Ўзбекистон: UzAuto Motors иши, oйига $200 дан кам пул жўнатаётган мигрантлар уйига қайтарилади – ҳоким, янгиликлар, video, дунё, Мирзиёев, O‘zbekiston, Mirziyoyev, yangiliklar

Ўзбекистон: UzAuto Motors иши, oйига $200 дан кам пул жўнатаётган мигрантлар уйига қайтарилади. Уйчи тумани ИИБга ана шундай буйруқ берилган. Путин эса, мигрантларнинг Россияда қолиш муддатларини яна узайтирди - bbcuzbek.com дайжести.

UzAuto Motors иши

Суд Ўзбекистон Монополияга қарши курашиш қўмитасининг апелляция шикояти юзасидан ўзининг якуний ҳукмини айтди, уни қаноатлантирмади.

Шикоят Тошкент шаҳар маъмурий суди апелляция инстанцияси томонидан мазмунан кўриб чиқилди.

Уларнинг якуний қарори борасида бугун, 18 декабрь куни Олий Суд матбуот хизмати расман хабар берди.

Маълум қилинишича, суд мажлисида жавобгар вакиллари томонидан апелляция шикоятига қўшимча тақдим этилиб, тарафлар ўртасида муҳокама қилиниб иш юритувига қабул қилинган.

UzAuto Motors акциядорлик жамияти вакилларининг жавобгар томонидан келтирилган апелляция шикояти юзасидан эътирозлари тингланган.

Апелляция судлов ҳайъати тарафларнинг тушунтиришлари ва прокурорнинг фикрини эшитиб, ишни кўриш натижаси бўйича қарор қабул қилган.

Қарорга кўра биринчи инстанция судининг 2020 йил 30 октябрдаги ҳал қилув қарори ва хусусий ажрими ўзгаришсиз, келтирилган апелляция шикояти қаноатлантирилмасдан қолдирилган.

Шунингдек, судлов ҳайъати ишни кўришда тараф сифатида Azimavtomotive МЧЖ ва истеъмолчиларни учинчи шахс сифатида жалб этиш тўғрисидаги илтимосномани рад этилганлигини эълон қилган.

Англашилишича, cуднинг қарори эълон қилинганидан сўнг, тарафларга нима сабабдан судлов ҳайъати ушбу хулосага келганлиги, қарорга нисбатан шикоят бериш муддати ва тартиби тўғрисида тушунтириш берилган.

Монополияга қарши курашиш қўмитасининг Тошкент шаҳар судининг шу йил 30 октябрдаги ҳал қилув қарорига нисбатан келтирган апелляция шикоятини суд шу йилнинг 3 декабрь куни қабул қилган, маҳкама жараёни эса, орадан саккиз кун ўтиб бошланган.

UzAuto Motorsнинг Монополияга қарши курашиш қўмитаси махсус комиссияси қарорини ҳақиқий эмас, деб топиш тўғрисидаги шикоят аризаси бўйича шу йилнинг 30 октябрь куни суднинг ҳал қилув қарори қабул қилинганди.

Қўмита вакиллари суднинг қароридан норози бўлиб, юқори инстанцияга мурожаат этишини билдирганди.

Тошкент шаҳар маъмурий судининг 2020 йил 30 октябрдаги ҳал қилув қарорига асосан, аризачи UzAuto Motors АЖнинг жавобгар Монополияга қарши курашиш қўмитасига нисбатан шикоят аризаси қаноатлантирилган ва Махсус комиссиянинг шу йил 19 августдаги қарори ҳақиқий эмас, деб топилганди.

19 август куни Монополияга қарши ураш қўмитасида UzAuto Motors га қарши "Рақобат тўғрисида"ги қонун бузилиши белгиларига нисбатан очилган иш бўйича навбатдаги тинглов ўтказилган.

Махсус комиссия томонидан текширувлар UzAuto Motors автомобиль нархларини 3 миллион сўмдан 19 миллион сўмгача асоссиз оширганини тасдиқлаган.

Худди шу асосда комиссия ширкатга нархларни асоссиз оширилган қисмини бекор қилиб, автомобилларни камайтирилган нархларда сотиш бўйича кўрсатма берган.

Март ойидан буён, яъни янги асоссиз оширилган нархларда автомобилларни сотиб олган мижозлар билан қайта ҳисоб-китоб қилишни топширган.

20 август куни UzAuto Motors ширкати расмий баёнот билан чиққан.

"Автомобиллар нархлари асосли ва ҳозир нархни пасайтириш имконсиз" эканини айтган.

UzAuto Motors га кўра, "Монополияга қарши курашиш қўмитаси томонидан иш бир тарафлама кўриб чиқилган, унинг якунида нотўлиқ маълумотларга асосланган қарор қабул қилинган".

Баёнотда автомобилларни ишлаб чиқариш мураккаб жараён бўлиб, уни ўрганиш етарлича вақт талаб этиши қайд қилинган.

"UzAuto Motors фаолиятини янада чуқурроқ ва асослироқ ўрганиш келгуси суд муҳокамалари давомида мумкин бўлиши, компания ўзининг ушбу ҳуқуқидан фойдаланишни режалаштирган"и айтилган. Қарор юзасидан шикоят қилиш режасида экани англашилганди.

Уйчи тумани ИИБга ойига $200 дан кам пул юбораётган меҳнат муҳожирларини Ўзбекистонга қайтариш топшириғи берилган.

Бу ҳақда туман ҳокими Муҳаммадаюбхўжа Апақов Халқ депутатлари кенгашига йўллаган мурожаатномасида маълум қилган, дея ёзмоқда Xabar.uz нашри.

Ҳоким қайтариб олиб келинган фуқароларнинг иш билан таъминланишини айтган.

У мазкур ташаббус доирасида 200 дан зиёд муҳожир чақириб олинганини қўшимча қилган.

"Ҳозирда 4,200 нафар уйчилик меҳнат муҳожири хорижда ишлаяпти. Меҳнат муҳожирларининг ҳолати ўрганилиб, уйига умуман пул жўнатмаётган, кам жўнатаётган ва оиласи билан алоқани бузганлар статистикаси аниқланди", дея ҳокимдан иқтибос келтирмоқда Хабар.уз.

Апақов айни вақтда яна 550 муҳожирнинг уйига етарли миқдорда пул жўната олмаётгани аниқланиб, қайтариб келиш бўйича тарғибот бошлангани ҳақида гапирган.

Шунингдек, у хорижга кетиш истагида бўлганларни сунъий тарзда қайтариб бўлмаслиги, "аксинча, ёрдам ёрдам берилиши ва бепул ўқитилиши"ни тилга олган.

"Яқинда Россиядан ўн мингта иш ўрнига таклиф келди. Энг катта муаммо — тил ва касб билмаслик бўлиб турибди. Кимдир тумандан четга чиқадиган бўлса, аввало касб ва ҳунарга ўргатиш лозим", таъкидлаган туман ҳокими.

Ҳозирча, Уйчи тумани ҳокимининг бундай ташаббуси мамлакатнинг бошқа ҳудудларида ҳам илгари сурилаётгани ёки йўқлиги номаълум.

Бироқ Telegram'даги Bakiroo канали муаллифи ҳоким ташаббусини "четда яшамоқчи, ишламоқчи ўзбекистонликнинг четда яна қолиши учун пул юбориши, шартли товонини тўлаши кераклиги"га менгзаган.

Шу йилнинг 15 сентябрь куни президент Шавкат Мирзиёев меҳнат муҳожирларини қўллаб-қувватлашга қаратилган қарорга имзо чеккан эди.

Бир вақтнинг ўзида коронавирус пандемияси меҳнат муҳожирларининг аҳволи ва ички меҳнат бозоридаги вазиятга жиддий таъсир ўтказган.

Бандлик ва меҳнат муносабатлари вазирлигининг маълумотларига кўра, 2 миллионга яқин ўзбекистонлик хорижда меҳнат қилмоқда.

17 декабрь куни айни вазирлик 2020 йилнинг ўтган 11 ойи давомида 467 минг нафардан ортиқ муҳожир Ўзбекистонга қайтиб келганини маълум қилган.

Кузатувчиларнинг фикрича, мигрантларнинг бундай кўп сонда ортга қайтиши ички меҳнат бозорига "оғирлик" қилиши мумкин.

Бандлик ва меҳнат муносабатлари вазирлиги ноябрь ойи ҳолатига кўра, мамлакатда 1,6 миллиондан зиёд инсон ишга муҳтож эканини билдирган эди.

Путин яна имтиёз берди

Худди шу манзарада Россия президенти яна бир бор мигрантларнинг мамлакатда қолиш муддатларини узайтирган.

Владимир Путиннинг бу хусусдаги янги фармони ҳуқуқий маълумотларнинг расмий интернет порталида эълон қилинган.

Янги фармон мигрантларнинг Россияда қолиш муддатларини яна 2021 йилнинг 15 июнига қадар узайтирган.

Уларга Россия президенти томонидан берилган учинчи имтиёзнинг шу йил 15 декарь куни ўз поёнига етиши кутилганди.

Дунёдаги меҳнат муҳожирлигида банд энг катта сондаги Ўзбекистон фуқаролари айнан Россия ҳисобига тўғри келади.

Глобал коронавирус пандемиясига қадар уларнинг сони расман бир миллиондан ортиқроққа нисбат берилган.

Норасмий мақомда бўлганларининг бундан бир неча баробар кўп экани ҳам тахмин қилиб келинган.

Айнан пандемия боис, тушиб қолган оғир вазиятлари сабаб, ўн минглабининг аллақачон Ўзбекистонга қайтгани ва ўн минглабининг ҳануз қайтиш илинжида экани айтилади.

Россия ҳозир ҳам дунёнинг коронавирус энг кўп тарқалган тўртта давлатидан биттаси бўлиб турибди.

Россияда жами коронавирус ҳоллари расман уч миллионга яқинлашган.

Айнан пандемия боис, Россия ҳали-ҳануз халқаро қатновларни тўлиқ қайта тикламаган.

Россия меҳнат бозори яқин-яқингача четдан 10 миллиондан ортиқ ишчи кучига қарам бўлиб келган.

Сўнгги ойларда Москвадан уларнинг сони кескин қисқариб бораётганига оид хабарлар ҳам олинган.

Аммо Россияда ҳам карантин чекловлари чоралари босқичма-босқич бекор қилинмоқда.

Коронавирус хавфи оз бўлган кўплаб ҳудудлар одатий ҳаёт тарзига қайтган.

Мигрантлар ҳам ўз ишларини давом эттириш имкониятига эга бўлишмоқда.

Путиннинг мигрантларга оид навбатдаги фармони ҳам уларга нисбатан айтилган муддатгача маъмурий чиқариб юбориш, депортация қилиш, илгари берилган вақтинчалик яшаш учун рухсатнома, яшаш учун рухсатнома, ишлаш учун рухсатнома ва патентни бекор қилиш, шунингдек Россияга киришни тақиқлаш каби чораларнинг қўлланилмаслигини кўзда тутади.

Бу Путиннинг жорий йил ҳисобидан карантин чекловлари даврида Россия ҳудудидаги меҳнат мигрантларининг қонуний мақомда қолишларини таъминловчи тўртинчи фармони бўлади.

Ўзбекистон эса, МДҲ ҳудудида меҳнат миграцияси масалалари бўйича ҳамкорлик дастури қабул қилишни таклиф қилмоқда.

Бу ҳақда бугун, 18 декабр куни президент Шавкат Мирзиёев МДҲ давлат раҳбарлари саммитида айтиб ўтди.

Тўланмаган 591 миллион сўмлик иш ҳақи

17 декабрь куни ижтимоий тармоқда аёллар кўчадаги ҳаракатни тўсиб қўйгани тасвирланган видео ва суратлар тарқалган эди.

Қисқа вақт ичида маҳаллий нашрлар бу ёз ойлари давомида жамоат ишларига жалб қилиниб, шу вақтга қадар ойлик маошини ололмаган аёлларнинг Нукус шаҳрида ўтказган норозилик акцияси экани ҳақида ёзган.

Шу куннинг ўзида Қорақалпоғистон Бандлик ва меҳнат муносабатлари вазирлиги ушбу хабарни тасдиқлаб, аёлларни ҳаққи тўлаб берилишини билдирган.

18 декабрь куни Ўзбекистон Бандлик ва меҳнат муносабатлари вазирлиги ҳам ҳолат юзасидан ўз муносабатини билдирган.

Расмий муносабатда "камбағал оилалар"дан бўлган 1,184 инсон Нукус шаҳрида жамоат ишларига жалб этилган ва уларга 817 миллион сўм иш ҳақи ҳисоблангани ҳақида сўз боради.

Ҳозирга қадар уларга 226 миллион сўм тўлаб берилган бўлсада, аёллар 591 миллион сўм ҳаққини шу кунгача ололмай келган.

Вазирлик одамларнинг ҳаққи 18 декабрь куни тўлиқ тўлаб берилиши ва айбдор мансабдорларга чора кўрилгани тўғрисидаги маълумотлар оммага етказилишини таъкидлаган.

3 триллион сўмга вакцина

Ўзбекистон коронавирусга қарши кураш ва вакцина сотиб олиш учун 2021 йилда 3 триллион сўм сарфламоқчи.

Бу ҳақда 18 декабрь куни иш бошлаган Сенатнинг ўнинчи ялпи мажлисида Молия вазири Тимур Ишметов маълум қилган.

Мажлисда 2021 йил учун Давлат бюджети сенаторлар томонидан маъқулланган.

Маълум қилинишича, 2021 йил учун Давлат бюджети даромадлари 147,2 триллион сўм ёки ялпи ички маҳсулотнинг 21,3 фоиз миқдорида белгиланмоқда.

Бундан таълим соҳаси харажатларига 34,6 триллион сўм, соғлиқни сақлаш соҳасига 19,6 триллион сўм ажратилади.

Газ экспорти 78 фоизга камайган

2020 йилда Ўзбекистоннинг табиий газ экспорти 78 фоизга камайган.

Бу ҳақида Марказий банкнинг Ўзбекистонинг тўлов баланси, халқаро инвестицион позицияси ва ташқи қарзи бўйича 1 октябрь ҳолатига шарҳида сўз боради.

Марказий банк жаҳон бозоридаги нархларнинг кескин тушиши ва асосий истеъмолчиларда талабнинг пасайиши ортидан Ўзбекистон жорий йилнинг 9 ойи давомида 2019 йилнинг мос даврига нисбатан 78 фоизга кам табиий газ экспорт қилганини маълум қилган.

Ҳисоботда олтин ва табиий газ 2020 йилдаги умумий экспорт ҳажмининг 57 фоизини ташкил этгани, шундан 54 фоизи олтин ва 3 фоизи табиий газга тўғри келишини қўшимча қилган.

Берилган маълумотга кўра, экспорт қилинган Ўзбекистон газининг 94 фоизини Хитой, 5 фоизини Тожикистон ва 1 фоизини Қирғизистон сотиб олган.

1 январдан фақат "қизил паспорт" билан

Ўзбекистонликлар 2021 йил 1 январдан бошлаб мамлакат ҳудудидан фақат хорижга чиқиш биометрик паспорти (қизил паспорт) билан чиқишлари мумкин.

Uzbekistan Airways ана шундай эслатма билан чиққан.

2017 йилда президент Шавкат Мирзиёев хорижга чиқиш визаси (ОВИР) ёки чиқиш стикерини бекор қилиб, хорижга чиқиш паспортини жорий этишга қаратилган фармонни имзолаган эди.

Бунга қадар Ўзбекистон Шимолий Корея билан биргаликда ўз фуқаролари учун чиқиш визасини жорий этган дунёдаги икки давлатдан бири бўлиб қолаётган эди.

Ўзбекистонликлар 2019 йил 1 январидан бошлаб "қизил паспорт" олиш имконига эга бўлганлар.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek