Ўзбекистонликларнинг автобусда ёниб кетишида Ёшлар иттифоқининг айби борми?

Ақтўбеда 52 ўзбекистонлик ёниб кетиши ижтимоий тармоқларда кенг акс-садо берди. Facebook да фаол блоггер Муаззам Иброҳимова фожианинг келиб чиқишида Ўзбекистон Ёшлар иттифоқининг масъулиятсизлиги ҳам роль ўйнагани ҳақида ёзди.

"Олов ичида, жон талвасасида нималар хақида ўйладингиз? Балки ортингиздан мўлтираб қолган онаизор, чорасизликдан бағридан кетқизган ота, ийманибгина "кутаман" деб қолган ёрингизними?", деб ёзади Муаззам Иброҳимова.

Блоггер фожида айбдор кўплигини, аммо энг катталарига айтадиган икки оғиз гапи борлигини айтган.

"Бир дунё машҳур-машҳур тайин, бетайин агитаторни йиғиб, бир олам ваъдалар билан. Наманганнинг Тўрақўрғонига ҳам борган битта зўр ташкилот бор. Чекка қишлоқларгача етиб, қадамларини суратга олдириб, жойлардаги ҳақиқий ахвол билан танишиб халқни умидвор қилган, катта -катта ваъдалар берган ваъдабоз ташкилот бор".

Муаззам Иброҳимова матнда Ёшлар иттифоқининг номини тилга олмаган, бироқ ундан гап ушбу ташкилот ҳақида бораётганини англаш мумкин.

"Халқ чўнтагидан чиқиб, фаолиятингиз учун ажратилаётган миллиард- миллиардларда ёниб кетган ёшларнинг насибаси йўқмиди? Ёки сиз фаолият деганида фақатгина рўмол ечтириш, коллежга кириб дарс бузиш, Энрикенинг концертида диконглаб сакрашнигина тушунасизми?"

Блоггер Ёшлар иттифоқи халқ билан ҳамнафас бўлмагани учун халқ меҳрини қозона олмаётганини ёзади.

"Жилла қурса, ўша ёниб кетган қоракўзларга самолёт ёки поезнинг билетига етадиган маблағни Иттифоқ ғазнасига тушаётган пуллардан қарзга бериб туриш мумкин эди. Бироқ бу фаолларингизнинг бирортасининг хаёлига келмаган.

Ёки минглаб ишга кетаётган ўғил -қизларга бехатар, беталофат маршрут ташкил қилиб, фаолиятини назорат қилиш, уларнинг иссиқ- совуғидан бохабар бўлиб турадиган шўъба ташкил қилиш режангизда ҳам йўқ".

Блоггер хаста боласини даволатаман, деб Россияга кетган ва ўша ерда ақлини йўқотган Улуғбек исмли ўзбекистонлик мисолини келтирган.

"Беш йил аввал фарзандида туғма юрак пороги бор Улуғбек исмли йигит операция учун пул топаман деб Россияга кетиб беиз йўқолган. Уни ўтган йили Москвадаги метроларнинг бирида тиланчилик қилиб юрганини кўришган. Эси кирди-чиқди, бир аҳволда экан.

Сиз ўша ўттизга ҳам кирмаган, қачонлардир энг аъло баҳоларга ўқиган юртошимиз хақида бирор марта суриштирдингизми?

Отасини кута- кута операциясиз ўлиб кетган фарзандидан бирор марта хабар олдингизми?

Фарзанд, невара доғини кўтара олмаган ота-она ўлимидан сўнг хонадонига бориб фожиа сабаблари билан қизиқдингизми?! Йўқ".

Муаззам Иброҳимова Ёшлар иттифоқини ҳалол пул топаман, деб Россияга йўл олган 52 ўзбекистонликнинг ҳаётини асраб қола олмаганликда айблайди.

"Ўлиб кетган ўша 52 та Ватандошим, "эллик тўртчи" бўлмай, ўғрилик , ғарлик, юлғичлик қилмай, халол пул топай" деб, совуқ ўлкаларга йўл олишганди. Сиз ўша ҳалол- пок, номусу, имони бутун ёшларни асраб қолмадингиз".

"Нега чегарада битта штабингиз йўқ? Кетаётганларни қўрқитмай, дилдан суҳбатлашадиган мутахасисларингиз йўқ! Агар сиз озгина маблағ ажратиб, ўзингизнинг таъбирингиз билан айтганда "уюшмаган" дилбандларимизнинг дилига йўл топа олганингизда "автобусгагина пулим бор, жонимни гаровга қўйиб кетяпман" деган нолалаларини эшитган бўлар эдингиз..."

Блоггер техник талабларга жавоб бермайдиган автобусда Ёшлар иттифоқи чет эл сафарларига чиқиб кўриши кераклигини айтади.

"Эх, қани энди Президент битта буйруқ берсаю, охири йўқ чет эл сафарларига замонавий, техник соз самолётларда эмас, лицензияси битган шалоғи чиққан автобусларда чиқсангиз. Сиз Ватанга қайтармоқчи бўлаётган мардикорларнинг олдига ит азобида етиб борсангиз".

У ташкилотни ваъдабозликда айблаган.

"Ундай қиламиз, бундай қиляпмиз" деб, нафақагача етвосангиз бўлди! Изингиздан яна битта ваъдабоз келади. Ўзбекнинг шўри, ўзбекнинг фожеаси шуки, умид қилиб, ишониб, "Тинч яшаяпмизку" деб яшайверади".

Блоггер мактабда ўқиётган фарзандларининг келажагидан хавотир билан яшаётганини урғулаган.

"Ҳалол бизнесс қиламан десаю, энг кам фоизли (14 % камми!) кредит берган банкларнинг ўзи синдириб қўйса, инсон хуқуқлари кафолатланган Америка ёки Европани орзу қилиб қолмайдими?

Ота ёки бобосидан мерос қолган жойда тирикчилик қилмоқчи бўлсаю, "тузукроқ таъмирланмаган" деган баҳоналар билан бино тортиб олиниб, аукционга қўйилса, тадбиркорликни ташлаб порахўр ёки каззоб бўлмайдими?!

Олийгоҳни битирсаю, энг зўр диплом билан муносиб яшашга яраша пул топа олмаса, Ўзбекистонни ташлаб, бола-чақасини олиб, яхши мутахасисларни жон-жон деб кутиб оладиган давлатларга бош олиб кетмайдими?", дейди у.

"Энг ёмони кечаги йигитлар каби ёниб кетмайдими? Куйиб кетмайдими? Астағфируллоҳ! Аллоҳ ҳар бир бандасини ўз паноҳида асрасин".

У Ёшлар иттифоқига ўтказилаётган ҳар бир тийин қаерга сарфланаётгани ҳақида ҳисобот бериши кераклигини ёзган.

У туйғуларини шеър орқали ифода қилган.

Ёшлар иттифоқи раиси Қаҳрамон Қуронбоевнинг Facebook даги саҳифаси иттифоқ етакчилари Косонсой туман Чиндовул қишлоғида бўлиб автобусда ҳалок бўлганларнинг яқинларига таъзия билдиргани ҳақида ёзди.

"Маънавий ва ижтимоий кўмак бериш учун барча чоралар кўрилди. Маросимларни ўтказиш бўйича ёшлар хонадонларга бириктирилди. Бир гуруҳ ёшлар эса тенгдошларининг ота-оналари, яқинларига руҳий мадад бериш илинжида", деб ёзди Қаҳрамон Қуронбоев.