Радикал уламо озодликда, яланғоч эркак қутқарилди ва Россияда муз одамни ўлдирди - dunyo, Rossiya, ayollar, yangiliklar

Радикал уламо озодликда, яланғоч эркак қутқарилди ва Россияда муз одамни ўлдирди - уламо ал-Жамоа ал-Исломия гуруҳининг собиқ етакчиси бўлади. Австралияда яланғоч эрак нега дарахтда жон сақлашга мажбур бўлди? Россиянинг Камчаткасида бахтсиз ҳодиса юз берган, яхлаб қолган шаршарадан кўчиб тушган муз бўлаги ҳалокатли бўлди. Аномал совуқ шу кунларда Ўзбекистонда ҳам бутунбошлик шаршаранинг музлаб қолганига сабаб бўлгани айтилади - халқаро дайжест.

Радикал уламо озодликда

Индонезия 82 ёшли уламо Абу Бакир Баъсирни муддатидан илгари озод этишга қарор қилди.

Уламо 2002 йилги ҳалокатли Бали портлашларига алоқадорликда қамоқ жазосини ўтаётган бўлган.

Портлаш ўшанда 200 дан ортиқ инсонни ўлдирган. Қурбонлар орасида ўнлаб чет элликлар ҳам бўлишган.

Хабарларга кўра, масъуллар уламонинг экстремистларга таъсири давом этиши хавотири остида уламони озод этишга қарор қилишган.

Абу Бакир Баъсир "ал-Қоида" тармоғидан илҳомланган ал-Жамоа ал-Исломия гуруҳининг собиқ етакчиси бўлади.

Худди шу гуруҳ Балидаги иккита портлашга масъул, деб кўрилган.

Уламо бугун, жума куни тонгда пойтахт Жакарта ташқарисидаги қамоқхонадан оила аъзолари ҳамроҳлигида ўз уйига қайтган.

Индонезиялик масъулларнинг айтишларича, уламо энди дерадикализация дастуридан ўтади.

Россияда муз одамни ўлдирди

Камчаткада яхлаб қолган шаршарадан кўчган муз бўлаги камида бир инсоннинг умрига зомин бўлди.

Тўрт киши кеча, пайшанба куни Камчатка ярим оролидаги баландлиги 40 метр бўлган Вилючинск шаршарасида қамалиб қолишган, сатҳга қутқарув гуруҳи юборилган.

Уларнинг ҳаммаси музнинг ичидан тортиб олинган, бир бола ва унинг отаси касалхонага жўнатилган.

Маҳаллий масъулларнинг айтишларича, бола оғир жароҳатланган ва ҳозир жонлантириш бўлимида қолмоқда.

Россия дунёнинг энг катта - миллионлаб сондаги Ўзбекистон фуқаролари турли иш, юмуш ва таҳсилда банд давлати бўлади.

Янги Зеландия: Aёл ўлимида акула гумон этилмоқда

Сувдан олиб чиқилган пайтда ёш аёл тирик бўлган.

Аммо ҳаётини асраб қолишга қаратилган саъй-ҳаракатлар иш бермаган.

У олган жароҳатлари сабаб, ҳаётдан кўз юмган.

Полиция ёш аёлнинг сувда экан, акула ҳужумига учраганини гумон қилмоқда.

Янги Зеландияда акулаларнинг одамларга ҳужуми кам учрайдиган ҳодиса.

Сўнгги бор бунга ўхшаш воқеа 2013 йилда кузатилган.

Маҳаллий матбуотнинг шоҳидларга иқтибосан ёзишича, ҳодиса юз берган пайтда аёл шундоққина қутқарув байроқчалари қаршисида сузаётган бўлган.

Унинг чинқириғини эшитиб, ўша оннинг ўзидаёқ қутқарувчилар қайиқда ёрдамга шошилишган, аёлни соҳилга олиб чиқишган.

Янги Зеландия полицияси унинг сувда олган жароҳатларидан вафот этганини расман тасдиқлаган.

Австралияда яланғоч қочоқ қутқарилди

Ботқоқдаги тимсоҳлардан дарахтга ёпишганча жон сақлаётган эркакни икки балиқчи кўриб қолган. Унинг жонига оро кирган. Кийиб олиши учун шортик ҳам беришган.

Бу каби ғайриодатий ҳодиса Австралия шимолида юз берган.

Кев Жойнер ва Кэм Фауст қисқичбақаларга тузоқ қўяётган бўлишган.

Худди ўша пайтда, дарахтга ёпишганча, ёрдамга чақираётган эркакнинг овозини эшитишган.

Икковлонга кўра, эркак ўзига сув беришларини сўраб, ёлворган.

Ўзининг тўрт кундан буён дарахтда шиллиқ қурт еб жон сақлаётганини айтган.

Полиция Австралия оммавий ахборот воситаларига ушбу шахс қочоқ экани, ҳибсдан бир неча кун олдин қочиб кетганлигини тасдиқлаган.

Қочоқ қайта ҳибсга олинган ва полиция назорати остида қироллик Дарвин касалхонасига даволаш учун ётқизилган.

Унинг қуролли талончиликда айбланаётгани айтилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek