Алишер Усмонов санкция остида қолади, Лукашенко Тошкентга йўл олди, Илҳом Алиев ғалабаси аниқми? Янгиликлар Dunyo Yangiliklar

Европа суди Алишер Усмонов шикоятини рад этди

Ўзбекистонда туғилган россиялик метал ва телекоммуникация корчалони Алишер Усмонов Европа Иттифоқи санкциялари рўйхатида қолади, деган қарор чиқарди Европанинг энг юқори маҳкамаси.

7 февраль куни Люксембургда жойлашган Европа Адолат суди Алишер Усмоновнинг шикоят аризаси бўйича ҳукм чиқарди, жаноб Усмоновнинг ўзининг Европа Иттифоқи санкциялари рўйхатига киритилганига билдирган норозилигини рад этди.

2022 йил мартида Европа Иттифоқи Украинага бостириб киргани учун Россия ва россияликларга қарши санкциялар жорий этишни бошлади, санкциялар рўйхатига Алишер Усмонов ҳам киритилди.

Алоқадор мавзулар:

Европа Иттифоқи жаноб Усмоновнинг бу рўйхатга киритилишини Россия Президенти Владимир Путин "жуда яқин алоқалар"га эга экани билан изоҳлади.

"У Россия ҳукуматининг Украинани беқарорлаштириш сиёсатини фаол қўллаб-қувватлади", дейилади Алишер Усмонов ҳақида Европа Иттифоқи санкциясида.

Лукашенко кучишлатар тизимларга тинч фуқароларга ўқ отишга изн берди

Ўзбекистонга йўл олишидан олдин Беларус Президенти Александр Лукашенко мамлакат қуролли кучлари низомларига ўзгартириш киритди.

Янги ўзгаришларга мувофиқ, ҳарбийларга тинч фуқароларга нисбатан жисмоний куч ва қуролини ишга солишга рухсат берилади, агар қуролсиз фуқаро ҳалок бўлса, бунинг учун ҳарбий жавобгарликка тортилмайди.

Бундан олдин Президент Лукашенко Беларуснинг "Давлат хавфсизлик органлари" ҳақидаги қонунга ўзгартиришларни маъқуллаган, бу ўзгартиришларга кўра, махсус хизматлар ходимларига аёллар, болалар ва ногиронларга қарши ҳам қурол қуллашга рухсат берилган.

Президент Александр Лукашенконинг 7-9 февраль кунлари Ўзбекистонда бўлиши хабар қилинди, Тошкент аэропортида Беларус президентини Ўзбекистон Бош вазири Абдулла Арипов кутиб олди.

Озарбайжонда президентлик сайлови

7 февралда Озарбайжонда муддатидан олдинги президентлик сайлови ўтказилди.

Жорий Президент Илҳом Алиев, унинг рафиқаси - Озарбайжон Вице-Президенти Меҳрибон Алиева ва оиласи аъзолари Қорабоғнинг асосий шаҳри Хонкендида овоз бердилар, деб хабар тарқатди President.az веб-сайти.

Илҳом Алиев Озарбайжонни 2003 йилдан буён бошқариб келади, бу галги сайлов унинг бешинчи муддат сайловидир.

Бу гал у Қорабоғни Озарбайжонга қайтарган музаффар президент сифатида сайловга кирди.

2020 йил кузидаги уруш ва 2023 йил кузидаги бўлгинчи арманиларга қарши Қорабоғдаги махсус ҳарбий амалиёт Озарбайжонга тўла ғалаба билан тугади, ҳудудни арманлар тарк этди.

Қорабоғ тўла Озарбайжонники бўлди.

Ҳозир Қорабоғда катта қайта қуриш ишлари кетаяпти, Ўзбекистон ҳам Мирзо Улуғбек номи берилган мактаб қуриб берди.

Муддатидан аввалги президентлик сайлови ҳақида Президент Алиев икки ой олдин эълон қилди, танқидчилари Озарбайжон мухолифатининг ўз номзодини сайловда илгари суришига фурсат қолдирмаганини айтишади.

