Дунё, янгиликлар: АҚШ уриб туширган Эрон дрони, сигаретда ўз оёғини кўриб қолган эркак ва Россияда Google'га жарима

Трамп: Ҳормуз бўғозида Эрон дрони уриб туширилди

Президент Доналд Трамп Ҳормуз бўғозида Эронга тегишли дрон жуда яқин масофада яқинлашганда (тахминан 900 метр) АҚШнинг USS Boxer ҳарбий кемаси унга қарши «мудофаа ҳаракати» қўллаганини билдирди.

Эрон ўз дрони йўқ қилингани борасида бирор маълумотга эга эмаслигини айтган.

Июнь ойида Эрон худди шу ҳудудда АҚШ ҳарбий дронини уриб туширган эди.

АҚШ Эронни май ойидан бери дунёнинг энг асосий юк ўтувчи ҳудудида нефть танкерларига ҳужум уюштириб келишда айблайди. Расмий Теҳрон барча айбловларни қатъиян рад этмоқда.

Сўнгги вақтда кузатилаётган ҳолатлар Яқин Шарқ минтақасида ҳарбий ихтилофнинг юзага келиши эҳтимоли бўйича хавотирларга сабаб бўлмоқда.

Эркак ўзининг кесилган оёғини сигарет қутисида кўриб қолди

Франциялик 60 яшар эркак ўзининг ампутация қилинган оёғи сурати унинг розилигисиз чекишга қарши огоҳлантирув ўлароқ сигарет қутисида ишлатиб келинаётганидан хабар топган.

Сурат остига «чекиш артерия томирларингизда тиқинга сабаб бўлади» деган огоҳлантириш қўйилган.

Исми ошкор қилинмаётган эркак 1997 йилда отишма туфайли чап оёғидан айрилганини маълум қилган. У 2018 йилда протез оёқ олиш учун касалхонага келгани ва унинг ҳолати суратга олинганини айтган.

Эркакнинг ўғли сигарет сотиб олаётган пайт қутидаги сурат отасининг оёғидаги «чандиқлар билан бир хил экани»ни пайқаб қолган.

Бироқ бундай огоҳлантирув суратларини тарқатишга масъул Европа Комиссияси эркакнинг иддаоларида асос мавжуд эмаслигини таъкидламоқда.

Еврокомиссия вакили сигарет қутисида ишлатилган суратнинг 2014 йилда олинганини билдирган.

2019 йилда тарихдаги энг жазирама июнь қайд этилди

Янги маълумотларга кўра, дунё 2019 йилда қайд этилган тарихдаги энг иссиқ июнь ойига гувоҳ бўлган.

Ўтган ойда дунё бўйлаб ўртача ҳарорат Цельсий бўйича 16.4 даражани ташкил этган. Бу ўтган асрга солиштирганда сезиларли юқори кўрсаткичдир.

Жазирама Европа, Россия, Канада ва Жанубий Америкада, айниқса, кўпроқ сезилган.

АҚШ Миллий Об-Ҳаво Хизмати яқин кунлар ичида ўн миллионлаб одамлар кутилаётган 43.3 даража иссиқ ҳароратдан азият чекиши мумкинлигидан огоҳлантирмоқда.

Ўтган ойда Антарктика денгизидаги муз қопламаси рекорд даражада камайган.

Бунга қадар 2016 йил июни тарихдаги энг иссиқ ой, дея тан олинган эди.

Роскомнадзор Google'га жарима солди

Интернет қидирувини фильтрлаш ва Роскомнадзор томонидан тақиқланган сайтларни блоклаш сўровини рад этгани учун Google 700 минг рубль ($11 минг) миқдорида жаримага тортилган.

Кузатувчилар жарима миқдорини «кулгили» дея атамоқда.

Дунёнинг энг йирик интернет компанияларидан бири бўлмиш Google'нинг даромади жорий йилнинг биринчи кварталида $36 миллиардга етган.

100 мингдан зиёд интернет сайтлари Роскомнадзорнинг «қора рўйхати»дан жой олган. Telegram мессенжери сайти, LinkedIn ижтимоий тармоғи, Grani.ru ва Kasparov.ru каби мухолиф кайфиятдаги ОАВ ҳамда шахсларга тегишли сайтлар шулар жумласидандир.

Жорий йилнинг апрель ойида ўзларининг россиялик мижозлари шахсий маълумотларини Россия Федерацияси ҳудудида жойлашган серверларда сақлай бошлаганликлари тўғрисида Россия ҳукуматига маълумот тақдим этмагани учун Facebook ва Twitter тармоқлари Роскомнадзор томонидан 3 минг рубль жарима билан жазоланган эди.

На Google, на Facebook ва на Twitter ушбу жарималар борасида матбуотга изоҳ берган.

Дунё, янгиликлар: Ишдан чиққан рус АЭСи, АҚШни хавотирга солган FaceApp ва солиқлар «Худо истаги»га зидми?

Дунё, янгиликлар: Еврокомиссияда илк аёл раҳбар, АҚШда ҳибсга олинган президент ва Туркияни НАТОдан ҳайдаш керакми?

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek