Дунё, янгиликлар: Мафия қўлига ракета тушди, аборт учун 30 йил ва Хитой иқтисоди ўтирадими?
Сурат манбаси, EPA
Дунё, янгиликлар: Мафия қўлидаги ракета, Ойни забт этишга 50 йил ва Хитой иқтисодиёти нега секинлашмоқда?
Италия ўта ўнгчи кучларидан жанговар ракета топилди
Италия полициясининг терроризмга қарши кураш бўлими ўта ўнгчи кайфиятдаги экстремист гуруҳларга қарши рейдлар давомида ҳаво-ҳаво туридаги жанговар ракета ва бошқа такомиллашган қуролларга дуч келди.
Полиция Украина шарқида фаолият юритаётган россияпараст бўлгинчиларни дастаклаб келаётган Италия ўта ўнгчи кучларини текширган. Рейдлар орқали уч киши ҳибсга олинган.
Полицияга кўра, ракета Францияда ишлаб чиқарилган ва Қатар армияси томонидан қўлланиб келинади ҳамда у тўлиқ жанговар ҳолатда.
2014 йилдан бери Украина шарқида давом этаётган россияпараст бўлгинчилар ҳаракатида италиялик нео-фашистлар ҳам вақти-вақти билан иштирок этиши айтилади.
Шу ойнинг бошида россияпараст бўлгинчилар сафида жанг қилишда айбланган уч нафар шахс Италия суди томонидан турли йилларга озодликдан маҳрум қилинган эди.
Ойнинг забт этилганига 50 йил тўлди
Сурат манбаси, Reuters
Бундан роппа-роса 50 йил муқаддам - 1969 йил 6 июль куни АҚШ ўзининг Аполлон-11 фазо миссияси парвозига старт берган эди.
Флоридадан осмонга кўтарилган ракета ичида эса астронавтлар Нил Армстронг, Базз Олдрин ва Майкл Коллинз бор эди.
Орадан тўрт кун ўтиб эса, Нил Армстронг инсоният тарихида Ой сиртига қадам қўйган биринчи шахсга айланади.
Бироқ бутун дунё бўйлаб, ҳатто, АҚШнинг ўзида Ойга парвознинг аслида амалга оширилмагани, ҳаммаси томоша эканига ишонувчи одамлар талайгина топилади.
Хитойнинг иқтисодий ўсиши секинлашмоқда
Сурат манбаси, Getty Images
Хитой иқтисодиёти 1990 йиллардан буён илк бор ўсишнинг энг қуйи даражасига тушган.
Таҳлилчилар мамлакатнинг шундай муаммо билан юзланиши муқаррар эканини таъкидлаб келар эди. Бироқ АҚШ билан бошланган савдо уруши иқтисодий ўсиш суръатига жиддий зарба берган ва хитойликлар бизнес юритишда қийин аҳволга тушиб қолган.
Хитой ҳукумати жорий йилда иқтисодиётни жонлантириш мақсадида бизнесларга нисбатан давлат молиявий ёрдамини оширган ва солиқларни маълум даражада камайтирган.
Иқтисодиётчиларнинг фикрига кўра, 30 йил давомида ўсиш кўрсаткичи 10 фоиз бўлган Хитой иқтисодиётининг секинлашиши ҳайратланарли ҳолат эмас. Улар ҳукумат бу йиллар мобайнида хусусий бизнесни турли усуллар билан дастаклаб келганидан иқтисодиётнинг гуллаб-яшнагани, аммо бундай ҳолат яна узоқ йиллар давом этишининг имкони йўқлигини таъкидлайдилар.
Болалар ўғирланган машинада 900 км йўл босди
Сурат манбаси, Queensland Police
Австралияда 10 ёшдан 14 ёшгача экани айтилаётган тўрт нафар бола ота-оналарнинг биридан ўғирланган машинада 900 километр йўл босди.
Одамлар «ойнадан боши зўрға кўринаётган» болалар бошқарувидаги машинани кўриши билан полицияга хабар берган.
Сўнг полиция машинани таъқиб қилиб, уни тўхтатган.
Бу вақтга қадар болалар 900 километр йўл юришга улгурган. Полиция уларнинг 10 соат давомида тўхтовсиз рулда бўлганини тахмин қилмоқда.
Болаларга қарши айбловлар илгари сурилган, лекин бу айнан қандай айбловлар эканини очиқланмаган.
Австралиянинг аксар ҳудудларида автомашина бошқариш ҳуқуқини қўлга киритиш учун шахснинг камида 17 ёшдан ўтган бўлиши талаб этилади.
Аборт учун 30 йил
Сурат манбаси, Reuters
Фарзандини аборт йўли билан ўлдиришда айбланган эл салвадорлик 21 яшар Эвелин Беатриз Ҳернандез Круз иши қайта кўрила бошланди.
У абортга қарши қонунлар асосида 30 йилга озодликдан маҳрум этилган ва жазо муддатининг деярли уч йилини ўтаб бўлган.
Фарзандини ҳожатхонада дунёга келтирган Круз хоним чақалоқнинг ўлик туғилганини таъкидлайди, аммо прокурорлар фикрича, у боласини аборт йўли билан туширган.
Шу йилнинг февраль ойида суд унинг шикояти асосида ишни қайта кўриб чиқиш тўғрисида қарор олиб, Круз хонимни жараён якунига қадар уйида яшаб туришига рухсат берган эди.
Эл Салвадорда абортга қарши дунёдаги энг қаттиққўл қонунлар амал қилади.
Боласи тушиб қолган ёки ўлик туғилган аёллар, аксар ҳолларда, аборт қилишда айбланиб, узоқ йилларга панжара ортига ташланиши айтилади.
Инсон ҳуқуқлари гуруҳлари июнь ойида ҳокимиятга келган президент Найиб Букеленинг ушбу муаммони қайта кўриб чиқишидан умид қилаётганини билдирмоқда.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