Президент Алиевга қарши олти номзод рўйхатга олинган, бироқ аксар одамлар мухолифларнинг бирортаси ҳам жорий президентга ҳақиқий рақиб эмас деб ҳисоблашларини айтишган.

Озарбайжон президентлик сайловига Европа Кенгаши кузатувчиларини таклиф этмасликка қарор қилди, бироқ Европада Хавфсизлик ва Ҳамкорлик ташкилоти Демократик институтлар ва Инсон ҳуқуқлари бюросига Қорабоғдаги овоз беришни кузатишга таклиф берилди.

Путин интервью берган Такер Карлсон ким?

Россия Президенти Владимир Путин АҚШдаги Fox News телеканалининг собиқ бошловчиси Такер Карлсонга интервью берганини Кремль тасдиқлади.

Путин билан Такер Карлсон суҳбати 8 февралда эълон қилиниши мумкин.

Такер Карлсон Москвага ўтган ҳафта борган, 6 февраль куни ўзининг собиқ Твиттер, ҳозирги Х даги саҳифасида "Биз бугун кечқурун Россия Президенти Владимир Путиндан интервью оламиз" деб хабар қилди.

Карлсон сўзларига кўра, Путин билан интервью бирор жойи кесилмасдан Tucker Carlson Network веб-сайтида, кейинроқ Х ижтимоий тармоғида намойиш этилади.

Собиқ Твиттерда Карлсоннинг 11 миллиондан зиёд фолловерлари бор.

Карлсон Х эгаси Илон Маскка Путин билан интервьюга тўсиқ қўймаслик ваъдасини бергани учун миннатдорлик билдирди, Ғарб ҳукуматларидан цензура босими бўлади кутаётганини айтди.

Карлсон Америка оммавий ахборот воситаларини "коррупцияда" айблаган, унинг сўзларига кўра, Америка матбуоти Путин билан гаплашишни хоҳламайди, аммо Украина Президенти Володимир Зеленский билан бемалол суҳбатлар қилаверишади.

Бу суҳбатлар эса Такер Карлсон айтишича, АҚШни Шарқий Европа билан урушга етаклаётган "ёқимли руҳлантирувчи суҳбатлардир".

Карлсоннинг бу гапини СNN халқаро янгиликлар бўйича бош бошловчиси Кристиана Аманпур бемантиқ деб атади.

"Биз Путин билан интервьюни доим сўраймиз, бир неча йиллардан бери сўраймиз", деди Аманпур хоним.

Би-би-сининг Россия бўйича муҳаррири Стив Розенберг охирги бир ярим йил мобайнида Кремлга бир неча марта Россия президенти билан суҳбатга рухсат сўраб мурожаат этганини ва доим йўқ жавоби олганини тасдиқлади.

Ғарб оммавий ахборот воситалари Путин билан интервью сўрашганини Россия президенти матбуот котиби Дмитрий Песков ҳам тасдиқлади.

Лекин йўқ деб жавоб берилгани сабаби, Песков таъбирича, бу журналистларнинг нохолис бўлганларида.

"Шунинг учун ҳам бундай интервьюлардан маъни йўқ эди", деб айтган Дмитрий Песков.

Кремль фикрича, Такер Карлсоннинг позицияси "бошқаларникидан фарқ қилади": "У ҳеч ҳам россияпараст эмас, у украинапараст ҳам эмас. У кўпроқ америкапараст. Ҳар қалай, анъанавий англосаксон оммавий ахборот воситалари мавқеидан кескин фарқ қилади".

Такер Карлсон Владимир Путинни бир неча марта мақтаб гапирган.

Карлсоннинг сиёсий қарашларига Украинага бир неча миллиард долларлик ёрдам берилаётганига қарши бўлган кўплаб консерватив кайфиятдаги америкаликлар қўшиладилар.

Карлсон Украина Президенти Зеленскийга бўлган ўзининг нафратини яширмайди, уни диктатор деб атайди.

Путин билан инетрвьюси анонсида Такер Карлсон Зеленскийдан ҳам интервью сўрагани ҳақида маълум қилди.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002