Ўзбекистон - АҚШ: Самарқандлик ММА курашчиси вакцина сабаб шифокорни ўлдиришда айбланмоқда - O'zbekiston dunyo yangiliklar

Самарқандлик MMA курашчиси Акмал Хожиев ўзига тиббий ёрдам кўрсатиб келган шифокорни чавақлаб ўлдиргани ҳақида хабарлар тарқалди.

27 ёшли профессионал курашчи АҚШга тегишли Гуам оролида Доктор Миран Рибати билан меҳмондорчилик вақтида айтишиб қолгани айтилади.

Guam Daily Post маҳаллий полицияга таяниб ёзишича, курашчи анчадан бери ўз Инстаграм саҳифасида Ковид вакцинасига қарши чиқишлар қилиб келаётганди.

Меҳмондорчилик вақтида 44 яшар Доктор Рибати ва Хожиев ўртасида айнан вакцина ҳақида келишмовчилик келиб чиқиши ортидан Хожиев товоқдаги суякни олиб шифокорнинг бўйнига бир неча бор санчган.

Ҳужумга гувоҳ бўлган икки аёлдан бири полицияга ҳужум вақтида Хожиевни тўхтатишга урингани, аммо Хожиев унинг бошига урганини билдирган.

Курашчининг "AK47" ва "эмланмаган қотил" каби лақаблари бор.

Инстаграмдаги охирги чиқишларидан бирида у, сўкинишлар аралаш, вакцина одамларни ўлдираётганини даъво қилади ва соғлом турмуш тарзини юритиш касалликдан сақланишнинг ягона йўли эканини айтади.

Полиция маълумотига кўра, Хожиев қотиллик, тан жароҳати етказиш, бўғиш, хавфли қуролдан фойдаланиш каби айблар билан ҳибсхонада ушлаб турилибди.

Маҳаллий матбуотда айтилишича, ижтимоий тармоқларда тарқалган видеода Хожиев қўллари ва оёқлари қонга беланган ҳолда уйидан олиб кетилаётгани акс этган.

Секс можаро: MMA жангчиси Маҳмуд Муродов ҳомийсидан айрилди

"Жамшид ота бўлишга ҳозирланаётганида, энди мени тушуняпсанми, деб ҳазиллашгандим"

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek