Қозоғистон Ташқи Ишлар вазири ОХҲТга раислик муддатининг устувор вазифаларини тақдим этди

Собиқ Иттифоқ республикалари орасида биринчи бўлиб Оврўпода Хавфсизлик ва Ҳамкорлик ташкилотига раислик қила бошлаган Қозоғистон ўз режаларини тақдим этди.

Венадаги ташкилот қароргоҳида нутқ сўзлаган ташқи ишлар вазири Қанат Саудабаев Қозоғистон ўз раислик муддатининг асосий масалаларидан бири сифатида Афғонистонда барқарорликни ўрнатишни белгилашини билдирди.

"Афғонистондаги вазиятнинг ривожланишини биз глобал хавфсизлик, терроризм, диний экстремизм ва гиёҳванд моддаларнинг ноқонунуий савдосига қарши кураш нуқтаи назаридан ёндошамиз",- деди жаноб Саудабаев.

Қозоғистон Ташқи Ишлар вазири Афғонистонни мустақил, тинч ва демократияга асосланган жамиятга айлантириш йўлида ёрдам бериш ОХҲТ ва халқаро ҳамжамиятнинг асосий вазифаларидан бири эканлиги ва бу йўлда Лондонда январ ойи охирларида ўтказиладиган халқаро анжуман муҳим рол ўйнашини билдирди.

Жаноб Саудабаев шунингдек, атроф-муҳитни асраш ва парламент тизимларини такомиллаштириш масалалари ҳам устувор йўналишлардан бўлишини билдирди.

Аввалроқ Қозоғистоннинг ОХҲТ раислиги борасида гапирган президент Нурсултон Назарбоев Ғарб билан Шарқни яқинлаштириш йўлида ҳаракат қилиниши ҳақида билдирганди.

Президент Назарбоев Венадаги бугунги маросимга видео-мурожаатида Қозоғистон раислик муддатининг шиори тўртта "Т" дан иборат бўлишини айтди. Булар - "trust" - ўзаро ишонч, "tradition" - анъаналар, "transparency" - ошкоралик ва "tolerance" - бағри кенгликдир, деб айтди жаноб Назарбоев.

Қозоғистоннинг ОХҲТга раислик қилиш ғояси бундан ўн йил аввал илгари сурилганди. Шу ўн йил мобайнида инсон ҳуқуқлари ва сўз эркинлиги соҳаларидаги вазияти туфайли бу мавқега не қадар лойиқлиги ҳақидаги баҳслар тинмади.

Бир қатор инсон ҳуқуқларини ҳимоя қилиш ташкилотларига кўра, Қозоғистон демократия соҳасида кўзга ташланарли қадамларни қўймаган ва шунинг учун ОХҲТга раисликка лойиқ эмас.

"Азат" мухолифат партияси ОХҲТ Парламент Ассамблеясида Қозоғистондаги демократия аҳволини муҳокама қилиш маҳсус мажлис чақириш таклифи билан чиқди.

Аммо расмийлар Қозоғистоннинг ташкилотга раис этиб тайинланиши мамлакатнинг халқаро обрўси юқори эканлиги ва раислик каби тарихий вазифани шараф билан бажаришга тайёр эканлигини айтмоқдалар.

Венадаги баъзи дипломатлар ҳам Қозоғистоннинг ОХҲТга раислиги ташкилотга аъзо Ғарб ва Шарқ мамлакатлари ўртаисида кўприк вазифасини ўташига умид билдирдилар.

Аммо Австрия Ташқи Ишлар вазири Қозоғистон раислигининг муваффақиятлари мамлакатнинг инсон ҳуқуқлари, демократия ва қонун устуворлиги йўлида қўйган қадамлари асосида баҳоланишини билдирди.