Коронавирус: Пандемия боис дунё мислсиз очарчиликка дуч келиши мумкин - БМТ Koronavirus

БМТнинг Жаҳон Озиқ-овқат Дастури огоҳлантиришича, дунё бўйлаб очарчилик билан юзма-юз келадиган инсонларнинг сони икки баравар кўпайиши мумкин.

Жаҳон Озиқ-овқат Дастури раҳбари Дэвид Бисли айтишича, ҳалокат олдини олиш учун зудлик билан чора кўриш талаб қилинади.

Жаҳон Озиқ-овқат Дастури тайёрлаган ҳисоботга кўра, очарчиликдан азият чекаётган инсонларнинг сони 135 миллиондан 250 миллиондан зиёдга етиши мумкин.

Бу инсонларнинг аксари қонли можаролар, иқтисодий инқироз ва иқлим ўзгариши муаммоларига дуч келган 10 мамлакат яшовчилари, дейди халқаро ташкилот.

Ҳисобот Global Report on Food Crises - Озиқ-овқат инқирозига бағишланган Глобал ҳисобот деб номланади.

Унда қўрқинчли очарчилик таҳдиди юзага мамлакатлар сифатида Яман, Конго Демократик республикаси, Афғонистон, Венесуэла, Эфиопия, Жанубий Судан, Судан, Сурия, Нигерия ва Гаити тилга олинган.

Ҳисоботда ўтган йили Жанубий Судан аҳолисининг 61 фоизи озиқ-овқат инқирозига дуч келгани айтилади.

Ҳали коронавирус пандемияси бошланмасданоқ, Шарқий Африка, Жанубий Африкадаги мамлакатлар озиқ-овқат тақчиллигини бошидан ўтказишни бошлаганлар, бунга қурғоқчилик ва сўнгги бир неча ўн йилликдаги энг ёмон чигиртка ёпирилиши сабаб бўлган.

Жаҳон Озиқ-овқат Дастури раҳбари Дэвид Бисли видеоконференция орқали БМТ Хавфсизлик кенгашига мурожаат қиларкан, "донолик билан, тезлик билан" чора кўришга чақирган.

"Биз бир неча ой ичида Библия миқёсидаги бир неча очарчилик билан юзма-юз келишимиз мумкин. Аччиқ ҳақиқат шуки, биз ўзимиз томонимиздан етарли вақтга эга эмасмиз", деб айтган жаноб Бисли.

"Мен ўзимизнинг экспертизамиз ва бизнинг шерикчилигимиз билан Covid-19 пандемияси инсоний ва озиқ-овқат фалокатига айланиши олдини олишимизга ишонаман", деди БМТ Жаҳон Озиқ-овқат Дастури раҳбари.

Би-би-сининг халқаро масалалар бўйича мухбири Лиз Дюсет Дэвид Беслининг коронавирусдан соғайиб қайтиши билан БМТ Хавфсизлик Кенгаши қаршисида чиқиш қилганига эътибор қаратади.

"Кескин гапираётганим учун узр", деб ўз нутқини бошлаган Дэвид Бесли.

"Дунё юзма-юз келаётган нарса бундан-да кескин бўлиши мумкин - ҳали глобал саломатлик инқирози бошланишидан олдин Дэвид Бесли таърифича, Иккинчи Жаҳон урушидан кейинги энг ёмон инсонпарварлик фалокати билан рўпара келаётган эди", дейди Би-би-си мухбири.

Ўзининг интервьюсида Дэвид Беслининг айтишича, агар БМТ зарур маблағ ва егулик билан таъминламаса бир неча ой ичида 30 миллион ёки ундан кўп инсон очидан ўлиши мумкин.

Аммо шу кеча-кундузда донорларнинг ўзларининг Covid-19 инқирози туфайли пайдо бўлган молиявий мушкулликларини аритиш устида бошлари қотган.

Жаноб Бесли айтишича, ўзи билан суҳбатлашган бирор бир мамлакат вакили энг ночорларга ёрдам беришдан бўйин товламаган.

Аммо кўмак беришни истаётган мамлакатларнинг ўзлари ҳам ҳозир озиқ-овқатни аввало ўзлари учун ғамлашлари, сўнг оч қолаётганларга жўнатиш йўлларини кўришлари лозим бўлади.

Жаҳон Озиқ-овқат Дастурининг етакчи иқтисодчиси Ориф Ҳусайн айтишича, коронавирус пандемиясининг иқтисодий таъсири "аллақачон ипда осилиб турган миллионлаб инсонлар учун ҳалокатли бўлган.

Шу ой бошида Жаҳон Озиқ-овқат Дастури молиялаш билан боғлиқ инқироз туфайли Ямандаги Хусий исёнчилари назорат қилаётган ҳудудларга кўмакларни ярмига қисқартиришга мажбур бўлгани ҳақида баёнот тарқатган эди.

Айтилишича, айрим донор мамлакатлар ўзлари юбораётган озиқ-овқатларини етказишга Хусий қўшинлари қаршилик қилади деган хавотир билан ёрдамини тўхтатишга қарор қилганлар.

БМТ ҳар ой 12 миллион яманликнинг қорнини тўйғазаётганини айтади.

Бу Хусий қўшинлари назоратидаги аҳолининг 80 фоизи деганидир.

Апрел ойида Яманда илк коронавирусни юқтириш ҳолати аниқлангани хабар қилинди.

Тиббиёт тизими ишдан чиққан мамлакатда ҳалокатли вирус тез тарқалиши эҳтимолидан хавотир билдиришмоқда кўмак ташкилотлари.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek