Жаҳон Чемпионати 2022. Қатар. Финал: Аргентина янги жаҳон чемпиони Qatar O‘zbekiston Futbol Dunyo Yangiliklar

Аргентина 4-2 Франция. Футбол бўйича 2022 йилги жаҳон чемпионати ўз поёнига етди. Аргентина 36 йил деганда яна ўз ютуғини такрорлади. Терма жамоа бу галгиси билан ўз тарихида учинчи бор жаҳон чемпионлигини қўлга киритди.

18 декабрь куни футбол бўйича янги жаҳон чемпионининг номи маълум бўлди. Финал учрашувини тақдирини пенальтилар серияси ҳал қилди.Финал босқичига Аргентина ва Франция чиқишганди. Бу ҳар икки рақиб терма жамоанинг ҳам учинчи бор жаҳон чемпионлиги учун кураши эди. Франция кетма-кет иккинчи бор чемпионликни қўлга киритиш истагида майдонга тушганди. Бу каби шараф шу пайтгача дунёнинг бор-йўғи икки миллий терма жамоасига насиб этган, холос. Аргентина эса, 1986 йилги ютуғини қайта такрорлашга муваффақ бўлди. Бу йилги жаҳон чемпионатининг бронза медалларини Хорватия қўлга киритган. Хорватия кеча, 17 декабрь куни учинчи ўрин учун бўлиб ўтган баҳсда Марокашни 2-1 ҳисобига мағлуб этган. Марокаш шу босқичгача кўтарила олиш билан Қатарда ўзига хос тарихий натижа қайд этган. Финал учрашувида ҳет-трик қайд этган Франция миллий терма жамоаси ҳужумчиси Килиан Мбаппе бу йилги жаҳон чемпионатининг энг зўр тўпурарига айланди. Киритган 8 та тўпи билан "Олтин бутса"ни олди. Лионель Месси эса, биринчиликнинг энг зўр ўйинчиси сифатида эътироф этилди. Чемпионатнинг "Олтин тўпи"га лойиқ кўрилди. Месси бу каби шарафга икки бор нойил кўрилган футболчи сифатида тарихга кирди. Биринчиликнинг "Олтин қўлқопи" эса, Аргентина миллий терма жамоаси дарвозабонига кетди. Дамиан Эмилиано Мартинес бу йилги жаҳон чемпионатининг энг зўр дарвозабони, деб топилди. Осиё терма жамоалари Қатарда эришган энг юқори ютуқ эса, нимчорак финали бўлди. Япония, Австралия ва Жанубий Корея бундан уёғига ўта олишмади. Шу билан Би-биси ўйинлар натижаларини реал вақт режимида бериб боришни тўхтатади.

Махсус лойиҳа:

20 ноябрь куни старт олган жаҳон чемпионати бугун, 18 декабрь куни ўз поёнига етади.

Бу йилги дунё биринчилигига Қатар мезбонлик қилмоқда.

Қатар бу каби имкониятни қўлга киритган биринчи Яқин Шарқ давлатидир.

Жаҳон чемпионлиги учун дунёнинг 32 миллий терма жамоаси беллашди.

Янги чемпион тақдирини ҳал қилувчи 64 ўйин Қатарнинг 7 шаҳридаги 8 та стадионда бўлиб ўтди.

Жаҳон чемпионлиги учун кураш 28 кун давом этди.

Алоқадор мавзулар:

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbc.com/uzbek