Мирзиёев Мексика Президентига ўхшаши керакми?

Мексиканинг янги сайланган Президенти Андрес Мануэль Лопес Обрадор йўловчи учоқда 3 соат кутиб қолиб кетди. Шундай бўлса-да у Президент учун махсус сотиб олинган люкс учоқдан воз кечиш ғоясидан воз кечмаган. Ўзбекистон Президенти Шавкат Мирзиёев ҳам марҳум Ислом Каримовга мўлжалланган самолётда учмаяпти.

Президент Обрадор халқининг асосий қисми камбағал бўлган мамлакатда люкс учоқда учишдан уялишини айтган.

Мексика пойтахтига Оахака штатидан учаётган учоқ кучли жала сабаб ушланиб қолинган. Президент Обрадор бошқа йўловчилар билан бирга учоқда уч соат кутиб қолган. Кейин уларнинг ҳаммасини Уатулько аэропорти терминалига қайтариб тушуришган. У ерда яна бир соат кутишга тўғри келган.

Жами 4 соатлик кутишдан сўнг йўловчилар учиб кетишган.

Бу вақт давомида Обрадор Президент самолётига ўтиришдан бош тортган.

Сўл ва марказчилар коалициясини намоён қилган Обрадор 1 июлдаги сайловларда катта фарқ билан ғалаба қозонганди.

У шу йилнинг 1 декабр куни давлат раҳбари ўрнини эгаллаши керак.

Президентнинг Boeing 787 Dreamliner учоғига 2012 йили ўша вақтдаги Мексика Президенти Фелипе Кальдерон томонидан буюртма берилганди. У икки йил олдин Президентга хизмат қилишни бошлаган. Люкс синфга кирувчи ушбу учоқнинг қиймати 218 миллион доллардан ошади.

Бу самолёт дунёдаги давлат раҳбарлари қўлланиладиган учоқлар ичида энг замонавий ва тежамкори ҳисобланади.

Ўзбекистоннинг 2016 йил декабрида сайланган Президенти Шавкат Мирзиёев давлат раҳбари учун ажратилган махсус самолётдан фойдаланмаётгани кузатилмоқда.

Шавкат Мирзёев хавфсизлик сабаб россиялик миллиардер Алишер Усмоновга тегишли Airbus A340-313 учоғини ижарага олиб ишлатаётгани маълум қилинган.

Мирзиёев қисқа масофаларга Ўзбекистонга тегишли учоқда бориши кузатилган.

Яқинда президент матбуот хизмати Мирзиёев сотиб олган янги тикучарни намойиш қилди.

Ўзбекистонда энг кам иш ҳақи 23 долларни ташқил қилади. Ўртача ойлик 100-200 доллар атрофида.

Аҳолининг катта қисми Россия, Туркия ва Қозоғистон каби ўлкаларда меҳнат қилади.

Президенти люкс самолётдан воз кечиб, оддий одамлар билан учаётган Мексика дунёнинг тез ривожланаётган 11 - давлати ҳисобланади.

Мексикада ўртача ойлик 600-1000 долларни ташкил қилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek