Жаноб Алиев ўзига қарши айблар уни сиёсий саҳнадан четлатиш мақсадида қўйилганини даъво қилган

Қозоғистон расмийлари мамлакат прокуратураси мулозимларидан иборат ҳайъат Президент Назарбоевнинг куёви Роҳат Алиевни ҳибсга олиш учун Австрияга йўл олганини маълум қилишган.

Президентнинг тўнғич қизи Дариға Назарбоеванинг турмуш ўртоғи бўлган жаноб Алиев ўтган ҳафта Австриядаги элчилик лавозимидан бўшатилган эди.

У Қозоғистондаги икки банкирни ўғирлаб кетишда айбланмоқда. Жаноб Алиев ўзига қарши айблар тўкиб чиқарилгани ва мақсад уни сиёсий саҳнадан четлатиш эканини даъво қилган.

У Президент Назарбоевни демократиядан ортга чекинишда айблаган. Аммо Қозоғистондаги мухолифат партиялари, афтидан, жаноб Алиевнинг демократия ҳақидаги сўзларига шубҳа қилаётган кўринадилар. Би-би-си мухолифатдаги ҳақиқий Ақ жол партияси раҳбарларидан Ораз Жандосовга мурожаат қилган ва унинг айни можарога муносабатини сўраган:

Ораз Жандосов: Мен буни оилавий можаро деб атаётганим йўқ. Гап ҳақиқатан ҳам содир бўлган жиноят, яъни жаноб Алиевга қарашли Нурбанкнинг икки бошқарувчиси ўғирлаб кетилиши ҳақида кетаяпти ва Президент бу жиноятни текшираётган ҳуқуқ-тартибот идораларининг ишига аралашгани йўқ. Уларга қонун доирасида ўз вазифаларини бажаришга имкон берди. Роҳат Алиевнинг коррупсия ҳақидаги баёнотларига келсак, бу қуруқ сўздан бошқа ҳеч нарса эмас. У биронта ҳам аниқ фактни келтиргани йўқ. У ўзини гўёки коррупция ҳақидаги баъзи фактларни ошкор қилиш ниятида бўлгани учун шу ҳолга тушгандек қилиб кўрсатаяпти. Бу жиддий эмас.

Би-би-си: Бошқача қилиб айтганда, Сиз бу қарама-қаршиликда Президент Назарбоевни қўллаб-қувватлайсиз, шундайми?

Ораз Жандосов: Бу ерда Президент ва Роҳат Алиев ўртасида қарама-қаршилик йўқ. Роҳат Алиевнинг бутун кучи президентнинг куёви эканида, холос.

Би-би-си: Аммо буларнинг ҳаммаси, жаноб Алиевнинг айтишича, у 2012 йилда президентлик сайловида қатнашишини айтганидан сўнг содир бўлмоқда.....

Ораз Жандосов: Ўтган шанбага қадар Роҳат Алиевнинг бирон жойда бу ҳақда гапирганининг исботини топа олмайсиз. Қолаверса, демократия ёки коррупция ҳақида у шу пайтга қадар бу ҳақда Қозиғистонда демократиянинг тақдири ҳақида лом-мим демаган. Аксинча, ўтган йили у очиқ-ошкора Қозогистонда монархия, хонлик ўрнатишни таклиф килиб чиққан. Менимча, у Назарбоевга 2012 йилда президентлик сайловида қатнашишини айтгани ҳақидаги эртакни ўтган шанба тўқиб чиқарган.

Би-би-си: Яъни, Сиз Роҳат Алиевга қарши иш соф жиноий иш, бу ерда сиёсат йўқ, демоқчимисиз?

Ораз Жандосов: Роҳат Алиев гумон қилинаетган иш ҳақиқатдан ҳам соф жиноят ишидир. Аммо, бу ерда бир нарса бор. Жабрланган томон, яъни Нурбанкнинг икки раҳбарининг аёллари тергов идораларига феврал ойида мурожаат қилишган. Ўтган бутун вақт давомида фақат бизнинг партиямиз, эҳтимол, яна бир икки мухолифат партиялари ҳуқуқ-тартибот идораларини қонунда кўзда тутилган чораларни кўришга чақириб келди. Бу чоралар кўрилгани йўқ, аммо мана бугунга келиб, кўрилаяпти. Яъни ҳечдан кўра кеч яхши. Роҳат Алиевнинг ўзини ҳимоя қилиш учун танлаган усулига келсак, бу энди унинг виждонига ҳавола.Қозоғистонда биронта ҳам одам йўқки, унинг демократияни ҳимоя қилганига ишонса. Эҳтимол, аёли- Дариға Назарбоева бунга ишонар.

Би-би-си: Аммо, наҳотки Сиз Роҳат Алиевнинг президентликка интилганига ҳам ишонмасангиз?

Ораз Жандосов: Президентликка интилиши қайсидир даражада бўлган. Ёдингизда бўлса, Роҳат Алиевга бирнчи зарба 2001 йилдаги сайловлар пайтида берилганди. Ўшанда мухолифатдаги Қозоғистоннинг демократик танлови патияси жаноб Алиевнинг ҳокимиятга йўлига тўсиқ қўйган эди. Ўшанда Алиев куч тизимларини назорат қилган, унинг одамлари бутун асосий лавозимларни эгаллаган эди. Шунда жаноб Алиев ҳокимиятга жуда ҳам яқин келган. Охирги можарода бундай бўлган, деб ўйламайман. Аммо ҳукумат ҳозир унга қарашли КТК ва Хабар телеканалларини ёпиб қўйди. Бу, шубҳасиз, сўз эркинлигининг чекланиши ва биз буни очиқчасига қораладик.

Би-би-си: Аммо Сиз мухолифат раҳбари сифатида барибир Қозоғистонни бошқараётган оилада бўлиниш юз берганига хурсанд бўлсангиз керак?

Ораз Жандосов: Биз, сиз айтаётгандек бўлинишга хурсанд бўлаётганимиз йук. гап бу ерда битта фукаро, яъни рохат алиевда эмас. гап козогистондаги сиесий тизимда. рохат алиев можароси козогистондаги сиесий тузум учраган инкирозни яккол намойиш этди. буни факат биз, мухолифатгина эмас. балки сиесат билан кизикадиган оддий одамлар хам айтишаяпти..

Би-би-си: Сиз бу воқеадан сўнг Президент Назарбоев ҳокимият жиловини янада маҳкамроқ қўлга олишидан хавотирдамисиз?

Ораз Жандосов: Ҳокимият жиловини бундан ортиқ қўлга олиш мумкин эмас. Бизда ҳокимият етарли даражада президентнинг қўлида тўпланган. Мухолифатга фаолият юритиши учун шароит жуда ёмон. Шунинг учун мен бундан ҳам ёмонлашади, деб ўйламайман.