Президент Трамп: Сардобадаги аҳволдан ларзага келдим - Ўзбекистон O'zbekiston

"Сардобадаги аҳволдан ларзага келдим".

Бу - АҚШ президенти Дональд Трампнинг Тошкентга йўллаган мактубидаги жумла.

Президент матбуот хизмати АҚШ президети Доналд Трампнинг Шавкат Мирзиёевга йўллаган мактубини эълон қилди.

Президент Трамп ўз мактубида Сардоба фожиаси жабрдийдаларига ҳамдардлик билдирган ва тошқин оқибатида сув остида қолган уйлар, бошпанасиз қолган инсонлар, вайрон бўлган йўллар ҳамда фермер хўжаликлари тасвирини кўриш қалбни ларзага солишини маълум қилган.

Шунингдек, Доналд Трамп мактубида Ўзбекистон коронавирус пандемияси оқибатларига қарши курашиш йўлида АҚШдан ёрдам сўрагани ҳақида сўз боради.

Президент Трамп ўз маъмуриятига Ўзбекистоннинг ушбу сўрови юзасидан кўрсатма берганини билдирган.

Ўзбекистонда диний эркинлик

"Ўзбекистонда диний эркинлик билан боғлиқ вазият яхшиланди"

АҚШ Давлат котиби Майк Помпео 10 июнь куни Ўзбекистондаги диний эркинлик билан боғлиқ вазият яхшиланганини эътироф этган.

Давлат котиби бу сўзларни АҚШ Давлат департаментининг 2019 йил учун халқаро диний эркинлик ҳолати бўйича йиллик ҳисоботига бағишланган матбуот анжуманида тилга олган.

"Ўзбекистонда диний эркинлик билан боғлиқ вазиятни яхшилаш йўлида қадамлар ташланди ва бу жараён давом этмоқда. Шу йилнинг бошида мен у ерда диний етакчилар билан яқиндан суҳбат қурган эдим", маълум қилган жаноб Помпео.

Майк Помпеонинг сўзларига кўра, Ўзбекистон куч тизимлари 2017 йил давомида 240, 2018 йилда эса 114 марта рўйхатдан ўтмаган диний жамоалар йиғинларига рейдлар уюштирган бўлса, 2019 йилда бирорта бундай ҳолат қайд этилмаган.

Мирзиёев Ғалаба байрамига борадими?

Россия президенти матбуот котиби Дмитрий Песков 24 июнь куни Москва шаҳрида ўтувчи Ғалаба байрамида иштирок этадиган давлатлар рўйхатини маълум қилган.

Унинг сўзларига кўра, иштирокчи давлатлар рўйхатида Ўзбекистон ҳам бор.

Маҳаллий Kun.uz нашрининг ёзишича, президент Мирзиёевнинг Ғалаба байрамида иштирок этишини нашрнинг ҳукуматдаги манбаси тасдиқлаган.

Тошкент нега қизил ҳудуд эмас?

10 июнь куни ўтган брифингда Санитария-эпидемиологик осойишталик агентлиги директорининг биринчи ўринбосари Ботир Қурбонов касалланиш ҳолатлари кўплиги қарамай, пойтахт нега «қизил» ҳудудга айлантирилмаётганига изоҳ берган.

Унинг маълум қилишича, Тошкент шаҳри пойтахт эканлиги ҳисобга олиниб, аҳолининг ижтимоий-иқтисодий ислоҳотлари ва ҳаракатларига таъсир қилмай, тадбирларни манзилли белгилаш тизимли тарзда амалга оширилмоқда.

Қурбонов Тошкент шаҳрида касаллик қайд этилган маҳалла, мавзе, даҳа ва йирик объектлар бўйича алоҳидаа карантин чекловлари ўрнатилаётганини ҳам қўшимча қилган.

72 янги бемор

Ҳаж бекор бўлади - энг йирик мусулмон давлати қарор қилди. Ўзбекистон-чи?

11 июнь соат 10:00 ҳолатига кўра, Ўзбекистонда коронавирусга чалинганлар сони 72 нафарга ошиб, 4695 нафарни ташкил этмоқда.

Янги касалланиш ҳолатлари учта ҳудудда аҳоли орасида ва Қашқадарё вилоятидаги хорижий корхона ишчиларида аниқлангани хабар қилинган.

Касалликдан соғайганлар сони 3532 нафарга етган, 1144 бемор касалхоналарда қолмоқда.

Қайд этилган ўлим ҳолатлари 19 та.

"Ўзбекконцерт" раҳбари ўзгарди

"2017 йилдан буён Муассасага раҳбарлик қилиб келган Абдуқаҳҳоров Одилжон Абдуғаниевич бошқа ишга ўтганлиги муносабати билан муассаса директорининг ижодий масалалар бўйича ўринбосари лавозимида ишлаб келган Жамалдинов Алишер Худайбердиевич вақтинча директор вазифасини бажарувчи этиб тайинланди" - дея хабар бермоқда "Ўзбекконцерт" давлат муассасаси.

Ушбу қарор Маданият вазири Озодбек Назарбеков раҳбарлигида ўтган йиғилиш давомида олинган.

Алоқадор мавзулар:

Ўзбекистон-Қирғизистон: кузир кимнинг қўлида?

Мирзиёев ниқоб ҳақида нима деди?

Ўзбекистонда карантин ҳали тугамайдими?

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek