BBCUzbek.com

Мустақил Ўзбекистон мақолалари СССР даври мақолаларидан фарқ қилсин деган истак бормикан?
Ўтган ҳафта Ўзбекистон марказий нашрлари август ойининг бошлангани, яъни бу ойдаги “зарбдор меҳнат пахтадан юқори ҳосил олиш гарови” эканига диққат қаратган.

“Халқ Сўзи” рўзномасининг биринчи саҳифасидаги долзарб меҳнатга чақириқлар ва деҳқонларга меҳнатни ташкил қилишни ўргатувчи қўлланмага хос мақолалар беихтиёр дала
шийпонларига илинадиган
деворий газеталарни эслатади.

“...“Халқ Сўзи” саҳифаларида август ойида бутун мамлакатимиз далаларидаги аҳвол ҳақида тезкор чиқишлар бериб борилади” дея ёзган рўзнома Сурхондарё вилоятига алоҳида эътибор беришини таъкидлайди. Чунки Сурхондарё мамлакат жанубида бўлгани учун “илк ҳосил шу ерда нишона” беради ва вилоят ўтган йили “қолоқликка барҳам беролмади,” деб ёзади рўзнома 1 август сонида.

“Бугун тракторни ғўза қатор ораларида “йўрғалатиб” эмас, “одимлатиб” юргизиш керак бўлади” қабилида маслаҳатлар берган рўзнома нафақат вилоят ва туман ҳокимлари, балки қишлоқ ва маҳалла оқсоқоллари ҳам одамлар орасига кириб “барча меҳнат аҳлини пахтазордаги юмушларга сафарбар этиш борасида қизғин иш олиб бораётирлар” деб хабар беради.

Марказий рўзномалар фермерлар ва механизаторлар ҳақида очерклар, мустақиллик даврида эришилган ютуқларини санаб ўтувчи Ўзбекистон қаҳрамонларининг мақолаларини чоп этишни давом эттириб, 15 йиллик “тўйга муносиб тўёна”лар тайёрланаётгани ҳақида хабар қилади.

“Ўзбекистон Овози”нинг Марказий Банк раиси Файзулла Муллажонов билан қарийб икки саҳифалик суҳбати пул тизими соҳасидаги 15 йиллик сиёсатни сарҳисоб қилади. Жаноб Муллажанов ўтган йили аҳолининг пул даромадлари 44 фоизга ошгани, инфляция даражаси 1994 йилги 1132,4 фоиздан ўтган йилга келиб 7,8 фоизга тушганини айтади. Шунингдек, у Ўзбекистоннинг олтин-валюта заҳиралари ўтган олти ой ичида 24,4 фоизга ошганини айтади, лекин унинг рақамлардаги ифодаси ўқувчига сир бўлиб қолади.

Ташқи сиёсат борасида бу ҳафта ҳам сиёсий шарҳловчи Иброҳим Норматов байроқни қўлдан бермаган. “Ўзбекистон овози”даги “Лоқайд дунё” номли мақоласида Норматов жаноблари жаҳон ҳамжамиятини Ливандаги ҳалокатга лоқайдлик билан қарашда айблайди. Муаллиф БМТ хавфсизлик кенгашида Ливан масаласини муҳокама қилиниши ҳақида гапириб, ташкилотни можарога нохолис ёндашишда танқид қилади. “БМТ ҳатто битта жумлани ҳам ўтказа олмади. Унинг халқаро ҳакамлиги қаёқда қолди?” дея савол берган муаллиф жавобни “демократияни ниқоб қилиб олган” мамлакатдан қидиради.

“Инсон ва Қонун” рўзномасидаги “Қози бўл, ҳакам бўл, инсоф билан бўл!” номли шарҳида жаноб Норматов айни БМТ ва номи айтилмаган “демократия даҳосини” янада кучлироқ танқид остига олади.

“Моҳият” ҳафталигидаги бош мақолада эса Иброҳим Норматов хориж матбуотини Ўзбекистоннинг 15 йиллик ташқи сиёсатидаги ҳар бир қадамга турли тамғалар босишга уринишда айблаган.
“XXI Аср” ҳафталиги эса Ўзбекистондаги айрим хорижий нодавлат ташкилотлари кирдикорини фош қилувчи мақола эълон қилган. Унда жумладан, яқинда суд томонидан ёпилган АҚШнинг “Уинрок Интернэйшнл” (Winrock International) қишлоқ хўжалигига ёрдам кўрсатувчи ташкилот фаолиятига батафсил тўхталган.

Ташкилот “...ўтган 12 йиллик фаолияти давомида аёллар ва ёшлардан иборат гуруҳлар тузиб, улар учун 183 минг доллар сарфлаб....ўнлаб опа-сингилларимизни хорижга қишлоқ хўжалиги соҳасини эмас, балки “инсон ҳуқуқларини” ўрганишга юборди” деб ёзади муаллиф Умид Арслонбеков.

Муаллиф ёш мустақил давлатларга ахборот уруши эълон қилинган пайтда фуқароларни огоҳликка ундаб, муросасиз курашга тайёр туришга чорлайди.

“Ҳуррият” ҳафталигида эса Фавқулодда вазиятлар вазирлигининг қутқарув хизмати фақат Тошкентда доимий рўйхатдан ўтган фуқароларга ёрдам кўрсатишини танқид қилиб, бу конституцияга ҳам зид экани, инсон ҳаётини сақлаб қолиш унинг миллати ёки доимий рўйхатдан ўтган ёки ўтмаганлигига боғлиқ бўлмаслиги лозимлигини таъкидлайди.