жамланишидир", - деди Йенс Столтенберг.

2014 йилдан кейинги жангларда 13 мингдан ортиқ инсон ҳалок бўлди.

Бир неча ойлик нисбатан тинчликдан кейин Украина ўт очишлар кўпайиб, аскарлари ўлими ортгани ҳақида хабар қилмоқда.

Лекин нима учун ҳозир?

Кўплар ишонишича, бу Путиннинг Вашингтоннинг кескин оҳангига жавоби, шу йўл билан Байден маъмурияти устидан устунликни қўлга киритмоқчи бўлаяпти.

"Путин Ғарбдагиларни фақат "қоғозда гапирадиганлар" деб ўйлайди. Тилда кескин гапиришлари мумкин, лекин амалда Россияга қарши туришни истамайдилар. Шу йўл билан у Ғарбнинг бўшлигини кўрсатиб қўймоқчи", - дейди, жумладан, АҚШнинг Натодаги элчиси Курт Волкер.

Мухбиримизнинг қайсидир маънода у ҳақмикан, деган саволига эса, АҚШ элчиси, "Ўйлайманки, устунлиги бор. Тўғрисини айтиш керак, Ғарбда ҳеч ким Украина туфайли Россия билан ҳарбий можарога боришни истамайди", - дея жавоб берди.

Путин ҳукумати наздида эса, қўшинлар ҳаракатланиши тўғри ва бу Ғарб тажовузига қарши бир амал.

"Россияга таҳдид солаётган альянснинг ҳарбий фаоллигига жавобан биз шунга муносиб чоралар кўрдик. Қишки машқлар доирасида Ғарбий ва Жанубий қўшинларнинг қўққисдан ҳарбий жанговар тайёрлиги текширилди", - деган Россия Мудофаа вазири Сергей Шойгу.

Йилларки, Украина НАТОга киришга уринади, бу Кремлнинг жиғига тегиб келади.

Бунга кафолат йўқ, аъзо бўлишга ҳам бир неча йил кетади.

Бундай вазиятда айримлар қўшинлар тўпланиши Путиннинг фақат муштини кўрсатиб қўйишидан кўпроқ нарса бўлмасин-да, деган хавотирда, дейди якунида мухбиримиз Алим Мақбул.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek