Ўзбекистон: Иш ҳақини ололмаган маҳкумлар, суви камайган Зарафшон ва ўзбек фильмлари тожик телеканалларида — янгиликлар O‘zbekiston mintaqa dunyo yangiliklar

"Синамо"даги "Илҳақ"

Президент Шавкат Мирзиёевнинг Тожикистонга расмий ташрифи давомида тожик телеканаллари ва кинотеатрларида ўзбек фильмлари намойиш этилади.

Бу ҳақда Кинематография агентлиги маълумотига асосланиб Bugun.uz нашри хабар қилган.

Хабарда Тожикистонда "Илҳақ", "Халқ юраги", "Абдураҳмон Жомий" ва "Ягона осмон остида" каби ўзбек фильмлари намойиш этилиши ҳақида сўз боради.

Маълум этилишича, 9 июнь куни Тожикистоннинг "Синамо" телеканалида "Илҳақ" фильми эфирга узатилган.

Аввал хабар берилганидек президент Шавкат Мирзиёев 10 июнь Душанбега етиб борган.

Уни қўшни давлат раҳбари Эмомали Раҳмон кутиб олган.

Икки кунлик ташриф давомида президентлар икки мамлакат шерикчилигининг кенг кўламли кун тартибини кўриб чиқиши ҳамда халқаро ва минтақавий даражадаги алоқалар юзасидан фикр алмашиши маълум қилинган.

Вазирлик учун тилла ручка

Мудофаа вазирлиги ҳар бирининг бошланғич нархи 15 миллион сўмдан бўлган икки тилла ручка сотиб олиш истагини билдирган.

Вазирлик томонидан қимматбаҳо ручкаларни сотиб олиш таклифи Давлат харидлари порталига жойлаштирилган.

Умумий бошланғич қиймати 30 миллион сўм бўлган ручкалар нима мақсадда сотиб олинаётганига, ҳозирча, изоҳ берилмаган.

Спутник V яна келди

Ўзбекистонга Спутник В вакцинасининг навбатдаги 70 минг дозалик 2-компоненти олиб келинди.

Бунга қадар - 1 июнь куни вакцинанинг 70 минг дозалик 1-компоненти келтирилган эди.

Спутник V'нинг 100 минг дозаси апрель ойида мамлакатга олиб келинган эди.

10 июнь куни мамлакатга ZF-UZ-VAC2001 вакцинасининг 5-партияси 1 миллион дозада келтирилгани ҳам маълум этилган.

Янги ихтисосдаги ҳудудлар

Мамлакатда 24 та туман ва шаҳарлар қурилиш материаллари ишлаб чиқаришга ихтисослаштирилади.

Президент Шавкат Мирзиёев 9 июнь куни ҳудудларнинг саноат салоҳиятини оширишга қаратилган фармонни имзолаган.

Фармонга кўра, 1 июлдан тадбиркорларга инвестиция лойиҳаларини амалга ошириш доирасида, шу жумладан, айланма маблағларни тўлдириш учун бериладиган банк кредитлари суммасининг 50 фоизигача, бироқ 15 миллиард сўмдан кўп бўлмаган миқдорда кафолатлар берилади.

Шунингдек, 20 дан зиёд туман ва шаҳарлар қурилиш материаллари ишлаб чиқаришга ихтисослаштирилиб, уларда "кичик саноат зоналари" ташкил этилади.

Иш ҳақини ололмаган маҳбуслар

Қўнғирот туманидаги 27-сон манзил колониясининг 100 дан ортиқ маҳкумлари бир неча ой давомида меҳнат ҳақларини ололмай келган.

Маҳкумлар Нукус туманидаги ғишт заводларидан бирида меҳнат қилган.

Уларнинг март-май ойлари учун иш ҳақлари берилмаган.

Олий Мажлиснинг Инсон ҳуқуқлари бўйича вакили (омбудсман)нинг Қорақалпоғистондаги минтақавий вакили аралашуви билан маҳкумларнинг ойлик иш ҳақлари тўлаб берилгани хабар қилинган.

Суви камайган Зарафшон

Шу йилнинг апрель-май ойларида Зарафшон дарёсининг ўрта оқимидаги сув ҳажми қарийб икки баробарга камайган.

Ўзгидрометнинг маълум қилишича, Самарқанд вилоятидаги сув таъминоти учун муҳим бўлган бу дарё, асосан, тоғлардаги музликлар ва қор қопламлари эриши ҳисобидан тўйинади.

Дарё вегетация (апрель-сентябрь ойлари) даври давомида республика ҳудудига ўртача 3,65 км3 оқим олиб киради.

Апрель-май ойларида дарё оқимининг ўртача 20 фоизи оқиб ўтса, 2021 йилда бу қиймат 11 фоизга тенг бўлган.

"Таъкидлаш жоизки, Зарафшон дарёси июнь-июль ойларида вегетация даври оқимининг 50 фоизидан кўпроқ оқими оқиб ўтади. Ўтган 2020 йили ушбу қиймат 41 фоизга тенг бўлган бўлса, 2021 йилнинг июнь-июль ойларида бу миқдор 45 фоизга яқин бўлиши кутилмоқда", дейилади марказ хабарида.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek