Россия ва Алексей Навальний: Путин танқидчиси ҳибсда қолади, video, Rossiya, Navalniy, Putin, dunyo, yangiliklar

Россия ва Алексей Навальний: Путин танқидчиси ҳибсда қолади - у полиция идорасининг ўзидаёқ суд қилинган. Алексей Навальний суд ҳукмини масхарабозлик, деб атаган. Кўча намойишларига чақирган.

Мухолифатчи заҳарланишидан беш ой ўтиб, илк бор ўтган якшанба куни Германиядан Россияга қайтган. Аммо аэропортнинг ўзидаёқ ҳибсга олинганди.

Россия: Навальний уйига эмас, қамоққа қайтди - BBC News O'zbek

Суд қарорига кўра, Алексей Навальний энди бир ой ҳибс остида қолади.

Европа Иттифоқи ва АҚШ ҳали қўлга олиниши ортиданоқ, Россиядан Алексей Навальнийни зудлик билан қўйиб юборишни талаб қилишганди.

Ўнлаб тарафдорлари мухолифатчи ушлаб турилган Москвадаги полиция идораси ташқарисида йиғилишган. "Уят" ва "Путин, истеъфо бер", деб қичқиришган.

Россиялик прокурорларнинг айтишларича, Алексей Навальний камомад билан боғлиқ жиноий иш бўйича шартли жазо тартибини бузган.

Алексей Навальний эса, ўзига қарши илгари сурилган айбловлар сиёсий важларга асосланганини айтиб келади.

Якшанба куни уни қарши олиш учун Внуково аэропортида катта сондаги одам тўпланган.

Аммо масъуллар сўнгги дақиқада Алексей Навальний тушган самолёт йўналишини ўзгартиришган, уни Шереметьевога қўндиришган.

Алексей Навальний аэропорт паспорт назорати бўлимидаёқ қўлга олинган, Химкидаги полиция идорасига олиб кетилган.

Хабарларга кўра, Навальнийни судлаш учун ўша полиция идорасининг ўзидаёқ вақтинчалик суд зали ташкил қилинган.

Суд уни 15 февралга қадар ҳибс остида қолдиришга қарор қилган.

29 январь куни Алексей Навальний билан боғлиқ яна бир маҳкама тинглови режаланган.

Унда суд Путин танқидчисига берилган уч ярим йиллик шартли қамоқ жазосини ҳақиқийсига ўзгартириш масаласини кўриб чиқади.

Алексей Навальний ўзига нисбатан бу қабила муносабат нафақат "адолатни масхара қилиш", балки "олий даражадаги қонунбузарлик" эканини айтган.

У полиция идорасидан туриб видеомурожаат билан чиққан.

"Қўрқманг. Мен учун эмас, ўзингиз, келажагингиз учун кўчаларга чиқинг", - дея даъват қилган.

Қаттиқ совуққа қарамай, Навальнийнинг тарафдорлари Химкидаги полиция идораси қаршисида йиғилишган, уни зудлик билан қўйиб юборишни талаб қилишган.

Сўнгроқ полиция Алексей Навальнийни Москвадаги қамоқхоналарнинг бирига олиб кетаётгани кўрилган.

Унинг ҳимоячиси Вадим Кобзев суднинг "ноқонуний ҳукми" юзасидан шикоят аризаси билан чиқишларини маълум қилган. Бу ҳақда Россиянинг етакчи "Интерфакс" ахборот агентлиги хабар берган.

ОВД-Инфо мониторинг гуруҳи маълумотларига кўра, кеча, душанба куни Россия бўйлаб Навальнийнинг 70 дан ортиқ тарафдори ҳибсга олинган.

АҚШ ва Европа: Навальний озод этилсин

Алексей Навальний озод этилсин - АҚШ ва Европа Россияга худди ана шундай талаб билан чиқишди. Кремлнинг ашаддий танқидчиси кеча, якшанба куни Германиядан Россияга қайтган. Аэропортнинг ўзидаёқ ҳибсга олинган.

Ҳибси ортидан, Amnesty International Алексей Навальнийни "виждон маҳбуси", деб тан олган.

Халқаро инсон ҳақларини сақлаш ташкилоти Россия ҳукуматидан мухолифатчига қарши шафқатсиз кампанияга зудлик билан чек қўйишини сўраган.

Би-би-сининг Москвадаги мухбири ёзишича, унинг ортга, Россияга қайтиш қарори Владимир Путинга тўғридан-тўғри чорлов бўлади ва Кремлни дилемма қаршисида қолдиради.

Бу мухолифатчини "сиёсий шаҳид" - Нельсон Манделага ўхшаш шахсга айлантириш ва Ғарбнинг кўпроқ санкцияларига замин яратиш эҳтимолини ҳам пайдо қилади.

Агар, бирор чора кўрмаса, Россия Кремлнинг ашаддий танқидчиси муҳим сайлов йилида ўзларига "бошоғриқ" бўлишини яхши билади.

Алексей Навальний ўтган беш ой давомида Германияда соғлигини тиклаган.

Германияда унинг "Новичок" туркумига кирувчи асабни фалажловчи модда билан заҳарлангани айтилган.

Алексей Навальний ўзининг заҳарланишида россиялик масъулларни айблаган, бу ишнинг буюртмачиси сифатида шахсан "Владимир Путин"ни кўрган.

Россиялик масъуллар мухолифатчининг бу даъволарини қатъий рад этиб чиқишган.

Алексей Навальний заҳарланишида Россия махсус хизматларининг бирор бир алоқаси йўқлигини айтишган.

Путиннинг ўзи ҳам бу масалага тўхталиб ўтган, "Бир ёқли қилишни истаганларида, қилган бўлишлари"ни баён қилган.

Ҳибс

Бортида Алексей Навальний бўлган самолёт маҳаллий вақт билан кеча кечқурун Москванинг Шереметьево аэропортига келиб қўнган.

Парвоз жадвалига мувофиқ Внуковога учган самолёт Шереметьевога йўналтирилган.

Москвага қайтган мухолифатчи аэропортнинг паспорт назорат бўлимида ушланган ва олиб кетилган.

Уни кутиб олишга чиққан қатор тарафдорларининг ҳам ҳибсга олинганликлари айтилган.

Кейинроқ Алексей Навальнийнинг Химкидаги полиция бўлимида тутиб турилгани маълум бўлган.

Кремль ашаддий танқидчисининг ҳибсга оид хабар ортидан, қатор Европа Иттифоқи лидерлари, АҚШ уни озод этиш талаби билан чиқишган.

АҚШ Давлат департаменти Россия ҳукуматининг ўз танқидчилари овозини ўчириш уринишларини кескин қоралаган.

Алексей Навальнийнинг аэропортдаёқ ҳибсга олиниши кутилмаган воқеълик бўлмаган.

Ҳали Германияда экан, Россия Жазони ижро этиш Федерал хизмати уни "Ив Роше" иши бўйича шартли жазо муддати тартибини бузганликда айблаган.

Хизмат ўтган йил охирида мухолифатчини федерал қидирувга берган ва суддан унга берилган шартли жазони ҳақиқийсига ўзгартиришини ҳам сўраган.

Россия Жазони ижро этиш Федерал хизматининг сўрови асосидаги ишнинг 29 январь куни кўриб чиқилиши айтилмоқда.

Алексей Навальний

Коррупцияга қарши кампаниялари билан танилган Алексей Навальний Президент Владимир Путин мухолифларининг энг ёрқин вакилига айланган.

У Путин партиясини "фирибгар ва ўғрилар" уяси деб атайди, президентнинг тузумини "Россия қонини сўриб ётганлик"да айблаб, қурилаётган "феодал давлат"ни яксон қилишга ваъда бериб келади.

Алексей Навальний ҳукуматга қарши намойишларга етакчилик қилган.

Аммо у ўзининг энг катта орзуси - Путинга сайловда рақиблик қилишга эриша олгани йўқ ҳали.

Россия судининг уни ўғирликда айблаб чиқарган ҳукми асосида ҳукумат Навальнийга 2018 йилги президентлик сайловида ўз номзодини қўйишни тақиқлади.

Навальний ўзига нисбатан айбловларни қатъий рад қилиб, ўткир танқидлари учун Кремлнинг чораси бу, деб айтган.

Кўпчилик унинг ҳамон озодликда юрганидан ҳайратланади.

Шундай бўлса-да, 2020 йил 20 август куни у заҳарланиш гумони билан касалхонага ётқазилди. Бу мухолифат лидерининг шубҳали тарзда иккинчи заҳарланиш ҳолатидир.

Kоррупцияга қарши кампаниячи парвоз вақтида ўзини ёмон ҳис қилган ва учоқ Омскка фавқулодда қўнишга мажбур бўлган. Навальнийнинг чойига нимадир қўшиб берилгани гумон қилинганди.

2019 йили унга қамоқда эканида "контакт дерматит" ташхиси қўйилган эди. Шифокор унинг "қандайдир заҳарли модда" билан контакт қилганини айтган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek