Ўзбекистон Президенти Мирзиёев Парижга етиб келди

Ўзбекистон Республикаси Президенти Шавкат Мирзиёев 2 кунлик расмий ташриф учун Франция пойтахти Парижга етиб келди. Кузатувчилар Мирзиёевнинг Франция ташрифи Ўзбекистоннинг Европа Иттифоқи билан алоқаларни кенгайтиришда муҳим восита бўлиши мумкинлигини тахмин қилишмоқда.

Бу Шавкат Мирзиёевнинг Европа давлатига қилаётган илк расмий ташриф ҳисобланади. У 9 октябрь куни Франция президенти Эммануэль Макрон билан икки томонлама музокаралар олиб боради.

ЎзАнинг ёзишича, икки давлат байроқлари билан безатилган "Орли" халқаро аэропортида Мирзиёевни Франция Республикасининг расмий шахслари кутиб олди.

Давлат раҳбари 8 август куни БМТнинг Таълим, фан ва маданият масалалари бўйича ташкилоти (ЮНЕСКО) Бош директори Одри Азуле билан учрашади.

Шунингдек, Шавкат Мирзиёев Франция Сенати раиси ва Франциянинг етакчи компаниялари раҳбарлари билан ҳам учрашиши кўзда тутилган.

Таҳлилчилар Мирзиёевнинг Францияга амалга ошираётган ташрифи Европа иттифоқи билан яқинлашувда муҳим роль ўйнаши мумкинлигига умид билдирмоқда.

Францияда истиқомат қилувчи сиёсатшунос Камолиддин Раббимов Шавкат Мирзиёевнинг Францияга ташрифи Ўзбекистон манфаатлари учун ўта муҳим эканлигини айтади.

"Ўзбекистон Европа Иттифоқининг асосий устунларидан бири бўлмиш Франция билан энг ишончли алоқада бўлиши, давлат олдида турган иқтисодий, ижтимоий, сиёсий ва геосиёсий вазифаларни ҳал қилишда муҳим аҳамият касб этади. Ўзбекистон геосиёсий нуқтаи назардан ўз алоқаларини мувозанатлаши, ЕИ билан алоқаларни жиддий кенгайтириши лозим. Бугун ғарб дунёси пароканда, англасаксон дунёда изоляционизмга оғишув кучли. Бугун бирлашган Европанинг сиёсий жиҳатдан энг ўзига ишонган марказий давлати худди Франциядек", дейди у.

Хорижда яшаётган ўзбекистонлик айрим фаоллар Мирзиёевнинг Францияга ташрифи чоғида норозилик акцияси ўтказишни режалаштирмоқда.

Улар шу йўл билан Ўзбекистондаги инсон-ҳуқуқлари ҳолати ҳамда хорижда яшаётган ўзбекистонликларнинг ҳуқуқлари чекланаётганига эътибор қаратмоқчи.

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek