Жаҳон чемпионатини Қатарга бериш хато бўлганми? Ўзбек футбол мухлислари нега Россия билан ўйинга норозилик билдиряпти?

ФИФА собиқ президенти Зепп Блаттер футбол бўйича Жаҳон чемпионати - 2022 ни Қатарга бериш хато бўлганини айтди. У чемпионат Россияга берилиши тўғри қарор эканлигини билдирган. Айрим ўзбек мухлислари Ўзбекистоннинг Россия билан ўртоқлик ўйин ўтказишига норозилик билдирмоқда.

"Бу жуда кичик мамлакат, жаҳон чемпионатини унинг учун жуда ҳам катталик қилади", деган Зепп Блаттер.

ФИФА ижроий қўмитаси 12 йил олдин 8 қарши овоз ва 14 маъқуллаган овоз билан Жаҳон чемпионатини 2022 йили Қатарда ўтказишга овоз берганди. Блаттер ўша вақти бу ташкилотнинг раҳбари эди.

Унинг таъкидлашича, ўзи АҚШ номзодига овоз берган, буларнинг ҳаммасида гўёки тарози палласини Қатар фойдасига оғирлаштирган УЕФА перезиденти Мишел Платини айблаган

"Шундан сўнг иэтимоий асосга эга эканлиги ва инсон ҳуқуқлари масаласи ўртага чиқди", деган у.

Инсон ҳуқуқлари ташкилотлари ўга вақтдаёқ ушбу давлатни ЛГБТ аъзоларига тоқатсизликда, инсон ҳуқуқларини бузишда ва меҳнат муҳожирларига ёмон муносабатда айблаган.

Яқин шарқ тарихида илк жаҳон чемпионати Қатарда 20 ноябрдан 18 декабргача бўлиб ўтади. Қатар жуда иссиқ бўлгани учун чемпионатни қишдан ёзга кўчиришга тўғри келган.

2010 йили ФИФА ижроий қўмитаси Жаҳон чемпионати 2018 йил Россияда ўтишига овоз берганди.

Блаттерга кўра, ушбу қарор тўғри бўлган ва ҳатто у Россия президенти Владимир Путинни собиқ дўстим, деган. Чунки у билан анчадан бери гаплашмаётгани учун собиқ деган.

"Қатар хато эди"

Блаттернинг таъкидлашича, ФИФА ижроий қўмитасида Жаҳон Чемпионати - 2018 Россияга берилади, кейинги чемпионат эса АҚШда ўтади, деган келишув бўлган.

Кўмита нуқтаи назарига кўра, агар угбу азалий рақиблар чемпионатни ўзида навбат билан қабул қилса, бу футбол томонидан қилинган яхши ишора бўларди.

Бироқ Блаттернинг айтишича, овоз беришдан бир ҳафта олдин унга Мишел Платини қўнғироқ қилган ва "Sepp, ça ne va plus jouer", деган. Яъни эски режани бекор қилишга тўғри келади.

Буларнинг ҳаммасига Франция президенти Николя Саркози Қатар валиаҳд шаҳзодаси шарафига Елисей саройида тортилган тушликка Платини ҳам таклиф қилгани сабаб бўлган.

Франция президенти гўёки дўстона оҳангда "Мишел, Қатар ўзида чемпионатни ўтказиши учун УЕФАдаги ҳамкасбларингиз билан нима қила оласизлар", деб сўраган.

"Зепп, агар сендан президент бирор нарса сўраганда, нима қилган бўлардинг? - деб сўради Платини мендан. Мен унга Швейцарияда президент йўқ, дедим. Натижада Платини ва унинг одамлари туфайли чемпионат Америкага эмас, балки Қатарга насиб қилди. 6 ойдан сўнг Қатар Франциядан 14 миллиарддан ошиқ долларга қирувчи самолётлар сотиб олди", деган Зепп Блаттер.

Жамоатчилик футбол бўйича Жаҳон чемпионатининг Россия ва Қатарга берилганини танқид остига олиб келади.

ФИФА собиқ президентига кўра, чемпионатнинг Россияга берилиши хато бўлмаган, чунки режа бўйича кейинги галги чемпионат унинг рақиби АҚШда бўлиб ўтиши керак эди.

Россия шу йилнинг феврал ойида қўшниси Украина ерларига бостириб кирганидан сўнг Ғарб томонидан жиддий санкчилар тўлқинига учради.

Шу жумладан, Россия футбол клублари ва терма жамоаси халқаро мусобақалардан четлатилди.

Халқаро ўйинлардан четлатилган футбол бўйича Россия терма жамоаси сентябр ойида Қирғизистон билан ўртоқлик ўйини ўйнади.

Россиянинг Босния билан режалаштирилган ўртоқлик ўйини номаълум муддатга қолдирилди.

Россия термаси 17 ноябр Тожикистон ва 20 нояр куни Ўзбекистон билан ўртоқлик ўйини ўйнаши керак.

Россия термаси Twitterда "Futbol oʻynash vaqti keldi, doʻstlar", деб ёзган твити норозикликларга ва ўйинни бойкот қилиш чақириқларига сабаб бўлди.

"Ўйинни бойкот қилиш керак", деб ёзди таниқлик блогер Хушнудбек Худайбердиев.

Футболга сиёсатни аралаштирмаслик кераклигини, истаган киши футболга бориши мумкинлигини ёзганлар ҳам бўлди.

Айримларга кўра, Россия терма жамоаси халқаро миқёсда яккаланиб қолганидан сўнг мажбур Ўзбекистон, Қирғизистон каби жамоалар билан ўртоқлик ўйини ўтказмоқда.