Видео: Россия уруши: Украина учун урушаётган чечен гуруҳлари таркибида ўзбеклар ҳам борми? Russia Ukraina O‘zbekiston

Украинада Россияга қарши урушаётган чеченларнинг иккита ҳарбий бўлинмаси бор. Уларнинг ичида бошқа миллатлар қатори ўзбеклар ҳам жанг қилаётгани айтилмоқда. Бу чеченлар Рамзан Қодиров ва тарафдорларини ўзларига душман деб билади.

"Бу чеченларнинг асосини Европадан келганлар ташкил қилади. Улар иккинчи чечен урушидан сўнг Европага кўчиб ўтганди. Бу қайсидир маънода чеченлар 90 - йиллардан бери олиб бораётган озодлик урушининг давомидир", дейди жамиятшунос Денис Соколов.

"Телба тўда" ҳужум отрядининг қўмондони Казбек Куразов иккинчи Чечен урушидан сўнг Украинага кўчиб ўтган.

Алоқадор мавзулар

"Мен оддий одамман. Украинага анча олдим келганман. Бунинг сабаби Россиянинг Чеченистонга босқини бўлган. Урушгача ва ҳозир ҳам украиналик тадбиркорман. Афсуски, ишларимизни йиғиштириб, қўлимизга қурол олиб, Украина озодлигини ҳимоя қилишимизга тўғри келди", дейди у.

"Шайх Мансур" ҳарбий бўлинмаси раҳбари Муслим Чеберлоевский Чеченистонда Россияга қарши жанг қилган. Шундан сўнг Украинага кўчиб, кўнгиллига айланди.

"Уйимизни тарк этишга мажбур бўлганимиздан сўнг, Украинага келиб қолдик. Бироз ўтиб бу ерда ҳам уруш бошланди", дейди у.

2014 йили чеченистонлик кўнгиллилардан иборат икки ҳарбий бўлинма ташкил топди. Ўшанда улар илк бор Украина томонидан туриб жангга отланишди.

"2013 йили Майдон содир бўлди. 2014 йилда эса уруш бошланди. Кремл Луганск ва Донецк вилоятларини босиб олди. Биз Украина ва Европада яшаётган барча чеченларни Украина ҳудудида Россияга қарши жангда иштирок этишга чорладик", дейди Муслим Чеберлоевский.

"Жохар Дудаев" номидаги бўлинма Луганск вилоятига кетди. "Шайх Мансур" номидаги ҳарбий қисм эса Донецкка жўнади. Унга Муслим Чеберлоевский бошчилик қилди.

"Қаерда имконият туғилса ўша ерда Россия ҳарбийларига қарши урушамиз, деб қарор қилдик. Бу имконият ҳозир Украинада бор. Украиналиклар Россиядан бизга ўхшаб жабр кўрмоқда. Россия уларни ўлдиряпти ва тахқирлаяпти. Украиналиклар ўзлари ҳам насроний бўлса-да, бизга ўхшаб ватани ва озодлигини сақлаб қолиш учун бир неча асрдан бери Россияга қарши курашмоқда", дейди Муслим Чеберлоевский.

Ҳозир чеченлар нафақат кўнгилли сифатида, балки Украина қуролли кучлари сафида ҳам жанг қилмоқда. Казбек Куразов бошчилик қиладиган ҳарбий бўлинма шулар жумласига киради.

"Биз Украина Мудофаа кучлари жангчилари ҳисобланамиз. Раҳбарият берган вазифаларни бажарамиз. Яъни ҳаммаси рисоладагидек. Биз қонундан ташқари иш қилолмаймиз. Биз қандайдир ноқонуний гуруҳ ҳисобланмаймиз. Украина қўшинларининг бир бўлагимиз", дейди Казбек Куразов.

Бу ҳарбий бўлинмаларга қўшилиш учун чечен бўлиш шарт эмас. Уларнинг таркибида ҳатто ўзбекистонликлар ҳам борлиги айтилади. Шунга қарамасдан унга шунчаки аъзо бўлиш ҳам осон эмас.

"Биз чечен бўлмаганларни ҳам қабул қиламиз, аммо янги ёлланаётганларни текширамиз. Бизга келишдан олдин нима билан шуғулланган, уларга ишониб бўладими? Чунки қўшилишни истаётганлар кўп. Таркибимизда грузин, озарбайжон, татар ва ўзбеклар ҳам бор", дейди Муслим Чеберлоевский.

"Агар ушбу ёвузлик тўхтатилмаса, Россия террор манбаи сифатида ўз таъсирини террористик гуруҳларга ҳам ёяди ва бошқа давлатларни ҳам ўз ҳолига қўймайди. Буни бугун барча ақлли одамлар тушуниб турибди. Украина бугун нафақат ўз мустақиллигини ҳимоя қилмоқда. Балки у Европа чегараларини ҳам ҳимоя қилмоқда, унинг тимсолида бутун Европа иттифоқи қаршилик кўрсатмоқда", дейди Казбек Куразов.

Чеченистон раҳбари Рамзан Қодиров Украина тарафида жанг қилаётган чеченлар ҳақида шундай дейди:

"Аллоҳ бизга ушбу бандерачилар, нацистлар ва бизнинг чечензабонлар ва ўзини мусулмон санайдиган бошқа миллат вакилларини йўқотиш учун имконият яратди", дейди Рамзан Қодиров.

Жамиятшунос Денис Соколов Украина тарафида жанг қилаётган чеченларнинг шахсий душмани қодировчилар эканлигини айтади.

"Украина Қуролли кучлари ва кўнгиллилар бўлминмаларида жанг қилаётган чеченларнинг шахсий душмани қодировчилардир. Бу Россия федерацияси ёки мустамлакачи эмас, шунчаки хоинлар. Бу улар йўқ қилишни истаётган душманлардир. Буларни йўқ қилмасдан Ватанга қайтиш ҳақида гапириш ортиқча", дейди у.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.